ಕೊರೋನಾ ಬಗ್ಗೆ ಶಾಕಿಂಗ್ ಮಾಹಿತಿ ನೀಡಿದ WHO: ಪ್ರತಿ 44 ಸೆಕೆಂಡ್ ಗೆ ಒಬ್ಬನ ಕೊಲ್ಲುತ್ತೆ ಕೋವಿಡ್

ನವದೆಹಲಿ: ಕೊರೊನಾ ಕಡಿಮೆಯಾಗಿ ಸಾಮಾನ್ಯ ಸ್ಥಿತಿ ತಲುಪಿದ್ದು, ಪ್ರಕರಣಗಳ ಸಂಖ್ಯೆ ಇಳಿಮುಖವಾಗುತ್ತಿದ್ದಂತೆ ವಿಶ್ವ ಆರೋಗ್ಯ ಸಂಸ್ಥೆ(WHO) ಮಹತ್ವದ ಮಾಹಿತಿ ನೀಡಿದೆ. ಕೊರೋನಾ ಕಡಿಮೆಯಾಗಿದ್ದರೂ, ಜಾಗತಿಕವಾಗಿ ಇನ್ನೂ ಪ್ರತಿ 44 ಸೆಕೆಂಡುಗಳಿಗೆ ಒಬ್ಬರು ಕೋವಿಡ್ ನಿಂದ ಸಾಯುತ್ತಿದ್ದಾರೆ ಎಂದು ಎಚ್ಚರಿಸಿದೆ.

ಡಬ್ಲ್ಯು.ಹೆಚ್‌.ಒ. ಮಹಾನಿರ್ದೇಶಕ ಟೆಡ್ರೊಸ್ ಅಧಾನೊಮ್ ಘೆಬ್ರೆಯೆಸಸ್, ಈ ವೈರಸ್ ಮರೆಯಾಗುವುದಿಲ್ಲ. ದಾಖಲಾದ ಪ್ರಕರಣಗಳು ಮತ್ತು ಸಾವುಗಳಲ್ಲಿ ಜಾಗತಿಕ ಕುಸಿತವು ಮುಂದುವರಿಯುತ್ತಿದೆ. ಆದರೆ ಈ ಪ್ರವೃತ್ತಿಗಳು ಮುಂದುವರಿಯುತ್ತವೆ ಎಂಬುದಕ್ಕೆ ಯಾವುದೇ ಗ್ಯಾರಂಟಿ ಇಲ್ಲ. ಫೆಬ್ರವರಿಯಿಂದ ಸಾಪ್ತಾಹಿಕ ವರದಿಯಾದ ಸಾವುಗಳ ಸಂಖ್ಯೆಯು ಶೇಕಡ 80 ಕ್ಕಿಂತ ಕಡಿಮೆಯಿರಬಹುದು, ಆದರೆ ಕಳೆದ ವಾರ ಪ್ರತಿ 44 ಸೆಕೆಂಡುಗಳಿಗೆ ಒಬ್ಬ ವ್ಯಕ್ತಿಯು ಕೋವಿಡ್ -19 ನೊಂದಿಗೆ ಸಾವನ್ನಪ್ಪಿದ್ದಾನೆ ಎಂದು ಹೇಳಿದರು.

ಹೆಚ್ಚಿನ ಸಾವುಗಳು ತಪ್ಪಿಸಬಹುದಾದವು. ಸಾಂಕ್ರಾಮಿಕ ರೋಗವು ಕೊನೆಗೊಂಡಿಲ್ಲ ಎಂದು ನಾನು ಹೇಳುವುದನ್ನು ಕೇಳಲು ನೀವು ನಿರಾಕರಿಸಬಹುದು. ಆದರೆ, ಅದು ಇರುವವರೆಗೂ ನಾನು ಅದನ್ನು ಹೇಳುತ್ತಲೇ ಇರುತ್ತೇನೆ. ಈ ವೈರಸ್ ಕೊನೆಯಾಗುವುದಿಲ್ಲ ಎಂದು ಅವರು ಹೇಳಿದರು.

ಪರೀಕ್ಷೆ, ಕ್ಲಿನಿಕಲ್ ನಿರ್ವಹಣೆ, ವ್ಯಾಕ್ಸಿನೇಷನ್, ಸೋಂಕು ತಡೆಗಟ್ಟುವಿಕೆ ಮತ್ತು ನಿಯಂತ್ರಣ ಮೊದಲಾದವು ಕೊರೋನಾ ಪ್ರಸರಣ ಕಡಿಮೆ ಮಾಡಲು ಮತ್ತು ಜೀವಗಳನ್ನು ಉಳಿಸಲು ಎಲ್ಲಾ ಸರ್ಕಾರಗಳು ತೆಗೆದುಕೊಳ್ಳಬಹುದಾದ ಅಗತ್ಯ ಕ್ರಮಗಳಾಗಿವೆ ಎಂದು ಹೇಳಿದ್ದಾರೆ.