ಮೊಟ್ಟೆ ಆರೋಗ್ಯಕ್ಕೆ ಉತ್ತಮ ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ವೈದ್ಯರ ಪ್ರಕಾರ ಪ್ರತಿದಿನ ಒಂದು ಮೊಟ್ಟೆ ತಿನ್ನುವುದು ದೇಹಕ್ಕೆ ಅಗತ್ಯವಾದ ಪ್ರೋಟೀನ್ ಮತ್ತು ವಿಟಮಿನ್‌ಗಳನ್ನು ಒದಗಿಸುತ್ತದೆ. ಆದರೆ, ಮೊಟ್ಟೆಯನ್ನು ಬೇಯಿಸುವಾಗ ಸಿಪ್ಪೆ ಸುಲಿಯುವುದು ಒಂದು ದೊಡ್ಡ ತಲೆನೋವಿನ ಕೆಲಸ. ಸಿಪ್ಪೆಯ ಜೊತೆಗೆ ಮೊಟ್ಟೆಯ ಬಿಳಿ ಭಾಗವೂ ಅಂಟಿಕೊಂಡು ಬರುವುದು ಅಥವಾ ಬೇಯುವಾಗ ಮೊಟ್ಟೆ ಒಡೆಯುವುದು ಸಾಮಾನ್ಯ. ಇನ್ನು ಮುಂದೆ ಈ ಚಿಂತೆ ಬೇಡ, ಇಲ್ಲಿದೆ ಒಂದು ಸರಳ ಉಪಾಯ.
ನಿಂಬೆ ರಸದ ಮ್ಯಾಜಿಕ್ ನೀವು ಮೊಟ್ಟೆಯನ್ನು ಬೇಯಿಸಲು ಇಟ್ಟಾಗ ಆ ನೀರಿಗೆ ಕೇವಲ ಅರ್ಧ ಚಮಚ ನಿಂಬೆ ರಸವನ್ನು ಸೇರಿಸಿ. ನಿಂಬೆ ರಸದಲ್ಲಿರುವ ಆಮ್ಲೀಯ ಗುಣವು ಮೊಟ್ಟೆಯ ಓಡು ಒಡೆಯದಂತೆ ತಡೆಯುತ್ತದೆ. ಅಷ್ಟೇ ಅಲ್ಲದೆ, ಮೊಟ್ಟೆಯ ಬಿಳಿ ಭಾಗವು ಸಿಪ್ಪೆಗೆ ಅಂಟಿಕೊಳ್ಳದಂತೆ ನೋಡಿಕೊಳ್ಳುತ್ತದೆ. ಇದರಿಂದ ಮೊಟ್ಟೆ ಬೆಂದ ನಂತರ ಸಿಪ್ಪೆಯನ್ನು ಅತಿ ಸುಲಭವಾಗಿ ಮತ್ತು ನಯವಾಗಿ ಸುಲಿಯಬಹುದು. ಒಂದು ವೇಳೆ ನಿಂಬೆ ರಸ ಇಲ್ಲದಿದ್ದರೆ ಅಲ್ಪ ಪ್ರಮಾಣದ ವಿನೆಗರ್ ಕೂಡ ಬಳಸಬಹುದು.
ಬೇರೆ ಆಯ್ಕೆಗಳೇನು? ನಿಂಬೆ ರಸ ಅಥವಾ ವಿನೆಗರ್ ಲಭ್ಯವಿಲ್ಲದಿದ್ದರೆ ಒಂದು ಚಮಚ ಉಪ್ಪು ಅಥವಾ ಚಿಟಿಕೆ ಅಡುಗೆ ಸೋಡಾವನ್ನು ನೀರಿಗೆ ಸೇರಿಸಬಹುದು. ಇದು ಕೂಡ ಸಿಪ್ಪೆ ಸುಲಭವಾಗಿ ಬರಲು ಸಹಾಯ ಮಾಡುತ್ತದೆ. ಮೊಟ್ಟೆಯನ್ನು ಕುದಿಯುವ ನೀರಿಗೆ ಹಾಕುವ ಬದಲು, ಸಾಮಾನ್ಯ ತಾಪಮಾನದ ನೀರಿನಲ್ಲಿ ಇಟ್ಟು ನಂತರ ಒಲೆ ಹಚ್ಚುವುದು ಉತ್ತಮ. ಇದರಿಂದ ಉಷ್ಣಾಂಶದ ವ್ಯತ್ಯಾಸದಿಂದ ಮೊಟ್ಟೆ ಒಡೆಯುವ ಅಪಾಯ ತಪ್ಪುತ್ತದೆ.
ಮೊಟ್ಟೆ ಬೇಯಿಸಲು ಎಷ್ಟು ಸಮಯ ಬೇಕು?
- ಅರ್ಧಂಬರ್ಧ ಬೆಂದ ಮೊಟ್ಟೆ (Soft-boiled): ಸುಮಾರು 6 ನಿಮಿಷ ಬೇಯಿಸಿ.
- ಮಧ್ಯಮ ಹದದ ಮೊಟ್ಟೆ (Medium-boiled): 8 ನಿಮಿಷಗಳ ಕಾಲ ಕುದಿಸಿ.
- ಪೂರ್ಣ ಬೆಂದ ಮೊಟ್ಟೆ (Hard-boiled): 10 ರಿಂದ 12 ನಿಮಿಷ ಬೇಯಿಸಿ.
ಮೊಟ್ಟೆ ಬೆಂದ ತಕ್ಷಣ ಅದನ್ನು ತಣ್ಣನೆಯ ನೀರಿಗೆ ಅಥವಾ ಐಸ್ ನೀರಿಗೆ ಹಾಕಿ. ಹೀಗೆ ಮಾಡುವುದರಿಂದ ಮೊಟ್ಟೆಯ ಹಳದಿ ಭಾಗದ ಸುತ್ತ ಹಸಿರು ಬಣ್ಣ ಬರುವುದನ್ನು ತಡೆಯಬಹುದು ಮತ್ತು ರುಚಿಯೂ ಚೆನ್ನಾಗಿರುತ್ತದೆ.
