ಲಾಟರಿ ಮೂಲಕ ಒಲಿದ ಅದೃಷ್ಟ….! ಬರೋಬ್ಬರಿ 16 ಕೋಟಿ ರೂ. ಮೌಲ್ಯದ ಚಿಕಿತ್ಸೆಗೆ ಒಳಗಾದ ಹಸುಗೂಸು

ಹುಟ್ಟಿನಿಂದಲೇ ಸ್ನಾಯು ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿದ್ದ ಫಾತಿಮಾ ಎಂಬ 14 ತಿಂಗಳ ಹಸುಗೂಸು ಬರೋಬ್ಬರಿ 16 ಕೋಟಿ ರೂಪಾಯಿ ಮೌಲ್ಯದ ಜೀನ್​ ಥೆರಪಿಗೆ ಒಳಗಾಗಿದೆ.

ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನ ಮೊಹಮ್ಮದ್​ ಬಾಸಿಲ್​ ಹಾಗೂ ಖಾದಿಜಾ ದಂಪತಿಯ ಪುತ್ರಿ ಫಾತಿಮಾ ಈ ದುಬಾರಿ ಚಿಕಿತ್ಸೆಗೆ ಒಳಗಾಗಿದ್ದಾಳೆ.

ಬೆಂಗಳೂರು ಬ್ಯಾಪ್ಟಿಸ್ಟ್​ ಆಸ್ಪತ್ರೆಯಲ್ಲಿ ಫಾತಿಮಾ ಜೀನ್​ ಥೆರಪಿಗೆ ಒಳಗಾಗಿದ್ದಾಳೆ. ನೋವಾರ್ಟೀಸ್​ ಎಂಬ ಹೆಸರಿನ ಬಹುರಾಷ್ಟ್ರೀಯ ಔಷಧಿ ಕಂಪನಿ ನೀಡಿದ ಲಾಟರಿಯಲ್ಲಿ ಫಾತಿಮಾ ಆಯ್ಕೆಯಾಗಿದ್ದಳು, ಈ ಹಣದಿಂದ ಫಾತಿಮಾಗೆ ಈ ವಿಶೇಷ ಜೀನ್​ ಚಿಕಿತ್ಸೆ ನಡೆಸಲಾಗಿದೆ.

ಈ ಮೆಡಿಸಿನ್​ಗಳಿಗೆ 2.1 ಮಿಲಿಯನ್ ಡಾಲರ್​​ ಅಂದರೆ ಸರಿ ಸುಮಾರು 16 ಕೋಟಿ ಖರ್ಚು ಆಗಿದೆ ಎಂದು ಆಸ್ಪತ್ರೆಯ ಸಿಇಓ ನವೀತ್​ ಥೋಮಸ್​ ಹೇಳಿದ್ದಾರೆ.
ಈ ಚಿಕಿತ್ಸೆಗೆ ಫಾತಿಮಾ ಉತ್ತಮವಾಗಿ ಸ್ಪಂದಿಸಿದ್ದಾಳೆ. ಚಿಕಿತ್ಸೆ ಬಳಿಕ ಫಾತಿಮಾ ಕಾಲಿಗೆ ಸ್ವಾಧೀನ ಬಂದಿದೆ. ಆಕೆ ಸಾಮಾನ್ಯ ಮಕ್ಕಳಂತೆ ಆಗಲು ಸ್ವಲ್ಪ ಸಮಯ ಹಿಡಿಯುತ್ತದೆ ಎಂದು ಫಾತಿಮಾ ತಂದೆ ಹೇಳಿದ್ದಾರೆ.

ಫಾತಿಮಾಗೆ ಮೆದುಳಿನ ಸ್ನಾಯುಗೆ ವಿದ್ಯುತ್​ ಸಂಕೇತಗಳನ್ನ ರವಾನಿಸುವ ನರಕೋಶಗಳ ನಷ್ಟದಿಂದ ಸ್ಪೈನಲ್​ ಮಸ್ಕುಲಾರ್​ ಅಟ್ರೋಫಿ ಅಥವಾ ಎಸ್​ಎಂಎ ಎಂಬ ಕಾಯಿಲೆಯಿಂದ ಬಳಲುತ್ತಿದ್ದಳು ಎನ್ನಲಾಗಿದೆ.