ಜಂಕ್ಫುಡ್ಗಳ ಮೇಲೆ ಈಗಾಗಲೇ ನಡೆಸಲಾದ ಸಾಕಷ್ಟು ಅಧ್ಯಯನದಲ್ಲಿ ಈ ರೀತಿಯ ಆಹಾರಗಳು ಆರೋಗ್ಯಕ್ಕೆ ಹಾನಿಕರ ಎಂಬ ವಿಚಾರ ಪದೇ ಪದೇ ಸಾಬೀತಾಗುತ್ತಲೇ ಇದೆ. ಪಿಜ್ಜಾ, ಬರ್ಗರ್ಗಳನ್ನು ಪ್ರತಿನಿತ್ಯ ಸೇವನೆ ಮಾಡುವುದರಿಂದ ಸ್ಥೂಲಕಾಯ ಸೇರಿದಂತೆ ನಾನಾ ಬಗೆಯ ಸಮಸ್ಯೆಗಳು ಶುರುವಾಗುತ್ತದೆ. ಇತ್ತೀಚಿಗೆ ನಡೆಸಿದ ಅಧ್ಯಯನವೊಂದರಲ್ಲಂತೂ ಈ ಜಂಕ್ಫುಡ್ಗಳು ಉಸಿರಾಟ ಹಾಗೂ ಮೆದುಳು ಸಂಬಂಧಿ ಸಮಸ್ಯೆಗಳನ್ನು ತಂದೊಡ್ಡಬಲ್ಲದು ಎಂಬ ಆಘಾತಕಾರಿ ಮಾಹಿತಿ ಹೊರಬಿದ್ದಿತ್ತು.
ವಾಷಿಂಗ್ಟನ್ ವಿಶ್ವವಿದ್ಯಾಲಯ, ಸೌತ್ವೆಸ್ಟ್ ರಿಸರ್ಚ್ ಇನ್ಸ್ಟಿಟ್ಯೂಟ್ , ಬೋಸ್ಟನ್ ಯುನಿವರ್ಸಿಟಿ ಹಾಗೂ ಹಾರ್ವಡ್ ಯೂನಿವರ್ಸಿಟಿ ನಡೆಸಿದ ಅಧ್ಯಯನವೊಂದರಲ್ಲಿ ಪ್ಲಾಸ್ಟಿಕ್ ಮೃದು ಮಾಡಲು ಬಳಸಲಾಗುವ ರಾಸಾಯನಿಕವಾದ ಥಾಲೇಟ್‌ಗಳು ಪ್ರಸಿದ್ಧ ಮೆಕ್ಡೊನಾಲ್ಡ್, ಪಿಜ್ಜಾ ಹಟ್, ಬರ್ಗರ್ ಕಿಂಗ್, ಡೊಮಿನೋಸ್, ಟ್ಯಾಕೋ ಬೆಲ್ ಆಹಾರಗಳಲ್ಲಿ ಕಂಡುಬಂದಿದೆ ಎಂಬ ಶಾಕಿಂಗ್ ಸತ್ಯ ಬಟಾಬಯಲಾಗಿದೆ.
ಈ ಜಂಕ್ ಫುಡ್ ಕಂಪನಿಗಳಿಂದ ಫ್ರೈಸ್, ಚಿಕನ್ ನಗೆಟ್ಸ್, ಚೀಸ್ ಪಿಜ್ಜಾ ಸೇರಿದಂತೆ ಸುಮಾರು 64 ವಿವಿಧ ಬಗೆಯ ಆಹಾರಗಳನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಇದರಲ್ಲಿ 80 ಪ್ರತಿಶತಕ್ಕೂ ಅಧಿಕ ಆಹಾರಗಳಲ್ಲಿ ಈ ಮಾರಣಾಂತಿಕ ರಾಸಾಯನಿಕ ಇರುವುದು ಪತ್ತೆಯಾಗಿದೆ.
ಥಾಲೆಟ್ ಎಂದರೇನು..?
ಥಾಲೆಟ್ನಂತಹ ರಾಸಾಯನಿಕಗಳನ್ನು ಕಾಸ್ಮೆಟಿಕ್ಸ್, ವಿನೈಲ್ ಫ್ಲೋರ್, ಡಿಟರ್ಜಂಟ್, ಮರುಬಳಕೆಯಾಗದ ಗ್ಲೋವ್ಸ್, ವೈರ್ನ ಕವರ್ಗಳಲ್ಲಿ ಬಳಕೆ ಮಾಡಲಾಗುತ್ತದೆ. ಈ ರಾಸಾಯನಿಕಗಳನ್ನು ಪ್ಲಾಸ್ಟಿಕ್ ಗಳನ್ನು ಮೃದುವಾಗಿಸಲು ಬಳಕೆ ಮಾಡಲಾಗುತ್ತದೆ.
ಈ ರಾಸಾಯನಿಕಗಳ ಸೇವನೆಯಿಂದ ಅಸ್ತಮಾ, ಮಕ್ಕಳಲ್ಲಿ ಮೆದುಳಿನ ದುರ್ಬಲತೆ ಹಾಗೂ ಸಂತಾನೋತ್ಪತ್ತಿ ದುರ್ಬಲತೆಯಂತಹ ಗಂಭೀರ ಸಮಸ್ಯೆಗಳು ಉಂಟಾಗುತ್ತದೆ.
ಚೀಸ್ ಬರ್ಗರ್ನಂತಹ ಆಹಾರದಲ್ಲಿ ಈ ರಾಸಾಯನಿಕ ಅತಿ ಹೆಚ್ಚು ಪ್ರಮಾಣದಲ್ಲಿ ಕಂಡು ಬಂದಿದ್ದರೆ ಚೀಸ್ ಪಿಜ್ಜಾದಲ್ಲಿ ಕಡಿಮೆ ಪ್ರಮಾಣದಲ್ಲಿ ಕಂಡು ಬಂದಿದೆ.
ಈ ಅಧ್ಯಯನದ ಸಂಬಂಧ ಎಫ್ಡಿಎ ಪ್ರತಿಕ್ರಿಯೆ ನೀಡಿದ್ದು ಅಧ್ಯಯನದ ಬಗ್ಗೆ ಸಮೀಕ್ಷೆ ನಡೆಸುವುದಾಗಿ ಹೇಳಿದೆ. ಎಫ್ಡಿಎ ಆಹಾರ ಸುರಕ್ಷತೆಯ ಬಗ್ಗೆ ಎಂದಿಗೂ ಕಾಳಜಿ ವಹಿಸುತ್ತದೆ. ಆದರೆ ಹೊಸ ಅಧ್ಯಯನವೊಂದರಲ್ಲಿ ಬಯಲಾದ ಮಾಹಿತಿಯು ಆಹಾರ ಸುರಕ್ಷತೆಯನ್ನು ಪ್ರಶ್ನಿಸುವಂತೆ ಮಾಡಿದೆ. ಹೀಗಾಗಿ ಈ ಬಗ್ಗೆ ಪರಿಶೀಲನೆ ನಡೆಯಲಿದೆ ಎಂದು ಎಫ್ಡಿಎ ವಕ್ತಾರ ಹೇಳಿದ್ದಾರೆ.
Loading ...