ನಮ್ಮ ಉಗುರುಗಳ ಅಡಿಯಲ್ಲಿವೆ 32 ಬಗೆಯ ಬ್ಯಾಕ್ಟೀರಿಯಾ; ಸ್ವಚ್ಛತೆ ಕಾಪಾಡದಿದ್ದರೆ ಆಸ್ಪತ್ರೆ ಸೇರುವುದು ಖಚಿತ…!

ದಿನವಿಡೀ ಹತ್ತಾರು ಬಾರಿ ನಾವು ಕೈಗಳಿಂದ ಮುಖವನ್ನು, ದೇಹದ ಇತರ ಭಾಗಗಳನ್ನು ಸ್ಪರ್ಷಿಸುತ್ತೇವೆ. ಆದರೆ ನಮ್ಮ ಸುಂದರವಾದ ಉಗುರುಗಳ ಅಡಿಯಲ್ಲಿ ಲಕ್ಷಾಂತರ ಸೂಕ್ಷ್ಮ ಜೀವಿಗಳು ವಾಸಿಸುತ್ತವೆ. 32 ವಿವಿಧ ರೀತಿಯ ಬ್ಯಾಕ್ಟೀರಿಯಾಗಳು ಮತ್ತು 28 ಬಗೆಯ ಶಿಲೀಂಧ್ರಗಳು ಉಗುರುಗಳ ಅಡಿಯಲ್ಲಿರುತ್ತವೆ ಎಂಬುದು ಸಂಶೋಧನೆಯಲ್ಲಿ ಬಹಿರಂಗವಾಗಿದೆ.

ಸಂಶೋಧಕರು ಉಗುರುಗಳ ಕೆಳಗಿನ ಮಾದರಿಗಳನ್ನು ಪರೀಕ್ಷಿಸಿದ್ದಾರೆ. ಇವುಗಳಲ್ಲಿ 50 ಪ್ರತಿಶತದಷ್ಟು ಮಾದರಿಗಳು ಬ್ಯಾಕ್ಟೀರಿಯಾವನ್ನು ಮಾತ್ರ ಒಳಗೊಂಡಿವೆ. ಶೇ.6.3ರಷ್ಟು ಶಿಲೀಂಧ್ರ ಮತ್ತು 43.7 ಪ್ರತಿಶತ ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳ ಮಿಶ್ರ ಗುಂಪನ್ನು ಒಳಗೊಂಡಿವೆ.

ಕಾಲ್ಬೆರಳ ಉಗುರುಗಳ ಮೇಲೆ ಸಂಶೋಧನೆ

ಈ ಅಧ್ಯಯನವನ್ನು ಕಾಲ್ಬೆರಳ ಉಗುರುಗಳ ಮೇಲೆ ಮಾಡಲಾಗಿದೆ. ಅದೇ ರೀತಿಯ ಬ್ಯಾಕ್ಟೀರಿಯಾ, ಶಿಲೀಂಧ್ರಗಳು ಕೈಗಳ ಉಗುರುಗಳಲ್ಲೂ ಇರುತ್ತವೆ. ಕೆಲವರು ಉಗುರು ಕಚ್ಚುವ ಅಭ್ಯಾಸ ಹೊಂದಿರುತ್ತಾರೆ. ಆಗಾಗ ಮೂಗು ಉಜ್ಜಿಕೊಳ್ಳುವುದು, ಯಾರನ್ನಾದರೂ ತಬ್ಬಿಕೊಳ್ಳುವುದು ಮಾಡಿದಾಗಲೆಲ್ಲಾ ಬ್ಯಾಕ್ಟೀರಿಯಾಗಳು ನಮ್ಮ ದೇಹ ಸೇರುತ್ತವೆ. ಹಾಗಾಗಿ ಉಗುರುಗಳ ಶುಚಿತ್ವ ನಮ್ಮ ಸೌಂದರ್ಯಕ್ಕೆ ಮಾತ್ರವಲ್ಲ ಆರೋಗ್ಯಕ್ಕೂ ಬಹಳ ಮುಖ್ಯವಾಗಿದೆ.

ಉಗುರುಗಳ ಅಡಿಯಲ್ಲಿ ಕಂಡುಬರುವ ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳು ಹಾನಿಕಾರಕ. ಕೆಲವು ಸಂದರ್ಭಗಳಲ್ಲಿ ಈ ಸೂಕ್ಷ್ಮ ಜೀವಿಗಳು ದುರ್ಬಲ ರೋಗನಿರೋಧಕ ಶಕ್ತಿ ಹೊಂದಿರುವ ಅಥವಾ ಉಗುರುಗಳಲ್ಲಿ ಯಾವುದೇ ಗಾಯ ಅಥವಾ ಸೋಂಕನ್ನು ಹೊಂದಿರುವ ಜನರಲ್ಲಿ ಸೋಂಕನ್ನು ಉಂಟುಮಾಡಬಹುದು. ಸೋಂಕಿನ ಲಕ್ಷಣಗಳು ಉಗುರುಗಳ ಬಣ್ಣ, ಊತ, ನೋವು ಮತ್ತು ಕೀವು ಸ್ರವಿಸುವಿಕೆಯನ್ನು ಒಳಗೊಂಡಿರಬಹುದು.

ಉಗುರುಗಳನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಹೇಗೆ ?

– ದಿನಕ್ಕೆ ಎರಡು ಬಾರಿಯಾದರೂ ನಿಮ್ಮ ಕೈ ಮತ್ತು ಉಗುರುಗಳನ್ನು ಸೋಪು ಮತ್ತು ನೀರಿನಿಂದ ತೊಳೆಯಿರಿ.

– ಉಗುರುಗಳ ಕೆಳಗೆ ಕೊಳಕು ಸಂಗ್ರಹವಾಗದಂತೆ ತಡೆಯಲು ಮೃದುವಾದ ಬ್ರಷ್ ಬಳಸಿ.

– ಉದ್ದವಾದ ಉಗುರುಗಳನ್ನು ಇಟ್ಟುಕೊಳ್ಳುವುದನ್ನು ತಪ್ಪಿಸಿ. ಏಕೆಂದರೆ ಅವುಗಳಲ್ಲಿ ಕೊಳಕು ಮತ್ತು ಸೂಕ್ಷ್ಮಜೀವಿಗಳು ಹೆಚ್ಚು ಸುಲಭವಾಗಿ ಸಂಗ್ರಹಗೊಳ್ಳುತ್ತವೆ.

– ನಿಯಮಿತವಾಗಿ ಉಗುರುಗಳನ್ನು ಕತ್ತರಿಸಲು ಮತ್ತು ಉಗುರುಗಳನ್ನು ಟ್ರಿಮ್ ಮಾಡಲು ತೀಕ್ಷ್ಣವಾದ ಉಪಕರಣಗಳನ್ನು ಬಳಸಿ.

– ನೇಲ್ ಪೇಂಟ್ ಹಚ್ಚುವ ಮೊದಲು ಮತ್ತು ನಂತರ ನಿಮ್ಮ ಉಗುರುಗಳನ್ನು ಸ್ವಚ್ಛಗೊಳಿಸಿ.

– ಉಗುರುಗಳಲ್ಲಿ ಶಿಲೀಂಧ್ರಗಳ ಸೋಂಕು ಅಥವಾ ಯಾವುದೇ ಅಸಹಜತೆ ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.