ವೇಗವಾಗಿ ಬೆಳೆಯುತ್ತಿರುವ ಕಿರಾಣಿ ವ್ಯಾಪಾರದ ಉದ್ಯಮವನ್ನು ಇನ್ನಷ್ಟು ವಿಸ್ತರಿಸಲು ಮುಂದಾಗಿರುವ ಅಮೆಜಾನ್ ಇಂಡಿಯಾ ದೇಶದಲ್ಲಿ ಎರಡನೇ ಹಂತದ ಅಂದರೆ ನಾನ್ ಮೆಟ್ರೋ ಪಟ್ಟಣಗಳ ಗ್ರಾಹಕರನ್ನು ಸೆಳೆಯಲು ಪ್ಲಾನ್ ರೂಪಿಸುತ್ತಿದೆ.
ಇ ಕಾಮರ್ಸ್ ದೈತ್ಯ ಅಮೆಜಾನ್ ಹೊಸ ಗ್ರಾಹಕರ ಸೇರ್ಪಡೆಯಲ್ಲಿ 20 ಪ್ರತಿಶತ ಏರಿಕೆಯನ್ನು ಕಂಡಿದೆ. ವಿಶೇಷವಾಗಿ 2 ಹಾಗೂ ಮೂರನೇ ಹಂತದ ಪಟ್ಟಣಗಳಲ್ಲಿ ಹೆಚ್ಚಿನ ಏರಿಕೆ ಕಂಡಿದೆ. 65 ಪ್ರತಿಶತ ಹೊಸ ಗ್ರಾಹಕರಲ್ಲಿ 85 ಪ್ರತಿಶತ ಇಂತಹ ಪಟ್ಟಣಗಳಿಗೆ ಸೇರಿದವರು ಎಂದು ತಿಳಿದುಬಂದಿದೆ.
ಅದರಲ್ಲೂ ವಿಶೇಷವಾಗಿ ಕಿರಾಣಿ ವಿಭಾಗದಲ್ಲಿ 60 ಪ್ರತಿಶತ ಗ್ರಾಹಕರು 2 ಹಾಗೂ 3ನೇ ವರ್ಗದ ಪಟ್ಟಣಕ್ಕೆ ಸೇರಿದವರೇ ಆಗಿದ್ದಾರೆ. ಫೆಬ್ರವರಿ ತಿಂಗಳಲ್ಲಿ 10 ನಗರಗಳಲ್ಲಿ ಅಮೆಜಾನ್ ಪ್ಯಾಂಟ್ರಿಯೊಂದಿಗೆ ಫ್ರೆಶ್ ಸೇವೆಯನ್ನೂ ಸಂಯೋಜಿಸಿ ಎಕ್ಸ್ಪ್ರೆಸ್ ವಿತರಣಾ ಮಳಿಗೆಗಳನ್ನು ಸ್ಥಾಪನೆ ಮಾಡಲಾಗಿತ್ತು. ಇದೀಗ ಅಮೆಜಾನ್ ಫ್ರೆಶ್ ಲಭ್ಯವಿಲ್ಲದ 290 ನಗರಗಳಲ್ಲಿ ಪ್ಯಾಂಟ್ರಿ ಸೇವೆ ಮುಂದುವರಿಯಲಿದೆ.
ಇನ್ನು ಈ ವಿಚಾರವಾಗಿ ಮಾತನಾಡಿದ ಅಮೆಜಾನ್ ಇಂಡಿಯಾದ ಉಪಾಧ್ಯಕ್ಷ ಮನಿಷ್ ತಿವಾರಿ, ಕಿರಾಣಿ ವಿಭಾಗದಲ್ಲಿ ದುಪ್ಪಟ್ಟು ಬೆಳವಣಿಗೆ ಕಂಡಿದೆ. ಇದೊಂದು ಸಣ್ಣ ಮಾರುಕಟ್ಟೆಯಾಗಿದ್ದರೂ ಈಗಾಗಲೇ ಗಮನಾರ್ಹ ಪ್ರಮಾಣದಲ್ಲಿ ಗ್ರಾಹಕರನ್ನು ಸೆಳೆಯುತ್ತಿದೆ ಹೀಗಾಗಿ ಮುಂದಿನ ದಿನಗಳಲ್ಲಿ ಇದು ಇನ್ನಷ್ಟು ಬೆಳವಣಿಗೆ ಕಾಣಲಿದೆ ಎಂದು ಹೇಳಿದ್ರು.
Loading ...