70ಕ್ಕೂ ಅಧಿಕ ಜಾನುವಾರುಗಳು ಅನುಮಾನಾಸ್ಪದ ಸಾವು

ಹರಿಯಾಣದ ಪಂಚಕುಲ ಮಾನ್ಸಾ ದೇವಿ ದೇವಸ್ಥಾನದ ಸಮೀಪದಲ್ಲಿರುವ ಗೋಮಾಳದಲ್ಲಿದ್ದ 70ಕ್ಕೂ ಹೆಚ್ಚು ಹಸುಗಳು ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದು 30ಕ್ಕೂ ಹೆಚ್ಚು ಜಾನುವಾರುಗಳು ಅಸ್ವಸ್ಥಗೊಂಡಿವೆ.

ಪ್ರಕರಣ ಸಂಬಂಧ ಮಾತನಾಡಿದ ಪಶುಸಂಗೋಪನಾ ವಿಭಾಗದ ಉಪನಿರ್ದೇಶಕ ಡಾ. ಅನಿಲ್​ ಕುಮಾರ್​, ಪಶುಗಳು ಸೇವಿಸಿದ ಮೇವಿನ ಮಾದರಿ ಸಂಗ್ರಹಿಸಲಾಗಿದ್ದು ಪರೀಕ್ಷೆಗೆ ಕಳುಹಿಸಲಿದ್ದೇವೆ. ಅಸ್ವಸ್ಥಗೊಂಡ ಹಸುಗಳಿಗೆ ಚಿಕಿತ್ಸೆ ನೀಡಲಾಗ್ತಾ ಇದ್ದು ಜಾನುವಾರುಗಳು ಚೇತರಿಸಿಕೊಳ್ಳುತ್ತಿವೆ ಅಂತಾ ಹೇಳಿದ್ದಾರೆ.

ವಿದೇಶಗಳಲ್ಲಿ ಕೆಲ ರಾಸುಗಳು ಕೋವಿಡ್​ ಸೋಂಕಿಗೆ ತುತ್ತಾದ ಬಗ್ಗೆ ವರದಿಯಾಗಿತ್ತು. ಹೀಗಾಗಿ ಇಲ್ಲಿ ಮೃತಪಟ್ಟ ಹಸುಗಳಿಗೂ ಕೊರೊನಾ ಬಂದಿತ್ತಾ ಎಂಬ ಶಂಕೆ ವ್ಯಕ್ತವಾಗಿದೆ. ಆದರೆ ಪ್ರಾಥಮಿಕ ತನಿಖೆ ವೇಳೆ ಈ ಹಸುಗಳು ದಾನದ ರೂಪದಲ್ಲಿ ಬಂದಿದ್ದ ಹಾಳಾದ ಆಹಾರ ಸೇವಿಸಿದ್ದರಿಂದ ಈ ರೀತಿ ಸಾವನ್ನಪ್ಪಿವೆ ಅಂತಾ ಹೇಳಲಾಗಿದೆ. ಹಸುಗಳ ಮರಣೋತ್ತರ ಪರೀಕ್ಷೆ ನಡೆಸಲಾಗಿದ್ದು ನಾಳೆಯೊಳಗೆ ವರದಿ ಅಧಿಕಾರಿಗಳ ಕೈ ಸೇರಲಿದೆ.