ಡೆತ್ ನೋಟ್ ಬರೆದಿಟ್ಟು ವೃದ್ಧ ದಂಪತಿ ಆತ್ಮಹತ್ಯೆಗೆ ಶರಣಾದ ಘಟನೆಯು ದೆಹಲಿಯ ಕಲ್ಕಾಜಿ ಪ್ರದೇಶದಲ್ಲಿ ನಡೆದಿದೆ. ದಂಪತಿಯ ಪುತ್ರಿ ಅಂಕಿತಾ ಎಂಬವರು ಪೊಲೀಸರಿಗೆ ನೀಡಿದ ಮಾಹಿತಿ ಬಳಿಕ ಪ್ರಕರಣ ಬೆಳಕಿಗೆ ಬಂದಿದೆ.
ದಂಪತಿಯನ್ನು ನೋಡಿಕೊಳ್ತಿದ್ದ ಅಜಿತ್ ಎಂಬವರು ಪ್ರತಿ ದಿನದಂತೆ ಮಧ್ಯಾಹ್ನದ ವೇಳೆಗೆ ವೃದ್ಧ ದಂಪತಿ ವಾಸವಿದ್ದ ಮನೆಗೆ ತೆರಳಿದ್ದಾರೆ. ಅನೇಕ ಬಾರಿ ಡೋರ್ ಬೆಲ್ ಬಾರಿಸಿದರೂ ಯಾರೂ ಬಾಗಿಲು ತೆಗೆಯದ್ದನ್ನು ನೋಡಿ ಅಜಿತ್, ದಂಪತಿಯ ಪುತ್ರಿ ಅಂಕಿತಾಗೆ ಫೋನಾಯಿಸಿದ್ದರು.
ಅಂಕಿತಾ ಸ್ಥಳಕ್ಕೆ ಆಗಮಿಸಿದ ಬಳಿಕ ಇಬ್ಬರೂ ಸೇರಿ ಮನೆಯ ಬಾಗಿಲನ್ನು ಒಡೆದಿದ್ದಾರೆ. ಈ ವೇಳೆ ಅವರಿಗೆ ದಂಪತಿ ನೇಣು ಬಿಗಿದ ಸ್ಥಿತಿಯಲ್ಲಿ ಕಂಡಿದ್ದಾರೆ. ಮೃತ ರಾಕೇಶ್ ಕುಮಾರ್ ಜೈನ್ಗೆ 74 ವರ್ಷ ವಯಸ್ಸಾಗಿದ್ದರೆ ಉಷಾ ರಾಕೇಶ್ ಕುಮಾರ್ಗೆ 69 ವರ್ಷ ವಯಸ್ಸಾಗಿತ್ತು.
ವಿಷಯ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಆಗಮಿಸಿದ ಪೊಲೀಸರಿಗೆ ಟೇಬಲ್ ಮೇಲೆ ಡೆತ್ ನೋಟ್ ಸಿಕ್ಕಿದ್ದು, ಇದರಲ್ಲಿ ದಂಪತಿ ಆತ್ಮಹತ್ಯೆಗೆ ಕಾರಣವನ್ನು ತಿಳಿಸಿದ್ದಾರೆ.
ಅನಾರೋಗ್ಯದಿಂದ ಹಾಸಿಗೆ ಹಿಡಿದಿದ್ದ ಈ ದಂಪತಿ ತಮ್ಮ ಜೀವನದ ಬಗ್ಗೆ ಜಿಗುಪ್ಸೆ ಹೊಂದಿದ್ದರು. ಇದೇ ಕಾರಣಕ್ಕಾಗಿ ಅವರು ಈ ಕಠಿಣ ನಿರ್ಧಾರ ಕೈಗೊಂಡಿದ್ದರು ಎಂದು ಬರೆಯಲಾಗಿದೆ.
ಮೃತ ದಂಪತಿಯ ಮೃತದೇಹಗಳನ್ನು ಏಮ್ಸ್ ಶವಾಗಾರದಲ್ಲಿಟ್ಟು ಬಳಿಕ ಕುಟುಂಬಸ್ಥರಿಗೆ ನೀಡಲಾಗಿದೆ. ಈ ಪ್ರಕರಣದಲ್ಲಿ ಶಂಕೆ ಪಡುವಂತಹ ಯಾವುದೇ ವಿಚಾರಗಳು ಪೊಲೀಸರಿಗೆ ಪತ್ತೆಯಾಗಿಲ್ಲ.
Loading ...