ಕುತೂಹಲ ಮೂಡಿಸುತ್ತೆ 80ರ ಹರೆಯದ ವೃದ್ಧನ ವಿಶೇಷ ಸ್ನೇಹದ ಕತೆ..!

ಸ್ನೇಹಿತರು ಇಲ್ಲ ಅಂದರೆ ಜೀವನದಲ್ಲಿ ಮಜವೇ ಇರೋದಿಲ್ಲ. ಸಂತೋಷಕ್ಕೆ, ದುಃಖಕ್ಕೆ ಹೀಗೆ ನಮ್ಮ ಭಾವನೆಯನ್ನ ಹಂಚಿಕೊಳ್ಳೋಕೆ ಸ್ನೇಹಿತರು ಬೇಕೆ ಬೇಕು. ಅದೇ ರೀತಿ ಫ್ರೆಂಚ್​ 80 ವರ್ಷದ ವೃದ್ಧ ಕೂಡ ವಿಶೇಷ ಸ್ನೇಹಿತನನ್ನ ಹೊಂದಿದ್ದು ಇದೇ ಕಾರಣಕ್ಕೆ ಸೋಶಿಯಲ್​ ಮೀಡಿಯಾದಲ್ಲಿ ಸದ್ದು ಮಾಡ್ತಿದ್ದಾರೆ.

ಫ್ರೆಂಚ್​ ವಾಯುವ್ಯ ಪ್ರದೇಶದ ಬ್ರಿಟಾನಿಯಿಂದ ನಿವೃತ್ತರಾದ ಬೌಗೆಟ್​ ಹಕ್ಕಿ ಮರಿಯೊಂದಿಗೆ ಸ್ನೇಹ ಬೆಳೆಸಿದ್ದರು. ಇವರಿಬ್ಬರ ಸ್ನೇಹ ಇದೀಗ ಎಷ್ಟರ ಮಟ್ಟಿಗೆ ಗಾಢವಾಗಿದೆ ಎಂದರೆ ಬೌಗೆಟ್​ ಸೈಕಲ್​ನಲ್ಲಿ ಸವಾರಿ ಮಾಡುವಾಗ, ಹೊರಗಡೆ ಹೋಗುವಾಗ, ಉದ್ಯಾನದಲ್ಲಿ ನೀರು ಹಾಕುವಾಗ ಹೀಗೆ ಪ್ರತಿ ಕೆಲಸ ಮಾಡುವಾಗಲೂ ಪಾರಿವಾಳವನ್ನ ಹೆಗಲ ಮೇಲೆಯೇ ಕೂರಿಸಿಕೊಂಡಿರ್ತಾರೆ.

ಬೆಕ್ಕಿನಿಂದ ರಕ್ಷಿಸಿಕೊಳ್ಳಲು ಯತ್ನಿಸುತ್ತಿದ್ದ ಈ ಪುಟ್ಟ ಪಾರಿವಾಳ ಬೌಗೆಟ್​ನ ಕಣ್ಣಿಗೆ ಬಿದ್ದಿತ್ತು. ಅಲ್ಲಿಂದ ಶುರುವಾದ ಇವರ ಸ್ನೇಹ ಇದೀಗ ಒಬ್ಬರನ್ನ ಬಿಟ್ಟು ಇನ್ನೊಬ್ಬರಿಗೆ ಇರಲಾರದ ಮಟ್ಟಿಗೆ ಬೆಳೆದಿದೆ. ಇವರಿಬ್ಬರ ಸ್ನೇಹದ ಕತೆ ಇದೀಗ ಸೋಶಿಯಲ್​ ಮೀಡಿಯಾದಲ್ಲೂ ವೈರಲ್​ ಆಗಿದೆ.