ಅರಿಶಿನ ಹಲವಾರು ಔಷಧೀಯ ಗುಣಗಳಿಂದ ಸಮೃದ್ಧವಾಗಿದೆ. ಇದನ್ನು ಆಹಾರದಲ್ಲಿ ಮಾತ್ರವಲ್ಲದೇ ಔಷಧವಾಗಿಯೂ ಬಳಸುತ್ತೇವೆ. ದೇಹದ ಮೇಲಿನ ಗಾಯಗಳು ಮತ್ತು ಊತಕ್ಕೆ ಇದು ಪರಿಣಾಮಕಾರಿ ಮದ್ದು. ಅರಿಶಿನವು ಬ್ಯಾಕ್ಟೀರಿಯಾ ವಿರೋಧಿ, ಎಂಟಿಮೈಕ್ರೊಬಿಯಲ್ ಮತ್ತು ಎಂಟಿಕಾರ್ಸಿನೋಜೆನಿಕ್ ಗುಣಲಕ್ಷಣಗಳನ್ನು ಹೊಂದಿದೆ. ಇದು ಮಾನಸಿಕ ಆರೋಗ್ಯಕ್ಕೂ ಪ್ರಯೋಜನಕಾರಿ.
ಅರಿಶಿನದ ಉಪಸ್ಥಿತಿಯಿಂದಾಗಿ, ‘ಅರಿಶಿನ ಹಾಲು’ ಪೌಷ್ಟಿಕಾಂಶವೆಂದು ಪರಿಗಣಿಸಲಾಗಿದೆ. ಆದರೆ ಗರ್ಭಿಣಿ ಮಹಿಳೆಯರು ಅರಿಶಿನ ಹಾಲನ್ನು ಸೇವಿಸಬಹುದೇ? ಇದು ಅವರ ಆರೋಗ್ಯಕ್ಕೆ ಪ್ರಯೋಜನಕಾರಿಯೇ ಎಂಬುದು ಬಹುತೇಕರನ್ನು ಕಾಡುವ ಗೊಂದಲ. ಗರ್ಭಾವಸ್ಥೆಯಲ್ಲಿ ಅರಿಶಿನ ಮತ್ತು ಅರಿಶಿನದ ಹಾಲನ್ನು ಸೇವಿಸುವುದು ಸಂಪೂರ್ಣ ಸುರಕ್ಷಿತ ಎಂದು ಸ್ತ್ರೀರೋಗ ತಜ್ಞರು ಹೇಳುತ್ತಾರೆ. ಆದರೆ ಅದನ್ನು ಸೀಮಿತ ಪ್ರಮಾಣದಲ್ಲಿ ಸೇವಿಸಬೇಕು. ಅರಿಶಿನವು ಸಕ್ರಿಯ ಸಂಯುಕ್ತ ‘ಕರ್ಕ್ಯುಮಿನ್’ ಅನ್ನು ಹೊಂದಿರುತ್ತದೆ. ಹಾಲಿನೊಂದಿಗೆ ಬೆರೆಸಿದಾಗ ಅರಿಶಿನದ ಪೌಷ್ಟಿಕಾಂಶದ ಮೌಲ್ಯವು ಮತ್ತಷ್ಟು ಹೆಚ್ಚಾಗುತ್ತದೆ.
ಅರಿಶಿನ ಹಾಲಿನ ಪ್ರಯೋಜನಗಳು
ಅರಿಶಿನದ ಹಾಲನ್ನು ಕುಡಿಯುವುದರಿಂದ ಜೀರ್ಣಕ್ರಿಯೆ ಚೆನ್ನಾಗಿರುತ್ತದೆ. ಹೊಟ್ಟೆ ಉಬ್ಬರಿಸುವಿಕೆ, ಗ್ಯಾಸ್ ಸಮಸ್ಯೆಯನ್ನು ಇದು ನಿವಾರಿಸುತ್ತದೆ. ರೋಗ ನಿರೋಧಕ ಶಕ್ತಿಯನ್ನು ಬಲಪಡಿಸುತ್ತದೆ. ಗರ್ಭಿಣಿಯರಿಗೆ ಇದು ಹೆಚ್ಚು ಪ್ರಯೋಜನಕಾರಿಯಾಗಿದೆ, ಏಕೆಂದರೆ ಈ ಸಮಯದಲ್ಲಿ ಅವರು ಅನೇಕ ಬಾರಿ ಜೀರ್ಣಕಾರಿ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಗರ್ಭಾವಸ್ಥೆಯಲ್ಲಿ ರೋಗನಿರೋಧಕ ಶಕ್ತಿಯು ತುಂಬಾ ಅಗತ್ಯವಾಗಿರುತ್ತದೆ, ಇದನ್ನು ಅರಿಶಿನ ಹಾಲಿನಿಂದ ಪಡೆಯಬಹುದು.
ವೈದ್ಯರು ಏನು ಹೇಳುತ್ತಾರೆ?
ದೈನಂದಿನ ಆಹಾರದಲ್ಲಿ ಸ್ವಲ್ಪ ಪ್ರಮಾಣದ ಅರಿಶಿನವನ್ನು ಸೇರಿಸುವುದು ಆರೋಗ್ಯಕ್ಕೆ ಸುರಕ್ಷಿತವಾಗಿದೆ ಎನ್ನುತ್ತಾರೆ ವೈದ್ಯರು. ಗರ್ಭಾವಸ್ಥೆಯಲ್ಲಿ ಅರಿಶಿನವನ್ನು ಸೇವಿಸುವುದರಿಂದ ಗರ್ಭಾವಸ್ಥೆಯ 20ನೇ ವಾರದಲ್ಲಿ ಅಥವಾ ಮಗುವಿನ ಜನನದ ನಂತರ ಬೆಳೆಯಬಹುದಾದ ಗಂಭೀರ ಸ್ಥಿತಿಯಾದ ‘ಪ್ರೀಕ್ಲಾಂಪ್ಸಿಯಾ’ವನ್ನು ತಡೆಯಲು ಸಹಾಯ ಮಾಡುತ್ತದೆ. ಆದರೆ ಗರ್ಭಿಣಿಯರು ಅರಿಶಿನ ಹಾಲು ಕುಡಿಯುವುದರಿಂದ ಅನಾನುಕೂಲಗಳೂ ಇವೆ. ಗರ್ಭಾವಸ್ಥೆಯಲ್ಲಿ ಅರಿಶಿನ ಹಾಲು ಕುಡಿಯುವುದರಿಂದ ದೇಹದಲ್ಲಿ ಈಸ್ಟ್ರೊಜೆನ್ ಹಾರ್ಮೋನ್ ಅನ್ನು ಬದಲಾಯಿಸಬಹುದು. ಇದು ಗರ್ಭಾಶಯದ ಸಂಕೋಚನ ಅಥವಾ ರಕ್ತಸ್ರಾವದ ಸಮಸ್ಯೆಗಳನ್ನು ಉಂಟುಮಾಡಬಹುದು.
Loading ...