ಸಾಂಕ್ರಾಮಿಕ ಕೊರೋನಾ ವೈರಸ್ ನಂತರ ಇದೀಗ ಪೋಲಿಯೋ ಭೀತಿ ಎದುರಾಗಿದೆ. 30 ವರ್ಷಗಳ ನಂತರ ಮೊಜಾಂಬಿಕ್‌ನಲ್ಲಿ ಮೊದಲ ಪೋಲಿಯೊ ಪ್ರಕರಣ ದಾಖಲಾಗಿದೆ. ಇದು 1992 ರ ನಂತರದಿಂದ ಮೊಜಾಂಬಿಕ್‌ನಲ್ಲಿ ಕಾಣಿಸಿಕೊಂಡ ಮೊದಲ ಪ್ರಕರಣವಾಗಿದೆ.
ಈ ವರ್ಷದ ಆರಂಭದಲ್ಲಿ ಮಲಾವಿಯಲ್ಲಿ ಪ್ರಕರಣ ವರದಿಯಾದ ನಂತರ, ಈ ವರ್ಷ ದಕ್ಷಿಣ ಆಫ್ರಿಕಾದಲ್ಲಿ ಪೋಲಿಯೊ ವೈರಸ್‌ನ ಪತ್ತೆಯಾದ ಎರಡನೇ ಪ್ರಕರಣವಾಗಿದೆ. ಈ ವೈರಸ್ ಎಷ್ಟು ಅಪಾಯಕಾರಿ ಮತ್ತು ಎಷ್ಟು ಬೇಗನೆ ಹರಡಬಹುದು ಎಂಬ ಬಗ್ಗೆ ಇದೀಗ ಭೀತಿಯುಂಟಾಗಿದೆ.
ಆಫ್ರಿಕಾವನ್ನು 2020 ರಲ್ಲಿ ವೈಲ್ಡ್ ಪೋಲಿಯೊ ಮುಕ್ತ ಎಂದು ಘೋಷಿಸಲಾಗಿತ್ತು. ಇತ್ತೀಚಿನ ಪೋಲಿಯೊ ವೈರಸ್ ಟೈಪ್ 1 ಪ್ರಕರಣವು ಅಷ್ಟೊಂದು ಪರಿಣಾಮ ಬೀರುವುದಿಲ್ಲ ಎಂದು ಡಬ್ಲ್ಯೂಎಚ್ಒ ಹೇಳಿದೆ. ವೈಲ್ಡ್ ಪೋಲಿಯೊ ವೈರಸ್ ಈಗ ಅಫ್ಘಾನಿಸ್ತಾನ ಮತ್ತು ಪಾಕಿಸ್ತಾನದಲ್ಲಿ ಮಾತ್ರ ಸ್ಥಳೀಯವಾಗಿದೆ ಎನ್ನಲಾಗಿದೆ. ಮೊಜಾಂಬಿಕ್‌ನಲ್ಲಿನ ಪ್ರಕರಣವನ್ನು ಈಶಾನ್ಯ ಟೆಟೆ ಪ್ರಾಂತ್ಯದಲ್ಲಿ ಗುರುತಿಸಲಾಗಿದೆ. ಸೋಂಕಿತ ಮಗು ಮಾರ್ಚ್ ಅಂತ್ಯದಲ್ಲಿ ಪಾರ್ಶ್ವವಾಯುಗೆ ಗುರಿಯಾಯಿತು.
ಪೋಲಿಯೋ ಎಂದರೇನು?
ಪೋಲಿಯೊ ಅಥವಾ ಪೋಲಿಯೊಮೈಲಿಟಿಸ್ ಹೆಚ್ಚು ಸಾಂಕ್ರಾಮಿಕ ರೋಗವಾಗಿದ್ದು, ಮುಖ್ಯವಾಗಿ ಮಲದ ವಸ್ತುವಿನಿಂದ ಮೌಖಿಕ ಮಾಲಿನ್ಯದ ಮೂಲಕ ಹರಡುತ್ತದೆ. ಯುಎಸ್ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ (ಸಿಡಿಸಿ) ಪ್ರಕಾರ, ಈ ವೈರಸ್ ಸೋಂಕಿತ ವ್ಯಕ್ತಿಯ ಮಲದಲ್ಲಿ ವಾಸಿಸುತ್ತವೆ. ಸೋಂಕಿತ ಜನರು ಮಲವಿಸರ್ಜನೆಯ ನಂತರ ತಮ್ಮ ಕೈಗಳನ್ನು ಚೆನ್ನಾಗಿ ತೊಳೆಯದಿದ್ದರೆ ಇತರರಿಗೆ ಹರಡಬಹುದು. ಜನರು ನೀರು ಕುಡಿಯುವಾಗ ಅಥವಾ ಸೋಂಕಿತ ಮಲದಿಂದ ಕಲುಷಿತಗೊಂಡ ಆಹಾರವನ್ನು ಸೇವಿಸಿದರೆ ಸಹ ಸೋಂಕಿಗೆ ಒಳಗಾಗಬಹುದು.
ಈ ವೈರಸ್ ಮಕ್ಕಳಲ್ಲಿ ಪಾರ್ಶ್ವವಾಯುವನ್ನು ಉಂಟುಮಾಡಬಹುದು ಮತ್ತು ಅವರನ್ನು ದುರ್ಬಲಗೊಳಿಸಬಹುದು. ಕೆಲವೊಮ್ಮೆ ಇದು ಮಾರಣಾಂತಿಕವಾಗಿಯೂ ಪರಿಣಮಿಸುತ್ತದೆ. ಇದಕ್ಕೆ ಯಾವುದೇ ಚಿಕಿತ್ಸೆ ಇಲ್ಲ. ಆದರೆ, ಲಸಿಕೆಯಿಂದ ಈ ರೋಗವನ್ನು ನಿರ್ಮೂಲನೆ ಮಾಡಬಹುದಾಗಿದೆ.
ಮೊದಲಿಗೆ ವೈರಸ್ ಕರುಳಿನಿಂದ ಶುರುವಾಗಿ ನಂತರ ಅದು ನರಮಂಡಲವನ್ನು ಆಕ್ರಮಿಸುತ್ತದೆ. ಇದು ಪಾರ್ಶ್ವವಾಯುವಿಗೆ ಕಾರಣವಾಗಬಹುದು. ರೋಗಿಗೆ ಯಾವುದೇ ಚಿಕಿತ್ಸೆ ಇಲ್ಲದ ಕಾರಣ ರೋಗಿಯು ಜೀವನ ಪರ್ಯಂತ ಅಂಗವಿಕಲನಾಗಬೇಕಾಗುತ್ತದೆ.
Loading ...