ಔಷಧಿ ತಯಾರಕ ಕಂಪನಿಯಾದ ಕ್ಯಾಡಿಲಾ ಹೆಲ್ತ್ಕೇರ್ ಅಕ್ಟೋಬರ್ ತಿಂಗಳಲ್ಲಿ 10 ಮಿಲಿಯನ್ ಕೊರೊನಾ ವೈರಸ್ ಲಸಿಕೆಯನ್ನು ಪೂರೈಸಲಿದೆ ಎಂದು ಸರ್ಕಾರದ ಮೂಲಗಳು ಮಾಹಿತಿ ನೀಡಿವೆ. ಜೈಡಸ್ ಕ್ಯಾಡಿಲ್ಲಾದ ಸೂಜಿ ರಹಿತ ಕೊರೊನಾ ಲಸಿಕೆಯಾದ ಜೈಕೋವ್ ಡಿ ಅಕ್ಟೋಬರ್ ತಿಂಗಳ ಆರಂಭದಲ್ಲಿಯೇ ಸಿಗಲಿದೆ ಎಂದು ಅಂದಾಜಿಸಲಾಗಿದೆ.
12 ರಿಂದ 18 ವರ್ಷ ಪ್ರಾಯದೊಳಗಿನವರಿಗೆ ನೀಡಲು ಜೈಕೋವ್ ಡಿ ಕೊರೊನಾ ಲಸಿಕೆಗೆ ಅನುಮೋದನೆ ನೀಡಲಾಗಿದೆ.
ಅಂದಹಾಗೆ ಈ ಲಸಿಕೆಯ ಬೆಲೆ ಇನ್ನೂ ನಿಗದಿಯಾಗಿಲ್ಲ. ಜೈಕೋವ್ ಡಿಗೆ ಎಷ್ಟು ಬೆಲೆ ನಿಗದಿ ಮಾಡಬೇಕು ಎಂಬುದರ ಬಗ್ಗೆ ಚರ್ಚೆ ನಡೆಸುತ್ತಿದ್ದೇವೆ. ರಾಷ್ಟ್ರೀಯ ಲಸಿಕೆ ಅಭಿಯಾನದಲ್ಲಿ ಈ ಲಸಿಕೆಯನ್ನೂ ಸೇರಿಸಿಕೊಳ್ಳಲು ನಾವು ಎದುರು ನೋಡುತ್ತಿದ್ದೇವೆ ಎಂದು ನೀತಿ ಆಯೋಗದ ಸದಸ್ಯ ವಿ.ಕೆ. ಪಾಲ್ ಹೇಳಿದ್ದಾರೆ.
ಜೈಕೋವ್ ಡಿ ವಿಶ್ವದ ಮೊದಲ ಪ್ಲಾಸ್ಮಿಡ್ ಡಿಎನ್ಎ ಕೊರೊನಾ ಲಸಿಕೆಯಾಗಿದೆ. ಇದೊಂದು ಮೂರು ಡೋಸ್ಗಳ ಲಸಿಕೆಯಾಗಿದೆ. ಮೊದಲ ಲಸಿಕೆ ಪಡೆದ 28 ದಿನಗಳ ಬಳಿಕ 2ನೇ ಲಸಿಕೆ ಹಾಗೂ 56 ದಿನಗಳ ಬಳಿಕ 3ನೇ ಲಸಿಕೆಯನ್ನು ನೀಡಲಾಗುತ್ತದೆ. 12 ರಿಂದ 18 ವರ್ಷದ ಒಳಗಿನವರಿಗೆ ನೀಡಲು ಈ ಕೊರೊನಾ ಲಸಿಕೆಗೆ ಆಗಸ್ಟ್ 20ರಂದು ಅನುಮೋದನೆ ದೊರಕಿದೆ.
Loading ...