ಬೇಸಿಗೆಯ ಬಿಸಿಲು ಕೇವಲ ಬೆವರುವಂತೆ ಮಾಡುವುದಿಲ್ಲ, ಬದಲಾಗಿ ಅದು ನಮ್ಮ ದೇಹದ ಅಂಗಾಂಗಗಳ ಮೇಲೆ ಸೈಲೆಂಟ್ ಆಗಿ ದಾಳಿ ಮಾಡುತ್ತದೆ. ಇತ್ತೀಚೆಗೆ ದೆಹಲಿಯಲ್ಲಿ ನಡೆದ ಘಟನೆಯೊಂದು ಇದಕ್ಕೆ ಸಾಕ್ಷಿಯಾಗಿದೆ. ನಿತ್ಯದಂತೆ ಬೆಳಿಗ್ಗೆ 8 ರಿಂದ 9 ಗಂಟೆಯ ನಡುವೆ ವಾರ್ಕಿಂಗ್ ಮುಗಿಸಿ ಬಂದ 62 ವರ್ಷದ ವ್ಯಕ್ತಿಯೊಬ್ಬರು ಅಚಾನಕ್ಕಾಗಿ ಕುಸಿದು ಬಿದ್ದು ಸಾವನ್ನಪ್ಪಿದ್ದಾರೆ. ಇದು ಕೇವಲ ಬಿಸಿಲಿನ ತಾಪವಲ್ಲ, ಬದಲಾಗಿ ದೇಹದ ಒಳಗಿನ ವ್ಯವಸ್ಥೆಯನ್ನೇ ಏರುಪೇರು ಮಾಡುವ ‘ಹೀಟ್ ಸ್ಟ್ರೆಸ್’ (Heat Stress) ಎಂದು ವೈದ್ಯರು ಎಚ್ಚರಿಸಿದ್ದಾರೆ.
ಏನಿದು ಹೀಟ್ ಸ್ಟ್ರೆಸ್? ದೇಹದ ಮೇಲೆ ಇದರ ಪರಿಣಾಮವೇನು? ಸದರಿ ವ್ಯಕ್ತಿ ರಕ್ತದೊತ್ತಡ ಮತ್ತು ಮಧುಮೇಹದಿಂದ ಬಳಲುತ್ತಿದ್ದರು. ಬಿಸಿಲಿನಲ್ಲಿ ಅವರು ಕೇವಲ ಅರ್ಧ ಗಂಟೆ ನಡೆದಿದ್ದರೂ, ಅವರ ದೇಹದ ತಾಪಮಾನ ನಿಯಂತ್ರಿಸುವ ವ್ಯವಸ್ಥೆ ವಿಫಲವಾಗಿತ್ತು. ಅತಿಯಾದ ಬೆವರಿನಿಂದ ಆರಂಭವಾಗಿ, ನಂತರ ಬೆವರು ನಿಂತು ಹೋದದ್ದು ಅಪಾಯದ ಮುನ್ಸೂಚನೆಯಾಗಿತ್ತು. ಇದರಿಂದಾಗಿ ಅವರ ಕಿಡ್ನಿಗಳ ಮೇಲೆ ಪರಿಣಾಮ ಬೀರಿದ್ದು ಮಾತ್ರವಲ್ಲದೆ, ರಕ್ತದ ಸಕ್ಕರೆ ಪ್ರಮಾಣವು ತೀವ್ರವಾಗಿ ಏರಿಕೆಯಾಗಿತ್ತು. ಹಾರ್ಟ್ ಸ್ಟೆಂಟ್ ಹೊಂದಿದ್ದ ಅವರ ಹೃದಯದ ಮೇಲೂ ಇದು ಹೆಚ್ಚಿನ ಒತ್ತಡವನ್ನುಂಟು ಮಾಡಿತ್ತು.
ಕೇವಲ 15 ನಿಮಿಷದ ಬಿಸಿಲು ಸಾಕು! ವೈದ್ಯರ ಪ್ರಕಾರ, ತಾಪಮಾನವು 37 ಡಿಗ್ರಿ ಸೆಲ್ಸಿಯಸ್ಗಿಂತ ಹೆಚ್ಚಾದಾಗ ಹೃದಯವು ಚರ್ಮದ ಭಾಗಕ್ಕೆ ರಕ್ತವನ್ನು ಪಂಪ್ ಮಾಡಲು ಹೆಚ್ಚು ಶ್ರಮಪಡಬೇಕಾಗುತ್ತದೆ. ತೀವ್ರವಾದ ಶಾಖದಿಂದಾಗಿ ರಕ್ತದ ಪ್ರಮಾಣ ಕಡಿಮೆಯಾಗಿ ರಕ್ತನಾಳಗಳು ಹಿಗ್ಗುತ್ತವೆ. ಇದರಿಂದ ರಕ್ತದೊತ್ತಡ ಕುಸಿಯುವುದು, ತಲೆತಿರುಗುವಿಕೆ ಮತ್ತು ಹೃದಯಾಘಾತದ ಸಂಭವ ಹೆಚ್ಚಿರುತ್ತದೆ. ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆ ಇರುವವರು ಅಥವಾ ಗರ್ಭಿಣಿಯರು ಬಿಸಿಲಿನಲ್ಲಿ ಕೇವಲ 15 ರಿಂದ 30 ನಿಮಿಷಗಳ ಕಾಲ ಇದ್ದರೂ ಅದು ಅವರ ಪ್ರಾಣಕ್ಕೆ ಅಪಾಯ ತಂದೊಡ್ಡಬಹುದು.
ಗಮನಿಸಬೇಕಾದ ಪ್ರಮುಖ ಅಂಶಗಳು:
- ಕಿಡ್ನಿ ವೈಫಲ್ಯ: ಅತಿಯಾದ ಶಾಖದಿಂದ ದೇಹದಲ್ಲಿ ನೀರಿನಂಶ ಕಡಿಮೆಯಾಗಿ ಮೂತ್ರಪಿಂಡಗಳಿಗೆ ರಕ್ತದ ಹರಿವು ಕುಂಠಿತವಾಗುತ್ತದೆ, ಇದು ಶಾಶ್ವತ ಕಿಡ್ನಿ ಹಾನಿಗೆ ಕಾರಣವಾಗಬಹುದು.
- ಮಧುಮೇಹದ ಅಪಾಯ: ಬಿಸಿಲು ಇನ್ಸುಲಿನ್ ಹೀರಿಕೊಳ್ಳುವ ವೇಗವನ್ನು ಹೆಚ್ಚಿಸುತ್ತದೆ, ಇದರಿಂದ ಸಕ್ಕರೆ ಪ್ರಮಾಣದಲ್ಲಿ ತೀವ್ರ ಏರುಪೇರಾಗುತ್ತದೆ.
- ಗರ್ಭಿಣಿಯರ ಮೇಲೆ ಪರಿಣಾಮ: ಅತಿಯಾದ ಬಿಸಿಲು ಭ್ರೂಣದ ಬೆಳವಣಿಗೆಯ ಮೇಲೆ ಪರಿಣಾಮ ಬೀರಿ, ಕಡಿಮೆ ತೂಕದ ಮಗು ಜನಿಸಲು ಕಾರಣವಾಗಬಹುದು.
ಬಿಸಿಲಿನಿಂದ ರಕ್ಷಿಸಿಕೊಳ್ಳಲು ಕೇವಲ ಮನೆಯೊಳಗೆ ಇರುವುದು ಮಾತ್ರವಲ್ಲ, ಹವಾಮಾನ ಮುನ್ಸೂಚನೆಯನ್ನು ಗಮನಿಸಿ ಹೊರಾಂಗಣ ಚಟುವಟಿಕೆಗಳನ್ನು ಯೋಜಿಸುವುದು ಮತ್ತು ದೇಹದಲ್ಲಿ ನೀರಿನಂಶ ಸದಾ ಇರುವಂತೆ ನೋಡಿಕೊಳ್ಳುವುದು ಅತ್ಯಗತ್ಯ ಎಂದು ತಜ್ಞರು ತಿಳಿಸಿದ್ದಾರೆ.
