ನವದೆಹಲಿ: ಭಾರತವು ವಿಭಜನೆಯ ಭೀಕರ ಸಂಸ್ಮರಣಾ ದಿನವನ್ನು ಆಚರಿಸುತ್ತಿರುವಾಗ, ಪ್ರಧಾನಿ ನರೇಂದ್ರ ಮೋದಿ ಅವರು ದೇಶ ವಿಭಜನೆಯ ಸಂದರ್ಭದಲ್ಲಿ ಕೋಮುಗಲಭೆಯಲ್ಲಿ ಪ್ರಾಣ ಕಳೆದುಕೊಂಡವರಿಗೆ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.
ದೇಶ ವಿಭಜನೆಯಿಂದ ನೊಂದವರು ತೋರಿದ ಸ್ಥೈರ್ಯ ಮತ್ತು ಧೈರ್ಯವನ್ನು ಅವರು ಶ್ಲಾಘಿಸಿದ್ದಾರೆ.
ಇಂದು, ವಿಭಜನೆಯ ಭೀಕರ ಸ್ಮರಣೆಯ ದಿನದಂದು, ವಿಭಜನೆಯ ಸಮಯದಲ್ಲಿ ಪ್ರಾಣ ಕಳೆದುಕೊಂಡ ಎಲ್ಲರಿಗೂ ನಾನು ಶ್ರದ್ಧಾಂಜಲಿ ಸಲ್ಲಿಸುತ್ತೇನೆ. ನಮ್ಮ ಇತಿಹಾಸದ ಆ ದುರಂತ ಅವಧಿಯಲ್ಲಿ ಅನುಭವಿಸಿದ ಎಲ್ಲರ ಧೈರ್ಯ ಮತ್ತು ದುಃಖವನ್ನು ಶ್ಲಾಘಿಸುತ್ತೇನೆ ಎಂದು ಪ್ರಧಾನಿ ಟ್ವೀಟ್ ಮಾಡಿದ್ದಾರೆ.
ಕಳೆದ ವರ್ಷದ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಪ್ರಧಾನಿ ಮೋದಿ ಅವರು ಆಗಸ್ಟ್ 14 ಅನ್ನು ವಿಭಜನೆಯ ಭಯಾನಕ ನೆನಪಿನ ದಿನ ಎಂದು ಘೋಷಿಸಿದ್ದರು.
ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಅವರು ಪಾಕಿಸ್ತಾನದ ರಚನೆಯ ನಂತರ ಲಕ್ಷಾಂತರ ಜನರು ನಿರಾಶ್ರಿತರಾಗಿ ವಿಭಜನೆಯ ಸಮಯದಲ್ಲಿ ಜನರು ಅನುಭವಿಸಿದ ನೋವನ್ನು ನೆನಪಿಸಿಕೊಂಡರು. ಇದನ್ನು ‘ಭಾರತೀಯ ಇತಿಹಾಸದ ಕರಾಳ ಕ್ಷಣಗಳಲ್ಲಿ’ ಒಂದು ಎಂದು ಕರೆದ ಶರ್ಮಾ, ವಿಭಜನೆಯು ಅಖಂಡ ಭಾರತ ಅಥವಾ ಅವಿಭಜಿತ ಭಾರತಕ್ಕೆ ಪ್ರಬಲವಾದ ಹೊಡೆತ ನೀಡಿದೆ ಎಂದು ಹೇಳಿದ್ದಾರೆ.
ಭಾರತೀಯ ಇತಿಹಾಸದ ಕರಾಳ ಕ್ಷಣಗಳಲ್ಲಿ ಒಂದಾದ ವಿಭಜನೆಯು ಲಕ್ಷಾಂತರ ದೇಶವಾಸಿಗಳ ಮೇಲೆ ವಿನಾಶವನ್ನುಂಟುಮಾಡಿತು. ಅಖಂಡ ಭಾರತಕ್ಕೆ ಪ್ರಬಲವಾದ ಹೊಡೆತ ನೀಡಿತು. ವಿಭಜನೆಯ ಭೀಕರ ಸ್ಮರಣೆ ದಿನದಂದು, ಬ್ರಿಟಿಷ್ ರಾಜ್ ಮತ್ತು ಹೊಸದಾಗಿ ರೂಪುಗೊಂಡ ಪಾಕಿಸ್ತಾನದ ದುಷ್ಟ ಕುತಂತ್ರಗಳಿಂದಾಗಿ ಜನರ ನೋವುಗಳನ್ನು ನಾನು ನೆನಪಿಸಿಕೊಳ್ಳುತ್ತೇನೆ ಎಂದು ಅವರು ಟ್ವೀಟ್ ನಲ್ಲಿ ತಿಳಿಸಿದ್ದಾರೆ.
ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ವಿಭಜನೆಯ ಸಂದರ್ಭದಲ್ಲಿ ಪ್ರಾಣ ಕಳೆದುಕೊಂಡವರಿಗೆ ಶ್ರದ್ಧಾಂಜಲಿ ಸಲ್ಲಿಸಿದ್ದು ಅವರ ಕುಟುಂಬಗಳಿಗೆ ಸಾಂತ್ವನ ಹೇಳಿದರು.
ಭಾರತದ ದುಃಖದ ವಿಭಜನೆಯ ಸಮಯದಲ್ಲಿ ವಿನಾಶಕಾರಿ ಧಾರ್ಮಿಕ ಮನಸ್ಥಿತಿಯಿಂದಾಗಿ ಲಕ್ಷಾಂತರ ಮುಗ್ಧ ನಾಗರಿಕರು ಪ್ರಾಣ ಕಳೆದುಕೊಂಡರು. ಕೋಟ್ಯಂತರ ನಾಗರಿಕರು ಅಮಾನವೀಯ ನೋವನ್ನು ಅನುಭವಿಸಿದರು ಎಂದು ಅವರು ಹಿಂದಿಯಲ್ಲಿ ಟ್ವಿಟರ್‌ ನಲ್ಲಿ ಬರೆದಿದ್ದಾರೆ.
Loading ...