ವಿಶ್ವದ ಅತ್ಯಂತ ದುಬಾರಿ ತರಕಾರಿಗಳಿವು…! ಚಿನ್ನಕ್ಕಿಂತಲೂ ಹೆಚ್ಚು ಇವುಗಳ ಬೆಲೆ

 

ದೇಶದಲ್ಲಿ ತರಕಾರಿಗಳು ಜನಸಾಮಾನ್ಯರ ಕೈಗೆಟುಕದಷ್ಟು ದುಬಾರಿಯಾಗಿವೆ. ಕೆಜಿಗೆ 50 ರೂಪಾಯಿಗೆ ತಲುಪಿರೋ ಈರುಳ್ಳಿ ಗೃಹಿಣಿಯರ ಕಣ್ಣಲ್ಲಿ ನೀರು ಹಾಕಿಸ್ತಾ ಇದೆ. ಜಗತ್ತಿನ ಅತ್ಯಂತ ದುಬಾರಿ ತರಕಾರಿಗಳ ಬಗ್ಗೆ ನಿಮಗೆ ತಿಳಿದಿದೆಯೇ? ಇವುಗಳ ಬೆಲೆ ಒಂದು ಗ್ರಾಂ ಚಿನ್ನಕ್ಕಿಂತಲೂ ಹೆಚ್ಚು.

ಯಮಶಿತಾ ಪಾಲಕ್‌ : ಪೌಷ್ಠಿಕಾಂಶವುಳ್ಳ ವಿಶಿಷ್ಟ ಸೊಪ್ಪು ಇದು. ಜಪಾನ್‌ನ ರಾಜಧಾನಿ ಟೋಕಿಯೋದಲ್ಲಿ ಇದನ್ನು ಬೆಳೆಯಲಾಗುತ್ತದೆ. ಈ ಸೊಪ್ಪನ್ನು ಬೆಳೆಯಲು ಅತ್ಯಂತ ಕಾಳಜಿ ಬೇಕು ಜೊತೆಗೆ ತಾಳ್ಮೆಯೂ ಇರಬೇಕು. ಇದರ ಬೆಲೆ ಪ್ರತಿ ಪೌಂಡ್‌ಗೆ 13 ಡಾಲರ್‌, ಅಂದರೆ ಸುಮಾರು ಒಂದು ಸಾವಿರ ರೂಪಾಯಿ.

ಆಲೂಗಡ್ಡೆ : ಅರ್ಧ ಕೆಜಿ ಆಲೂಗಡ್ಡೆ ಬೆಲೆ ಹೆಚ್ಚೆಂದರೆ 25 ರೂಪಾಯಿ ಇರಬಹುದು. ಆದ್ರೆ ಫ್ರಾನ್ಸ್‌ನಲ್ಲಿ ಬೆಳೆಯುವ ಈ ವಿಶಿಷ್ಟ ಆಲೂಗಡ್ಡೆಯ ಬೆಲೆ ಅರ್ಧ ಕೆಜಿಗೆ 24,000 ರೂಪಾಯಿ. ಈ ವಿಶೇಷ ಆಲೂಗೆಡ್ಡೆಯನ್ನು ಪಶ್ಚಿಮ ಫ್ರಾನ್ಸ್‌ನಲ್ಲಿ ಬೆಳೆಯಲಾಗುತ್ತದೆ. ಇಷ್ಟು ದುಬಾರಿಯಾಗಲು ಕಾರಣ ಅದರ ಸೀಮಿತ ಲಭ್ಯತೆ. ಈ ವಿಶೇಷ ಆಲೂಗೆಡ್ಡೆಯ ಇಳುವರಿ ವರ್ಷದಲ್ಲಿ ಕೇವಲ 100 ಟನ್. ಇದರ ರುಚಿ ಕೂಡ ಪ್ರಚಂಡವಾಗಿರುತ್ತದೆ.

ಅಣಬೆ : ವಿಶ್ವದ ಅತ್ಯಂತ ದುಬಾರಿ ಮಶ್ರೂಮ್ ಇದು. ತೈವಾನ್‌ನ Yartsa Gunbu ಅತ್ಯಂತ ದುಬಾರಿ ಅಣಬೆ ಎಂದು ಹೆಸರುವಾಸಿಯಾಗಿದೆ. ಆದರೆ ಕೆಲವರು ಜಪಾನ್‌ನ Matsutake ಹೆಚ್ಚು ದುಬಾರಿ ಎಂದು ಪರಿಗಣಿಸುತ್ತಾರೆ. ಈ ವಿಶೇಷ ಅಣಬೆಯ ಬೆಲೆ ಭಾರತೀಯ ಕರೆನ್ಸಿಯಲ್ಲಿ ಕೆಜಿಗೆ ಸುಮಾರು 2.5 ಲಕ್ಷ ರೂಪಾಯಿ. ಇತರ ದುಬಾರಿ ಅಣಬೆಗಳೆಂದರೆ ಯುರೋಪಿಯನ್ ಬಿಳಿ ಟ್ರಫಲ್, ಮೊರೆಲ್ ಮತ್ತು ಚಾಂಟೆರೆಲ್ ಪ್ರಭೇದಗಳು.

ಪಿಂಕ್‌ ಲೆಟಿಸ್‌ : ಇದನ್ನು ಗುಲಾಬಿ ರಾಡಿಚಿಯೋ ಎಂದೂ ಕರೆಯುತ್ತಾರೆ. ಇದರ ರುಚಿ ಸ್ವಲ್ಪ ಕಹಿ. ಇದರ ಬೆಲೆ ಪ್ರತಿ ಪೌಂಡ್‌ಗೆ 10 ಡಾಲರ್‌ನಷ್ಟಿದೆ. ಭಾರತೀಯ ಕರೆನ್ಸಿಯಲ್ಲಿ ಇದರ ಬೆಲೆ ಕೆಜಿಗೆ ಸುಮಾರು 1600 ರೂಪಾಯಿ.

ವಾಸಬಿ:  ಉತ್ತರ ಜಪಾನ್, ಚೀನಾ, ಕೊರಿಯಾ, ತೈವಾನ್ ಮತ್ತು ನ್ಯೂಜಿಲೆಂಡ್‌ನಲ್ಲಿ ಮಾತ್ರ ಈ ತರಕಾರಿಯನ್ನು ಬೆಳೆಸಲಾಗುತ್ತದೆ. ಇದರ ರುಚಿ ಅನನ್ಯವಾಗಿದೆ. ಅರ್ಧ ಕೆಜಿ ವಾಸಬಿಯ ಬೆಲೆ ಸುಮಾರು 5 ಸಾವಿರ ರೂಪಾಯಿ ಇದೆ.

ಹಾಪ್‌ ಶೂಟ್ಸ್‌: ಇದು ಕೂಡ ವಿಶ್ವದ ಬೆಲೆಬಾಳುವ ತರಕಾರಿಗಳಲ್ಲೊಂದು. ಈ ತರಕಾರಿ ಗಾತ್ರದಲ್ಲಿ ಚಿಕ್ಕದಾಗಿದೆ. ಅದನ್ನು ಕೊಯ್ಲು ಮಾಡುವುದು ತುಂಬಾ ಕಷ್ಟ. ಪ್ರಪಂಚದ ಹಲವು ತರಕಾರಿ ಮಾರುಕಟ್ಟೆಗಳಲ್ಲಿ ಇದರ ಬೆಲೆ ಕೆಜಿಗೆ 80 ಸಾವಿರದಿಂದ 85 ಸಾವಿರ ರೂಪಾಯಿ ಇದೆ. ಈ ಹಣದಲ್ಲಿ ಚಿನ್ನದ ಆಭರಣವನ್ನೇ ಖರೀದಿ ಮಾಡಬಹುದು. ಒಂದು ಮೂಟೆ ಹಾಪ್‌ ಶೂಟ್ಸ್‌ ಕೊಂಡುಕೊಳ್ಳಲು ಲಕ್ಷಾಂತರ ರೂಪಾಯಿ ವೆಚ್ಚ ಮಾಡಬೇಕಾಗುತ್ತದೆ.