ಇಲ್ಲಿದೆ ಐಪಿಎಲ್​ ಆವೃತ್ತಿಯ ಅಳಿಸಲಾಗದ ದಾಖಲೆಗಳ ವಿವರ

ಭಾನುವಾರದಿಂದ ಆರಂಭಗೊಳ್ಳಲಿರುವ ಎರಡನೇ ಹಂತದ ಐಪಿಎಲ್​ ಪಂದ್ಯಾವಳಿ ಅಭಿಮಾನಿಗಳಲ್ಲಿ ಹೊಸ ಕ್ರೇಜ್​ನ್ನು ಹುಟ್ಟುಹಾಕಿದೆ. ಹಾಲಿ ಚಾಂಪಿಯನ್​ ಮುಂಬೈ ಇಂಡಿಯನ್ಸ್​ ತಂಡ ದುಬೈ ಅಂತಾರಾಷ್ಟ್ರೀಯ ಮೈದಾನದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಜೊತೆ ಸೆಣೆಸಲಿದೆ.

ಮೊದಲ ಲೀಗ್​ನ ಪ್ರಕಾರ ಶಿಖರ್​ ಧವನ್​ ಹಾಗೂ ಹರ್ಷಲ್​ ಪಟೇಲ್​ ಕೇಸರಿ ಹಾಗೂ ನೇರಳೆ ಬಣ್ಣದ ಕ್ಯಾಪ್​ನ್ನು ಹೊಂದಿದ್ದರು. ಅಲ್ಲದೇ ಮೊದಲ ಲೀಗ್​ನಲ್ಲಿ ಆರ್​ಸಿಬಿ ನಾಯಕ ವಿರಾಟ್​ ಕೊಹ್ಲಿ ಐಪಿಎಲ್​ ಇತಿಹಾಸದಲ್ಲಿಯೇ 6000 ರನ್​ ಸೇರಿಸಿದ ವಿಶ್ವದ ಮೊದಲ ಆಟಗಾರ ಎಂಬ ಖ್ಯಾತಿಗೂ ಪಾತ್ರರಾಗಿದ್ದರು.

ಈ ದಾಖಲೆಗಳನ್ನ ಸರಿಗಟ್ಟಲು ಅನೇಕ ಅವಕಾಶಗಳು ಆಟಗಾರರಿಗೆ ಸಿಗಬಹುದು. ಆದರೆ ಐಪಿಎಲ್​ನಲ್ಲಿ ನಿರ್ಮಾಣವಾದ ಕೆಲ ದಾಖಲೆಗಳು ಮಾತ್ರ ಮತ್ತೊಮ್ಮೆ ನೋಡುವ ಅವಕಾಶ ಸಿಗುತ್ತದೆಯೋ ಇಲ್ಲವೋ ಎಂಬ ರೀತಿಯಲ್ಲಿದೆ. ಹಾಗಾದರೆ ಆ ವಿಶೇಷ ದಾಖಲೆಗಳು ಯಾವುದು ಅನ್ನೋದನ್ನ ನೋಡೋಣ :

1. ಒಂದೇ ಸೀಸನ್​ನಲ್ಲಿ 973 ರನ್​ ಬಾರಿಸಿದ ವಿರಾಟ್​ ಕೊಹ್ಲಿ

ಆರ್ಸಿಬಿ ತಂಡದ ನಾಯಕ ವಿರಾಟ್​ ಕೊಹ್ಲಿ 2016ರ ಆವೃತ್ತಿಯಲ್ಲಿ ಬ್ಯಾಟಿಂಗ್​ ವಿಭಾಗದಲ್ಲಿ ಶ್ರೇಷ್ಠ ಸಾಧನೆಯನ್ನೇ ಮಾಡಿದ್ದಾರೆ. ಐಪಿಎಲ್​ನ ಈ ಒಂದೇ ಸೀಸನ್​ನಲ್ಲಿ ರನ್​ ಮಷಿನ್​ ಕೊಹ್ಲಿ 973 ರನ್​ಗಳನ್ನು ಸಿಡಿಸಿದ್ದಾರೆ. ನಾಲ್ಕು ಶತಕಗಳನ್ನು ಬಾರಿಸಿದ ವಿರಾಟ್​ ಕೊಹ್ಲಿ ಇದೇ ಸೀಸನ್​ನಲ್ಲಿ ಆರ್​ಸಿಬಿ ತಂಡವನ್ನು ಫೈನಲ್​​ವರೆಗೆ ಕೊಂಡೊಯ್ದಿದ್ದರು.

2. 2013ರ ಆವೃತ್ತಿಯಲ್ಲಿ ಗೇಲ್​ ​ 175 ರನ್​​ ನಾಟ್​ಔಟ್​

2013ರ ಆವೃತ್ತಿಯಲ್ಲಿ ಪುಣೆ ವಾರಿಯರ್ಸ್​ ಬೌಲರ್​ಗಳ ಪಾಲಿಗೆ ದುಃಸ್ವಪ್ನದಂತೆ ವರ್ತಿಸಿದ್ದ ಕ್ರಿಸ್​ ಗೇಲ್​​ ಒಂದೇ ಮ್ಯಾಚ್​ನಲ್ಲಿ 175 ರನ್​ ಸಿಡಿಸಿ ನಾಟ್ ​ಔಟ್​ ಆಗಿ ಉಳಿದಿದ್ದರು. ಆರ್​ಸಿಬಿ ತಂಡದ ಮಾಜಿ ಆರಂಭಿಕ ಆಟಗಾರ ಗೇಲ್​ ಐಪಿಎಲ್​ ಟಿ 20 ಒಂದು ಪಂದ್ಯದಲ್ಲಿ ಅತೀ ಹೆಚ್ಚು ವೈಯಕ್ತಿಕ ರನ್​ ಗಳಿಸಿದ ದಾಖಲೆ ಹೊಂದಿದ್ದಾರೆ. ಅಂದಹಾಗೆ ಅವರು 66 ಬಾಲ್ ​ಗಳಲ್ಲಿ 175 ರನ್​ ಸಿಡಿಸಿದ್ದರು.

3. ಯುವರಾಜ್​ ಸಿಂಗ್​​ ಅವಳಿ ಹ್ಯಾಟ್ರಿಕ್​ ಸಾಧನೆ

ಲೆಜೆಂಡರಿ ಆಲ್​ರೌಂಡರ್​ ಯುವರಾಜ್​ ಸಿಂಗ್​​ 2007ರ ವಿಶ್ವಕಪ್​​ನಲ್ಲಿ ಒಂದೇ ಓವರ್​ನಲ್ಲಿ ಆರು ಸಿಕ್ಸರ್​ ಬಾರಿಸಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದರು. ಅದೇ ರೀತಿ ಐಪಿಎಲ್​ನಲ್ಲೂ ಒಂದೇ ಆವೃತ್ತಿಯಲ್ಲಿ ಅವಳಿ ಹ್ಯಾಟ್ರಿಕ್​ ಸಾಧನೆ ಮಾಡಿದ ಏಕೈಕ ಆಟಗಾರ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. 2009ರ ಆವೃತ್ತಿಯಲ್ಲಿ ಯುವರಾಜ್​ ಸಿಂಗ್​ ಆರ್​ಸಿಬಿ ಹಾಗೂ ಡೆಕ್ಕನ್​ ಚಾರ್ಜಸ್​​ ವಿರುದ್ಧ ಹ್ಯಾಟ್ರಿಕ್​ ಸಾಧನೆ ಮಾಡಿದ್ದಾರೆ.