ಭಾರತದ ಸಾರ್ವಕಾಲಿಕ ಶ್ರೀಮಂತ ವ್ಯಕ್ತಿ ಯಾರು ಗೊತ್ತಾ……?

ಭಾರತದ ಸಾರ್ವಕಾಲಿಕ ಶ್ರೀಮಂತರ ಬಗ್ಗೆ ಮಾತನಾಡಿದಾಗ ನಿಮ್ಮ ಮನಸ್ಸಿನಲ್ಲಿ ಬರುವ ಹೆಸರುಗಳು ಯಾವುವು..? ಹಲವರು ಅದಾನಿ, ಅಂಬಾನಿ ಮತ್ತು ಟಾಟಾ ಬಗ್ಗೆ ಯೋಚಿಸಿರಬಹುದು. ಆದರೆ ಇದು ಸರಿಯಲ್ಲ..!

ನಾವು ನಮ್ಮ ಇತಿಹಾಸವನ್ನು ಹಿಂತಿರುಗಿ ನೋಡಿದಾಗ ಭಾರತವು ಆಗರ್ಭ ಶ್ರೀಮಂತವಾಗಿತ್ತು ಎಂಬುದನ್ನು ಓದಿರುತ್ತೇವೆ. ಸ್ವಾತಂತ್ರ್ಯದ ಸಮಯದಲ್ಲಿ ಭಾರತವನ್ನು ವಿವಿಧ ಸ್ಥಳೀಯ ರಾಜರ ರಾಜ್ಯಗಳಾಗಿ ವಿಂಗಡಿಸಲಾಗಿದೆ. ಹೈದರಾಬಾದ್, ಜುನಾಗಢ, ಜಮ್ಮು ಮತ್ತು ಕಾಶ್ಮೀರವನ್ನು ಹೊರತುಪಡಿಸಿ ಎಲ್ಲಾ ಭಾರತೀಯ ರಾಜಪ್ರಭುತ್ವದ ರಾಜ್ಯಗಳು ಭಾರತೀಯ ಒಕ್ಕೂಟಕ್ಕೆ ಸೇರಲು ಒಪ್ಪಿಕೊಂಡವು.

ಈ ರಾಜ್ಯಗಳಲ್ಲಿ, ಹೈದರಾಬಾದ್ ಸಾಕಷ್ಟು ಸಮೃದ್ಧ ಮತ್ತು ಶ್ರೀಮಂತ ರಾಜ್ಯವಾಗಿದ್ದು, ಅದು ಇಟಲಿಯ ಗಾತ್ರಕ್ಕೆ ಸಮಾನವಾಗಿತ್ತು. 1911 ರಿಂದ 1948 ರವರೆಗೆ 37 ವರ್ಷಗಳ ಕಾಲ ಹೈದರಾಬಾದ್ ಅನ್ನು ಆಳಿದ ನಿಜಾಮ್ ಉಸ್ಮಾನ್ ಅಲಿ ಖಾನ್ ಹೈದರಾಬಾದ್‌ನ ಕೊನೆಯ ನವಾಬರಾಗಿದ್ದಾರೆ. ಇವರೇ ಅತ್ಯಂತ ಶ್ರೀಮಂತ ಭಾರತೀಯರಾಗಿದ್ದಾರೆ.

1948 ರಲ್ಲಿ ರಾಜಪ್ರಭುತ್ವವನ್ನು ಭಾರತದ ಒಕ್ಕೂಟಕ್ಕೆ ತೆಗೆದುಕೊಳ್ಳುವ ಮೊದಲು, ಉಸ್ಮಾನ್ ಅಲಿ ಖಾನ್ ಭಾರತದಲ್ಲಿ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿದ್ದರು. ಉಸ್ಮಾನ್ ಅಲಿ ಖಾನ್ ತನ್ನ ತಂದೆಯ ನಂತರ 1911 ರಲ್ಲಿ ಹೈದರಾಬಾದ್ ನಿಜಾಮ್ ಆಗಿ ಅಧಿಕಾರ ವಹಿಸಿಕೊಂಡಿದ್ದರು ಮತ್ತು ಸುಮಾರು ನಾಲ್ಕು ದಶಕಗಳ ಕಾಲ ಅಧಿಕಾರದ ಚುಕ್ಕಾಣಿ ಹಿಡಿದಿದ್ದರು.

ವರದಿಗಳ ಪ್ರಕಾರ, ಹಣದುಬ್ಬರವನ್ನು ಸರಿಹೊಂದಿಸಿದ ನಂತರ ಉಸ್ಮಾನ್ ಅಲಿ ಖಾನ್ ಅವರ ನಿವ್ವಳ ಮೌಲ್ಯವು 17.47 ಲಕ್ಷ ಕೋಟಿ (ಡಾಲರ್ 230 ಬಿಲಿಯನ್) ಎಂದು ಅಂದಾಜಿಸಲಾಗಿದೆ. ಖಾನ್ ಅವರ ನಿವ್ವಳ ಮೌಲ್ಯವು ಎಲೋನ್ ಮಸ್ಕ್ ಅವರ ನಿವ್ವಳ ಮೌಲ್ಯದ ಸಮೀಪದಲ್ಲಿದೆ. ಪ್ರಸ್ತುತ ಎಲೋನ್ ಮಸ್ಕ್, ಡಾಲರ್ 286 ಶತಕೋಟಿ ಹೊಂದಿದ್ದು, ವಿಶ್ವದ ಶ್ರೀಮಂತ ವ್ಯಕ್ತಿ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ.

ನೀವು ತಿಳಿದಿರದ ಉಸ್ಮಾನ್ ಅಲಿ ಖಾನ್ ಬಗೆಗಿನ ಕೆಲವು ವಿಚಾರಗಳು ಇಂತಿವೆ:

1. ಮೀರ್ ಉಸ್ಮಾನ್ ಅಲಿ ಖಾನ್ ಅವರು 50 ರೋಲ್ಸ್ ರಾಯ್ಸ್ ಅನ್ನು ಹೊಂದಿದ್ದರು ಅಂತಾ ವರದಿಯಾಗಿದೆ. ರೋಲ್ಸ್ ರಾಯ್ಸ್ ಮೋಟಾರ್ ಕಾರ್ಸ್ ಲಿಮಿಟೆಡ್ ತಮ್ಮ ಕಾರನ್ನು ಮೀರ್ ಉಸ್ಮಾನ್‌ಗೆ ಮಾರಾಟ ಮಾಡಲು ನಿರಾಕರಿಸಿತ್ತು. ಇದರಿಂದ ಕುಪಿತನಾದ ನವಾಬ, ಕೆಲವು ಹಳೆಯ ರೋಲ್ಸ್ ರಾಯ್ಸ್ ಕಾರುಗಳನ್ನು ಖರೀದಿಸಿ ಕಸ ಸಂಗ್ರಹಕ್ಕೆ ಬಳಸಿದ್ದನು. ಇದು ಬ್ರಿಟಿಷ್ ಐಷಾರಾಮಿ ವಾಹನ ತಯಾರಕನ ಇಮೇಜ್ ಅನ್ನು ಹಾನಿಗೊಳಿಸಿತು ಎಂದು ಹೇಳಲಾಗುತ್ತದೆ.
2. ಭಾರತವು ಆಕ್ರಮಣ ಮಾಡುವವರೆಗೂ ಹೈದರಾಬಾದ್ ಅನ್ನು ಆಳಿದ ಏಳು ನಿಜಾಮರಲ್ಲಿ ಮೀರ್ ಉಸ್ಮಾನ್ ಕೊನೆಯವರು.
3. ಮೀರ್ ಉಸ್ಮಾನ್ ಡಾಲರ್ 100 ಮಿಲಿಯನ್‌ಗಿಂತಲೂ ಹೆಚ್ಚು ಮೌಲ್ಯದ ವೈಯಕ್ತಿಕ ಚಿನ್ನದ ಸಂಗ್ರಹವನ್ನು ಹೊಂದಿದ್ದರು. ಮತ್ತು ಡಾಲರ್ 400 ಮಿಲಿಯನ್‌ಗಿಂತಲೂ ಹೆಚ್ಚು ಮೌಲ್ಯದ ಆಭರಣಗಳನ್ನು ಹೊಂದಿದ್ದರು. ಇಂದು $95 ಮಿಲಿಯನ್ ಮೌಲ್ಯದ ಪ್ರಸಿದ್ಧ ಜಾಕೋಬ್ ಡೈಮಂಡ್ ಕೂಡ ಅವರ ಬಳಿಯಿತ್ತು.
4. ಹೈದರಾಬಾದ್ ಹೈಕೋರ್ಟ್, ಸೆಂಟ್ರಲ್ ಲೈಬ್ರರಿ (ಹಿಂದೆ ಅಸಾಫಿಯಾ ಲೈಬ್ರರಿ ಎಂದು ಕರೆಯಲಾಗುತ್ತಿತ್ತು) ಮತ್ತು ಅಸೆಂಬ್ಲಿ ಹಾಲ್, ಸ್ಟೇಟ್ ಮ್ಯೂಸಿಯಂ ಮತ್ತು ನಿಜಾಮಿಯಾ ವೀಕ್ಷಣಾಲಯ ಸೇರಿದಂತೆ ಹೈದರಾಬಾದ್‌ನಲ್ಲಿನ ಅನೇಕ ಪ್ರಮುಖ ಸಾರ್ವಜನಿಕ ಕಟ್ಟಡಗಳ ಅಭಿವೃದ್ಧಿಗೆ ನವಾಬನ ಆಳ್ವಿಕೆ ಸಲ್ಲುತ್ತದೆ.
5. 1911 ರಲ್ಲಿ ಅವರಿಗೆ ನೈಟ್ ಗ್ರ್ಯಾಂಡ್ ಕಮಾಂಡರ್ ಆಫ್ ದಿ ಸ್ಟಾರ್ ಆಫ್ ಇಂಡಿಯಾ ಎಂಬ ಬಿರುದನ್ನು ನೀಡಲಾಯಿತು.
6. 1917 ರಲ್ಲಿ, ಅವರಿಗೆ ಬ್ರಿಟಿಷ್ ಸಾಮ್ರಾಜ್ಯದ ನೈಟ್ ಗ್ರ್ಯಾಂಡ್ ಕ್ರಾಸ್ ಎಂಬ ಬಿರುದನ್ನು ನೀಡಲಾಯಿತು.
7. 1946 ರಲ್ಲಿ ಅವರಿಗೆ ರಾಯಲ್ ವಿಕ್ಟೋರಿಯಾ ಚೈನ್ ನೀಡಲಾಯಿತು.

ಭಾರತ ಸ್ವಾತಂತ್ರ್ಯಾ ನಂತರ, ದೇಶದ ಏಕೀಕರಣದ ಪ್ರಯತ್ನಗಳು ಪ್ರಾರಂಭವಾದಾಗ ನವಾಬ್ ತನ್ನ ಸಾಮ್ರಾಜ್ಯವನ್ನು ತೊರೆದು 1948 ರಲ್ಲಿ ಭಾರತೀಯ ಗಣರಾಜ್ಯಕ್ಕೆ ಸೇರಿದ್ರು. ಹೈದರಾಬಾದ್ ಅನ್ನು ಭಾರತೀಯ ಒಕ್ಕೂಟದಲ್ಲಿ ವಿಲೀನಗೊಳಿಸಿದ ನಂತರ ನಿಜಾಮನ ಆದಾಯದ ಮೂಲಗಳು ಕಡಿಮೆಯಾಗುತ್ತಾ ಹೋದವು.