ಪ್ರತಿನಿತ್ಯ ಮದ್ಯ ಸೇವನೆ ಮಾಡುವ ಅಭ್ಯಾಸವಿದೆಯೇ..? ಹಾಗಾದ್ರೆ ಈ ಸುದ್ದಿಯನ್ನೊಮ್ಮೆ ಓದಿ

ಪ್ರತಿನಿತ್ಯ ನಿಯಮಿತ ಪ್ರಮಾಣದಲ್ಲಿ ಮದ್ಯ ಸೇವನೆ ಮಾಡುವ ಜನರೂ ಸಹ ಅನಿಯಮಿತ ಹೃದಯಬಡಿತದ ಸಮಸ್ಯೆಯನ್ನ ಎದುರಿಸುತ್ತಾರೆ ಎಂದು ಹೊಸ ಅಧ್ಯಯನವೊಂದು ಹೇಳಿದೆ.

ಯುರೋಪಿನ್​ ಹಾರ್ಟ್​ ಜರ್ನಲ್​​ನಲ್ಲಿ ಪ್ರಕಟವಾದ ಅಧ್ಯಯನದಲ್ಲಿ, ಮದ್ಯಪಾನವನ್ನೇ ಮಾಡದ ವ್ಯಕ್ತಿಗೆ ಹೋಲಿಸಿದ್ರೆ ದಿನಕ್ಕೆ ಒಂದು ಬಾರಿ ಮದ್ಯಪಾನ ಸೇವನೆ ಮಾಡುವ ವ್ಯಕ್ತಿಯಲ್ಲಿ ಈ ಸಮಸ್ಯೆ ಶೇಕಡಾ 16ರಷ್ಟು ಹೆಚ್ಚಿರುತ್ತೆ ಎಂದು ಉಲ್ಲೇಖಿಸಲಾಗಿದೆ.

ಸುಮಾರು 1,07,845 ಜನರನ್ನೊಳಗೊಂಡ ಅಧ್ಯಯನದಲ್ಲಿ ಅವರ ವೈದ್ಯಕೀಯ ಇತಿಹಾಸ, ಜೀವನಶೈಲಿ, ಉದ್ಯೋಗ ಹಾಗೂ ಶಿಕ್ಷಣ ಮಟ್ಟ ಇವೆಲ್ಲವನ್ನ ಸಂಗ್ರಹಿಸಲಾಗಿತ್ತು. ಸುಮಾರು 14 ವರ್ಷಗಳ ಅಧ್ಯಯನದಲ್ಲಿ ಮೊದಲು ಹೃತ್ಕರ್ಣ ಕಂಪನದ ಸಮಸ್ಯೆ ಹೊಂದಿರದ ಈ ಎಲ್ಲಾ ಜನರಲ್ಲಿ 5854 ಮಂದಿ ಅನಿಯಮಿತ ಹೃದಯ ಕಂಪನವನ್ನ ಹೊಂದಿರೋದು ಕಂಡು ಬಂತು. ಹಾಗೂ ಇವರೆಲ್ಲ ದಿನಕ್ಕೆ ಒಂದು ಬಾರಿ ಮದ್ಯ ಸೇವನೆ ಮಾಡುವವರಾಗಿದ್ದರು.

ಇದು ವನ್​ ಪೆಗ್​ ಸೇವನೆ ಮಾಡುವವರ ಕತೆಯಾದ್ರೆ ದಿನಕ್ಕೆ 2 ಪೆಗ್​ ಸೇವನೆ ಮಾಡುವವರಿಗೆ ಈ ಅಪಾಯ 28 ಪ್ರತಿಶತದಷ್ಟು ಅಧಿಕ ಇದೆ. ಇದೇ ರೀತಿ ದಿನಕ್ಕೆ ಮೂರು ನಾಲ್ಕು ಪೆಗ್​ ಸೇವನೆ ಮಾಡುವವರಿಗೆ 48 ಪ್ರತಿಶತದವರೆಗೂ ಹೃತ್ಕರ್ಣ ಕಂಪನದ ಸಮಸ್ಯೆ ಅಧಿಕವಾಗುತ್ತಲೇ ಹೋಗುತ್ತದೆ ಎಂದು ಅಧ್ಯಯನ ಹೇಳಿದೆ.