ಒಟ್ಟಾವಾ: ಕೆನಡಾದ ಟಿವಿ ವರದಿಗಾರ್ತಿಯೊಬ್ಬಳು ವರದಿ ಮಾಡುವ ಸಮಯದಲ್ಲಿ ಸ್ಪಿಂಕ್ಲರ್ ನೀರಿನಿಂದ ತೊಯ್ದಳು. ಆಕೆಯ ತಕ್ಷಣದ ಪ್ರತಿಕ್ರಿಯೆ ವಿಡಿಯೋದಲ್ಲಿ ದಾಖಲಾಗಿದ್ದು, ಆ ಕ್ಲಿಪ್ ಜಾಲತಾಣದಲ್ಲಿ ಭಾರಿ ವೈರಲ್ ಆಗಿದೆ.
ಗ್ಲೋಬಲ್ ನ್ಯೂಸ್ ವರದಿಗಾರ್ತಿ ಶೆಲ್ಲಿ ಸ್ಟೀವ್ಸ್ ಅವರು ಕೃಷಿಯಲ್ಲಿ ಸ್ಪಿಂಕ್ಲರ್ ಅಂತರದ ಬಗ್ಗೆ ಹೊಲದಲ್ಲಿ ನಿಂತು ಲೈವ್ ವರದಿ ಮಾಡುತ್ತಿದ್ದರು. ಸ್ಪಿಕ್ಲರ್ ಹೊಲಕ್ಕೆ ನೀರು ಚಿಮುಕಿಸುತ್ತ ಸುತ್ತು ಹೊಡೆದು ಬಂದು ಸ್ಟೀವ್ಸ್ ಅವರನ್ನು ಒದ್ದೆ ಮಾಡಿತು. ಇದರ ವಿಡಿಯೋವನ್ನು ಗ್ಲೋಬಲ್ ನ್ಯೂಸ್ ಸ್ವತಃ ತನ್ನ ಫೇಸ್ ಬುಕ್ ಖಾತೆಯಲ್ಲಿ ಅಪ್ಲೋಡ್ ಮಾಡಿದೆ. “ತಾವು ವರದಿ ಮಾಡುವಾಗ ಸುತ್ತಲಿನ ಆಗುಹೋಗುಗಳ ಬಗ್ಗೆ ಎಚ್ಚರವಾಗಿರಬೇಕು ಎಂದು ಬ್ರುನ್ ಸ್ವಿಕ್ ನ ಶೆಲ್ಲಿ ಸ್ಟೀವ್ಸ್ ಅವರಿಗೆ ಗ್ಲೋಬಲ್ ನ್ಯೂಸ್ ಜ್ಞಾಪಿಸುತ್ತದೆ” ಎಂದು ಕ್ಯಾಪ್ಶನ್ ನೀಡಲಾಗಿದೆ.
ವಿಡಿಯೋಕ್ಕೆ ಹಲವು ಪ್ರತಿಕ್ರಿಯೆಗಳು ಬಂದಿವೆ. ಒಬ್ಬರು “ಅದು ಬರೀ ನೀರು ಮಾರಾಯ್ತಿ ಗೊಬ್ಬರವಲ್ಲ” ಎಂದಿದ್ದಾರೆ. ಇನ್ನೊಬ್ಬರು, “ವಿಡಿಯೋಗ್ರಾಫರ್ ಗೆ ಆಕೆಯ ಮೇಲೆ ಸಿಟ್ಟಿರಬೇಕು, ಸ್ಪಿಂಕ್ಲರ್ ಆಕೆಯ ಮೇಲೆ ನೀರೆರಚುವವರೆಗೂ ಎಚ್ಚರಿಸದೇ ಕಾಯುತ್ತಿದ್ದ” ಎಂದಿದ್ದಾರೆ. ಮತ್ತೊಬ್ಬರು “ಆಕೆಯ ಪ್ರತಿಕ್ರಿಯೆ ಅತೀ ಹೆಚ್ಚು ಹಾಸ್ಯಾಸ್ಪದವಾಗಿದೆ” ಎಂದಿದ್ದಾರೆ.
Loading ...