ನಮ್ಮ ಕನಸುಗಳು ಕೇವಲ ಯಾದೃಚ್ಛಿಕ ಚಿತ್ರಗಳಲ್ಲ ಅಥವಾ ದಿನದ ಭಾವನೆಗಳ ಅವಶೇಷಗಳಲ್ಲ; ಬದಲಾಗಿ ಅವು ನಮ್ಮ ಮೆದುಳಿನ ಆಂತರಿಕ ‘ತರಬೇತಿ ಕೇಂದ್ರ’ಗಳಾಗಿ ಕೆಲಸ ಮಾಡುತ್ತವೆ ಎಂದು ಇತ್ತೀಚಿನ ಸಂಶೋಧನೆಯೊಂದು ತಿಳಿಸಿದೆ.
ನಿಮ್ಮ ಕನಸುಗಳು ಕೇವಲ ಕಾಲ್ಪನಿಕ ಲೋಕವಲ್ಲ, ಅವು ನಿಮ್ಮ ಜೀವನದ ಸವಾಲುಗಳಿಗೆ ಅಣಿಗೊಳಿಸುವ ಮೆದುಳಿನ ರಹಸ್ಯ ತರಬೇತಿ ಶಾಲೆ! ಇತ್ತೀಚಿನ ಸಂಶೋಧನೆಯ ಪ್ರಕಾರ, ಸಾಮಾಜಿಕ ಸಂವಹನ, ಆತ್ಮರಕ್ಷಣೆ ಮತ್ತು ಭಯವನ್ನು ಎದುರಿಸಲು ನಿದ್ರೆಯಲ್ಲಿಯೇ ನಮ್ಮ ಮನಸ್ಸು ಪೂರ್ವತಯಾರಿ ನಡೆಸುತ್ತದೆ ಎಂಬ ಕುತೂಹಲಕಾರಿ ವಿಷಯ ಬೆಳಕಿಗೆ ಬಂದಿದೆ.”
ಕೋಕರ್ ವಿಶ್ವವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕ ಫ್ರೆಡೆರಿಕ್ ಥಾಮಸ್ ಅವರ ಪ್ರಕಾರ, ನಿದ್ರೆಯ ಸಮಯದಲ್ಲಿ ಮೆದುಳು ಸಂಬಂಧಗಳು, ವೈಯಕ್ತಿಕ ಘನತೆ, ಸುರಕ್ಷತೆ ಮತ್ತು ಸಾಮಾಜಿಕ ಸಂವಹನಗಳ ಬಗ್ಗೆ ಅಭ್ಯಾಸ ನಡೆಸುತ್ತದೆ.ಸಂಶೋಧಕರು ಸುಮಾರು 400 ಅಭ್ಯರ್ಥಿಗಳ ಕನಸುಗಳನ್ನು ವಿಶ್ಲೇಷಿಸಿದ್ದಾರೆ. ಇದರಲ್ಲಿ ಆತ್ಮರಕ್ಷಣೆ (ಅಪಾಯದಿಂದ ತಪ್ಪಿಸಿಕೊಳ್ಳುವುದು), ಸ್ಥಾನಮಾನ (ಸ್ಪರ್ಧೆ ಅಥವಾ ಸೋಲಿನ ಭಯ), ಸ್ನೇಹ, ಕುಟುಂಬದ ಕಾಳಜಿ ಮತ್ತು ಪ್ರಣಯದಂತಹ ವಿಷಯಗಳನ್ನು ಗಮನಿಸಲಾಗಿದೆ.
ಸಾಮಾನ್ಯ ವಿಷಯಗಳು : ಅಧ್ಯಯನದಲ್ಲಿ ಭಾಗವಹಿಸಿದವರಲ್ಲಿ ಹೆಚ್ಚಿನವರು ‘ಯಾರೋ ಬೆನ್ನಟ್ಟುತ್ತಿರುವುದು’ ಅಥವಾ ‘ಪರೀಕ್ಷೆಯಲ್ಲಿ ಅನುತ್ತೀರ್ಣರಾಗುವ ಭಯ’ದಂತಹ ಕನಸುಗಳನ್ನು ಕಂಡಿದ್ದಾರೆ. ಇವು ವಾಸ್ತವ ಜೀವನದ ಒತ್ತಡಗಳನ್ನು ಎದುರಿಸಲು ಮೆದುಳು ನಡೆಸುವ ಸಿದ್ಧತೆಗಳಾಗಿವೆ.
ಹೆದರಿಕೆ ಮತ್ತು ಭಯದ ಕನಸುಗಳು: ಕಾನ್ಸಾಸ್ ವಿಶ್ವವಿದ್ಯಾಲಯದ ಮತ್ತೊಂದು ಅಧ್ಯಯನದ ಪ್ರಕಾರ, ಕನಸಿನಲ್ಲಿ ಸೌಮ್ಯವಾದ ಭಯವನ್ನು ಅನುಭವಿಸುವುದು ಕೆಟ್ಟದ್ದಲ್ಲ. ಇದು ಮನುಷ್ಯರು ಹಗಲಿನ ಸಮಯದಲ್ಲಿ ತಮ್ಮ ಭಾವನೆಗಳನ್ನು ಹೆಚ್ಚು ಪರಿಣಾಮಕಾರಿಯಾಗಿ ನಿರ್ವಹಿಸಲು ಸಹಾಯ ಮಾಡುತ್ತದೆ. ಕನಸುಗಳು ನಮ್ಮ ಆಂತರಿಕ ಪ್ರೇರಣೆಗಳನ್ನು ಮತ್ತು ಸಮಾಜದಲ್ಲಿ ನಾವು ವರ್ತಿಸುವ ರೀತಿಯನ್ನು ಬೆಸೆಯುವ ಕೊಂಡಿಯಾಗಿವೆ. ಜೀವನದ ಸವಾಲುಗಳನ್ನು ಎದುರಿಸಲು ನಮಗೆ ಅರಿವಿಲ್ಲದೆಯೇ ನಮ್ಮ ಮೆದುಳು ನಿದ್ರೆಯಲ್ಲಿ “ಸಿಮ್ಯುಲೇಶನ್” (Simulations) ನಡೆಸುತ್ತಿರುತ್ತದೆ ಎಂದು ಈ ಸಂಶೋಧನೆ ಹೇಳುತ್ತದೆ.
