ವಿಷಕಾರಿ ಹಾವಿನಿಂದ ತಯಾರಾಗುತ್ತೆ ಈ ವೈನ್‌, ಕುಡಿದ ನಂತರ ಪರಿಣಾಮ ಹೇಗಿರುತ್ತೆ ಗೊತ್ತಾ ?

ಮದ್ಯಪ್ರಿಯರು ವೆರೈಟಿಗಳನ್ನು ಟ್ರೈ ಮಾಡಿರ್ತಾರೆ. ಆದರೆ ಇಂಥಾ ವಿಚಿತ್ರ ಮದ್ಯವನ್ನು ಕುಡಿದಿರಲಿಕ್ಕಿಲ್ಲ. ಇದು ವಿಷಕಾರಿ ಹಾವುಗಳಿಂದ ತಯಾರಿಸಲಾಗುವ ಅಲ್ಕೋಹಾಲ್‌. ಈ ಹಾವುಗಳು ಎಷ್ಟು ವಿಷಕಾರಿ ಎಂದರೆ ಯಾರಿಗಾದರೂ ಒಮ್ಮೆ ಕಚ್ಚಿದರೆ ನಿಮಿಷಗಳಲ್ಲಿ ಸಾಯುತ್ತಾರೆ. ಆದರೆ ಕೆಲವರು ಈ ಹಾವುಗಳನ್ನು ವೈನ್‌ನಲ್ಲಿ ಹಾಕಿ ಕುಡಿಯುತ್ತಾರೆ. ಇದು ಆರೋಗ್ಯಕ್ಕೆ ಪ್ರಯೋಜನಕಾರಿಯೆಂದು ಅವರು ಪರಿಗಣಿಸುತ್ತಾರೆ.

ಹಾವಿನ ವೈನ್‌ ಕುಡಿದ ನಂತರ ಏನಾಗುತ್ತದೆ ?

ವಿಷಕಾರಿ ಹಾವುಗಳಿಂದ ಮದ್ಯವನ್ನು ಚೀನಾದಲ್ಲಿ ಮೊದಲು ತಯಾರಿಸಲಾಯ್ತು. ಆದರೆ ಪ್ರಸ್ತುತ ಇದನ್ನು ಹೆಚ್ಚಾಗಿ ಆಗ್ನೇಯ ಏಷ್ಯಾದ ವಿಯೆಟ್ನಾಂನಲ್ಲಿ ತಯಾರಿಸಲಾಗುತ್ತದೆ. ಅಲ್ಲಿನ ಸ್ಥಳೀಯರು ಈ ಮದ್ಯವನ್ನು ಬಹಳ ಉತ್ಸಾಹದಿಂದ ಕುಡಿಯುತ್ತಾರೆ. ಪ್ರವಾಸಿಗರು ಕೂಡ ಇದನ್ನು ಟ್ರೈ ಮಾಡ್ತಾರೆ. ಇದನ್ನು ಕುಡಿಯುವುದರಿಂದ ಮಾನವನ ದೇಹದ ಮೇಲೆ ಯಾವುದೇ ವಿಶೇಷ ಪರಿಣಾಮವಾಗುವುದಿಲ್ಲವಂತೆ.

ಏಕೆಂದರೆ ಹಾವಿನ ವಿಷದ ನಿಜವಾದ ಪರಿಣಾಮವು ದೀರ್ಘಕಾಲದವರೆಗೆ ಆಲ್ಕೋಹಾಲ್‌ನಲ್ಲಿ ಇರುವುದರಿಂದ ಅದು ನಾಶವಾಗುತ್ತದೆ. ಈ ಸ್ನೇಕ್ ವೈನ್ ತಯಾರಿಸಲು ಹೆಚ್ಚಾಗಿ ಅಕ್ಕಿ ವೈನ್ ಅನ್ನು ಬಳಸಲಾಗುತ್ತದೆ. ಅದರಲ್ಲಿ ಸಾಕಷ್ಟು ಗಿಡಮೂಲಿಕೆಗಳನ್ನು ಹಾಕಿದ ನಂತರ ವಿಷಕಾರಿ ಹಾವನ್ನು ಹಾಕಲಾಗುತ್ತದೆ, ಅದನ್ನು ದೀರ್ಘಕಾಲದವರೆಗೆ ಹಾಗೇ ಇಡಲಾಗುತ್ತದೆ. ಕೆಲವು ತಿಂಗಳ ನಂತರ ಅದು ಫರ್ಮೆಂಟ್‌ ಆದಮೇಲೆ ಕುಡಿಯುತ್ತಾರೆ.

ಈ ಹಾವಿನ ವೈನ್ ಮೊದಲು ಚೀನಾದ ಪಶ್ಚಿಮ ಭಾಗದಲ್ಲಿರುವ ಝೌ ಪ್ರಾಂತ್ಯದಲ್ಲಿ ಹುಟ್ಟಿಕೊಂಡಿದೆ. ಸುಮಾರು ಕ್ರಿ.ಪೂ.771ರಲ್ಲಿ ಇದನ್ನು ತಯಾರಿಸಲಾಯಿತಂತೆ. ಅದನ್ನು ಔಷಧದಂತೆ ಬಳಸಲಾಗುತ್ತಿತ್ತು. ಅನಾರೋಗ್ಯದಿಂದ ಬಳಲುತ್ತಿರುವವರನ್ನು ಗುಣಪಡಿಸಲು ಇದನ್ನು ಕುಡಿಸಲಾಗುತ್ತಿತ್ತು. ಆ ಸಮಯದಲ್ಲಿ ಹಾವಿನ ರಕ್ತದ ವೈನ್ ಅನ್ನು ತಯಾರಿಸಲಾಗುತ್ತಿತ್ತು. ಒಂದು ಕಪ್‌ನಲ್ಲಿ ಆಲ್ಕೋಹಾಲ್ ತೆಗೆದುಕೊಂಡು ಜೀವಂತ ವಿಷಕಾರಿ ಹಾವಿನ ಹೊಟ್ಟೆಯನ್ನು ಸೀಳಿ, ಅದರ ರಕ್ತದ ಕೆಲವು ಹನಿಗಳನ್ನು ಮದ್ಯದಲ್ಲಿ ಬೆರೆಸಲಾಗುತ್ತಿತ್ತು.