ಬ್ಯಾಂಕ್​ ದರೋಡೆ ಮಾಡಲು ಊಬರ್​ ಕ್ಯಾಬ್​ ಬುಕ್…! ವಾಪಾಸ್‌ ಹೋಗಲೂ ರೆಡಿ ಇರುವಂತೆ ಸೂಚಿಸಿದ್ದ ಭೂಪ…!

ನ್ಯೂಯಾರ್ಕ್​: ಬ್ಯಾಂಕ್​ ದರೋಡೆ ಮಾಡಲು ಊಬರ್​ ಕ್ಯಾಬ್​ ಬಳಸಿದ ವ್ಯಕ್ತಿಯೊಬ್ಬ ಸಿಕ್ಕಿಬಿದ್ದಿರುವ ಘಟನೆ ನಡೆದಿದೆ. ಈ ಘಟನೆ ನಡೆದಿರುವುದು ಅಮೆರಿಕದ ಮಿಚಿಗನ್​ ಸೌತ್‌ಫೀಲ್ಡ್‌ನಲ್ಲಿ.

42 ವರ್ಷದ ವ್ಯಕ್ತಿಯೊಬ್ಬ ಹಂಟಿಂಗ್​ಟನ್​ ಬ್ಯಾಂಕ್​ ಅನ್ನು ದರೋಡೆ ಮಾಡಲು ಊಬರ್​ಗೆ ಬುಕ್​ ಮಾಡಿದ್ದಾನೆ. ಊಬರ್​ ಚಾಲಕ ಆತ ಹೇಳಿದ ಜಾಗಕ್ಕೆ ಕರೆದುಕೊಂಡು ಹೋಗಿದ್ದಾನೆ. ಸ್ವಲ್ಪ ಸಮಯ ಬ್ಯಾಂಕ್​ ಹೊರಗೆ ಕಾಯುವಂತೆ ಚಾಲಕನಿಗೆ ವ್ಯಕ್ತಿ ಹೇಳಿದ್ದಾನೆ. ತಾನು ಕರೆದುಕೊಂಡು ಬಂದಿರುವ ಪ್ರಯಾಣಿಕ ದರೋಡೆಗೆ ಬಂದಿರುವುದು ಎಂದು ಚಾಲಕನಿಗೆ ಎಳ್ಳಷ್ಟೂ ಸಂಶಯ ಬರಲಿಲ್ಲ.

ಕೊನೆಗೆ ಬ್ಯಾಂಕ್​ ಲೂಟಿ ಮಾಡಿ ಅದೇ ಕ್ಯಾಬ್​ನಲ್ಲಿ ದರೋಡೆಕೋರ ವಾಪಸ್​ ಬಂದಿದ್ದಾನೆ. ದರೋಡೆಯ ವಿಷಯ ಪೊಲೀಸರಿಗೆ ತಿಳಿಯುತ್ತಲೇ ಸಿಸಿ ಟಿವಿಯನ್ನೆಲ್ಲಾ ಪರಿಶೀಲನೆ ಮಾಡಿ ಚಾಲಕನನ್ನು ಮೊದಲು ವಶಕ್ಕೆ ಪಡೆದುಕೊಂಡರು.

ನಂತರ ಆತ ದರೋಡೆಕೋರನನ್ನು ಎಲ್ಲಿಗೆ ಬಿಟ್ಟಿದ್ದೆ ಎಂದು ಹೇಳಿಕೆ ನೀಡಿದ. ಅದರ ಆಧಾರದ ಮೇಲೆ ಬೆನ್ನತ್ತಿದ್ದ ಪೊಲೀಸರ ಕೈಗೆ ದರೋಡೆಕೋರ ಕೊನೆಗೂ ಸಿಕ್ಕಿಬಿದ್ದಿದ್ದಾನೆ.