ಕಪಿಲ್‌ ಬಳಿಕ ಈಗ ʼಟೀಂ ಇಂಡಿಯಾʼ ಮುನ್ನಡೆಸಲಿದ್ದಾರೆ ಮತ್ತೊಬ್ಬ ವೇಗಿ

ಕೋವಿಡ್​ ಕಾರಣಕ್ಕೆ ರೋಹಿತ್​ ಶರ್ಮಾ ಇಂಗ್ಲೆಂಡ್​ ವಿರುದ್ಧದ 5 ನೇ ಟೆಸ್ಟ್​ನಿಂದ ಹೊರಗುಳಿಯುವಂತಾಗಿದೆ. ಇದೇ ವೇಳೆ ಭಾರತ ತಂಡದ ನಾಯಕ ಯಾರಾಗಬೇಕೆಂಬ ಚರ್ಚೆ ನಡೆದಾಗ ಜಸ್ಪ್ರೀತ್​ ಬುಮ್ರಾ ಹೆಸರು ಅಂತಿಮಗೊಂಡಿದೆ. ಪಂತ್​ ಅವರನ್ನು ಉಪನಾಯಕರನ್ನಾಗಿ ನೇಮಿಸಲಾಗಿದೆ.

ರೋಹಿತ್​ ಶರ್ಮಾ ಅನುಪಸ್ಥಿತಿಯಲ್ಲಿ ಇಂಗ್ಲೆಂಡ್​ ವಿರುದ್ಧದ ಮರು ನಿಗದಿಪಡಿಸಲಾದ ಐದನೇ ಟೆಸ್ಟ್​ಗೆ ಬೂಮ್ರಾ ಅವರನ್ನು ಭಾರತ ತಂಡದ ನಾಯಕರನ್ನಾಗಿ ನೇಮಿಸಲಾಗಿದೆ ಎಂದು ಬಿಸಿಸಿಐ ಆಯ್ಕೆ ಸಮಿತಿ ಶುಕ್ರವಾರ ಪ್ರಕಟಿಸಿದೆ.

ಕೋವಿಡ್​ ಪರೀಕ್ಷೆ ನಡೆಸಿದಾಗ ರೋಹಿತ್​ ಇನ್ನೂ ಚೇತರಿಸಿಕೊಳ್ಳಲು ವಿಫಲರಾಗಿದ್ದಾರೆ ಎಂದು ಬಿಸಿಸಿಐ ಹೇಳಿದೆ. ಕಳೆದ ವಾರ 4 ದಿನಗಳ ಅಭ್ಯಾಸ ಪಂದ್ಯದಲ್ಲಿ ರೋಹಿತ್​ ಭಾರತವನ್ನು ಮುನ್ನಡೆಸಿದ್ದರು. ಭಾರತದ ನಾಯಕ ಮೊದಲ ಇನ್ನಿಂಗ್ಸ್​ನಲ್ಲಿ ಬ್ಯಾಟಿಂಗ್​ ಮಾಡಿ 25 ರನ್​ ಗಳಿಸಿದರು, ಆದರೆ 2 ನೇ ಇನ್ನಿಂಗ್ಸ್​ನಲ್ಲಿ ಮೈದಾನಕ್ಕೆ ಇಳಿಯಲಿಲ್ಲ.

ಇನ್ನು ತಮ್ಮನ್ನು ನಾಯಕ ಸ್ಥಾನಕ್ಕೆ ಆಯ್ಕೆ ಮಾಡಿದ್ದಕ್ಕೆ ಬೂಮ್ರಾ ಖುಷಿಪಟ್ಟಿದ್ದಾರೆ. “ಇದು ಬಹಳ ದೊಡ್ಡ ಗೌರವ. ಇದು ಬಹಳ ದೊಡ್ಡ ಸಾಧನೆ’ ಎಂದು ಹೇಳಿದರು. “ನಾವು ಬೆಳಿಗ್ಗೆ ಪರೀಕ್ಷೆ ಮಾಡಿದ್ದು, ರೋಹಿತ್​ಗೆ ಇನ್ನೂ ಪಾಸಿಟಿವ್​ ಇರುವುದರಿಂದ ನಾನು ತಂಡವನ್ನು ಮುನ್ನಡೆಸಲಿದ್ದೇನೆ ಎಂದು ನನಗೆ ಅಧಿಕೃತವಾಗಿ ತಿಳಿಸಲಾಯಿತು’ ಎಂದರು.

1987ರಲ್ಲಿ ಕಪಿಲ್​ ದೇವ್​ ಭಾರತವನ್ನು ಟೆಸ್ಟ್​ನಲ್ಲಿ ಮುನ್ನಡೆಸಿದ ನಂತರ ಬುಮ್ರಾ ಮೊದಲ ವೇಗಿಯಾಗಿದ್ದಾರೆ. ಈ ವರ್ಷದ ಆರಂಭದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಸೀಮಿತ ಓವರ್​ಗಳ ಸರಣಿಗೆ ಇವರನ್ನು ತಂಡದ ಉಪನಾಯಕನಾಗಿ ನೇಮಿಸಲಾಯಿತು.

2018 ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಪದಾರ್ಪಣೆ ಮಾಡಿದ ನಂತರ ಬುಮ್ರಾ ತಮ್ಮ ವೃತ್ತೀಜಿವನದಲ್ಲಿ ಇಲ್ಲಿಯವರೆಗೆ 29 ಟೆಸ್ಟ್​ ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದು 123 ವಿಕೆಟ್​ ಪಡೆದಿದ್ದಾರೆ.