ಕಾಡುಗಳ್ಳರ ವಿರುದ್ಧ ಸಾಕ್ಷ್ಯ ಸಂಗ್ರಹಿಸುವ ಸಲುವಾಗಿ ಅತ್ಯಂತ ವೇಗವಾಗಿ ಬೈಕ್ ಚಲಾಯಿಸಿ ಕಾಡುಗಳ್ಳರನ್ನ ಬೆನ್ನಟ್ಟಿದ ಅರಣ್ಯ ಸಿಬ್ಬಂದಿ ತಮ್ಮ ಸಾವಿನ ದೃಶ್ಯವನ್ನ ತಾವೇ ಮೊಬೈಲ್ನಲ್ಲಿ ಚಿತ್ರೀಕರಿಸಿಕೊಂಡ ದುರಂತ ಘಟನೆ ಮಧ್ಯ ಪ್ರದೇಶದ ದೇವಾಸ್ ಜಿಲ್ಲೆಯಲ್ಲಿ ನಡೆದಿದೆ.
58 ವರ್ಷದ ಸಾಹಸಿ ಅರಣ್ಯ ಸಿಬ್ಬಂದಿ ಮದನ್ ಲಾಲ್ ವರ್ಮಾ, ಮರಗಳ್ಳರು ಬಂದೂಕನ್ನ ಹೊರ ತೆಗೆಯುತ್ತಿರೋದನ್ನ ನೋಡಿ ಸಾಕ್ಷ್ಯಕ್ಕಾಗಿ ಮೊಬೈಲ್ ಕ್ಯಾಮರಾದಲ್ಲಿ ಚಿತ್ರೀಕರಣ ಆರಂಭಿಸಿದ್ದರು. 66 ಸೆಕೆಂಡ್ನ ವಿಡಿಯೋದಲ್ಲಿ ಅಪರಿಚಿತ ಧ್ವನಿಯೊಂದು ಗೋಲಿ ಚಲಾ ಗೋಲಿ ಚಲಾ ಎಂದು ಹೇಳೋದನ್ನ ಕೇಳಬಹುದಾಗಿದೆ.
ಇದಾದ ಕೆಲವೇ ಕ್ಷಣಗಳಲ್ಲಿ ಗುಂಡೇಟು ಕೇಳಿ ಬರುತ್ತದೆ. ಕ್ಯಾಮರಾ ಮದನ್ ಲಾಲ್ ಕೈಯಿಂದ ಜಾರಿ ಬೀಳುವವರೆಗೂ ಅವರ ಸಾವಿನ ಅಂತಿಮ ಕ್ಷಣಗಳನ್ನ ಚಿತ್ರೀಕರಿಸಿದೆ.
ರತ್ನಪುರದ ಬೀಟ್ ಗಾರ್ಡ್ ಆಗಿದ್ದ ವರ್ಮಾ ಶಂಕಿತರ ಕೈಯಲ್ಲಿ ಆಯುಧಗಳಿರೋದು ಗೊತ್ತಿದ್ದರೂ ಸಹ ಧೈರ್ಯದಿಂದ ಮುನ್ನುಗ್ಗಿ ಸಾಹಸ ತೋರಿದ್ದಾರೆ ಎಂದು ದೇವಾಸ್ ಡಿಎಫ್ಒ ಎನ್. ಮಿಶ್ರಾ ಹೇಳಿದ್ದಾರೆ.
ವರ್ಮಾ ಕೆಲ ದಿನಗಳ ಹಿಂದಷ್ಟೇ ಮೊಮ್ಮಗು ಜನನದ ಬಳಿಕ ಅಜ್ಜನಾಗಿ ಬಡ್ತಿ ಪಡೆದಿದ್ದರು. ಕೇವಲ ಮೂರು ದಿನಗಳ ಹಿಂದಷ್ಟೇ ತವರೂರು ಉಜ್ಜಯಿನಿಯಿಂದ ಕರ್ತವ್ಯಕ್ಕೆ ಮರಳಿದ್ದರು ಎನ್ನಲಾಗಿದೆ.