ʼಒಮಿಕ್ರಾನ್ʼ ಕುರಿತ ಅಧ್ಯಯನದಲ್ಲಿ ಮಹತ್ವದ ಮಾಹಿತಿ ಬಹಿರಂಗ

ಒಮಿಕ್ರಾನ್ ರೂಪಾಂತರವು ಪ್ರಪಂಚದಾದ್ಯಂತ ಕೋವಿಡ್ ಸೋಂಕಿನ ಹೊಸ ಅಲೆಯನ್ನೇ ಎಬ್ಬಿಸಿದೆ. ಕಳೆದ ವರ್ಷ ನವೆಂಬರ್ ವೇಳೆಗೆ ದಕ್ಷಿಣ ಆಫ್ರಿಕಾದಲ್ಲಿ ಪತ್ತೆಯಾದ ಹೊಸ ರೂಪಾಂತರ ವೇಗವಾಗಿ ವಿಶ್ವದೆಲ್ಲೆಡೆ ಹರಡಿದೆ. ಭಾರತದಲ್ಲೂ ಒಮಿಕ್ರಾನ್ ಪರಿಣಾಮ‌ ಹೆಚ್ಚಾಗಿದೆ. ಒಮಿಕ್ರಾನ್ ವೇಗ ನೋಡಿ ಬೆಚ್ಚಿರುವ ತಜ್ಞರು, ಈ ರೂಪಾಂತರವನ್ನು ಉತ್ತಮವಾಗಿ ಅರ್ಥಮಾಡಿಕೊಳ್ಳಲು ಅಧ್ಯಯನಗಳನ್ನು ನಡೆಸುತ್ತಿದ್ದಾರೆ.

ದಕ್ಷಿಣ ಆಫ್ರಿಕಾದ ಎರಡು ಕ್ಲಿನಿಕಲ್ ಪ್ರಯೋಗಗಳ ಪ್ರಾಥಮಿಕ ಸಂಶೋಧನೆಗಳು ಈ ರೂಪಾಂತರವು ಹಿಂದಿನ ರೂಪಾಂತರಗಳಿಗಿಂತ ಹೆಚ್ಚಿನ ಲಕ್ಷಣರಹಿತ ವಾಹಕವನ್ನು ಹೊಂದಿದೆ ಎಂದು ಸೂಚಿಸುತ್ತದೆ. ಮೊದಲನೇ ಅಧ್ಯಯನಕ್ಕಿಂತ ಎರಡನೇ ಅಧ್ಯಯನದಲ್ಲಿ, ಹೆಚ್ಚಿನ ಪ್ರಮಾಣದಲ್ಲಿ ಲಕ್ಷಣರಹಿತ ವಾಹಕಗಳು ಕಂಡುಬಂದಿವೆ. ದಕ್ಷಿಣ ಆಫ್ರಿಕಾದಲ್ಲಿ ಓಮಿಕ್ರಾನ್ ಸೋಂಕುಗಳು ಹೆಚ್ಚಾಗುತ್ತಿರುವಾಗ ನಡೆಸಲಾದ ಅಧ್ಯಯನದಲ್ಲಿ ಒಮಿಕ್ರಾನ್ ಲಕ್ಷಣಗಳು ತಿಳಿದವಾದರೂ ಅದೇ ಸಮಯದಲ್ಲಿ ಅಧ್ಯಯನದಲ್ಲಿ ಭಾಗವಹಿಸಿದ್ದವರನ್ನ ಮರುಮಾದರಿ ಮಾಡಿ ಪರೀಕ್ಷಿಸಿದ ಮತ್ತೊಂದು ಅಧ್ಯಯನದಲ್ಲಿ ಹೆಚ್ಚಿನ ಸಂಖ್ಯೆಯ ಜನರಲ್ಲಿ ಒಮಿಕ್ರಾನ್ ಪತ್ತೆಯಾದರೂ, ಲಕ್ಷಣರಹಿತರಾಗಿದ್ದರು ಎಂದು ತಿಳಿದು ಬಂದಿದೆ.

ಮೊದಲ ಅಧ್ಯಯನದ ಫಲಿತಾಂಶಗಳು

ಉಬುಂಟು ಅಧ್ಯಯನದಲ್ಲಿ, ಭಾಗವಹಿಸಿ ಸ್ಕ್ರೀನಿಂಗ್‌ಗೆ ಒಳಪಟ್ಟಿದ್ದ 230 ಜನರಲ್ಲಿ 31% ರಷ್ಟು ಜನರು ಕೋವಿಡ್ ಪಾಸಿಟಿವ್ ಆಗಿದ್ದರು. ಅದರಲ್ಲಿ 56 ಜನರಿಗೆ ಜಿನೋಮ್ ಸೀಕ್ವೆನ್ಸಿಂಗ್ ನಂತರ ಒಮಿಕ್ರಾನ್ ದೃಢಪಟ್ಟಿತ್ತು. ಅಂದರೆ ಒಮಿಕ್ರಾನ್ ಪತ್ತೆಯಾದ ಶುರುವಿನಲ್ಲಿ ಪಾಸಿಟಿವಿಟಿ ದರ ಕಡಿಮೆಯಿತ್ತು. ಅಂಕಿ ಅಂಶಗಳಲ್ಲಿ ಹೇಳುವುದಾದರೆ 1% ರಿಂದ 2.4% ಇತ್ತು. ಜೊತೆಗೆ ಗೋಚರ ಲಕ್ಷಣಗಳು ಇದ್ದವು ಎಂದು ತಜ್ಞರು ಹೇಳಿದ್ದಾರೆ.

ಎರಡನೇ ಅಧ್ಯಯನದ ಫಲಿತಾಂಶಗಳು

ಸಿಸೊಂಕೆಯ ಉಪ-ಅಧ್ಯಯನದಲ್ಲಿ, ಲಕ್ಷಣರಹಿತ ಒಮಿಕ್ರಾನ್ ಸೋಂಕಿತರ ಸಂಖ್ಯೆ ಏಕಾಏಕಿ 16% ಏರಿತು. ಲಸಿಕೆ ಹಾಕಿದವರಲ್ಲಿಯೂ ಸಹ ಹೆಚ್ಚಿನ ಲಕ್ಷಣ ರಹಿತ ವಾಹಕ ದರವನ್ನು ಗುರುತಿಸಲಾಯಿತು ಎಂದು ಅಧ್ಯಯನದ ಫಲಿತಾಂಶ ಸೂಚಿಸುತ್ತವೆ ಎಂದು ದಕ್ಷಿಣ ಆಫ್ರಿಕಾದ ವೈದ್ಯಕೀಯ ಸಂಶೋಧನಾ ಮಂಡಳಿಯು ಪ್ರಕಟಣೆಯಲ್ಲಿ ತಿಳಿಸಿದೆ.