ಇಂದಿನ ಸ್ಪರ್ಧಾತ್ಮಕ ಯುಗದಲ್ಲಿ ಮಕ್ಕಳ ವಿದ್ಯಾಭ್ಯಾಸದ ಬಗ್ಗೆ ಪಾಲಕರಿಗೆ ಸದಾ ಆತಂಕ. ಮಗು ಎಷ್ಟೇ ಓದಿದರೂ ನೆನಪಿನಲ್ಲಿ ಉಳಿಯುತ್ತಿಲ್ಲ ಅಥವಾ ಓದಿನತ್ತ ಗಮನ ಹರಿಸುತ್ತಿಲ್ಲ ಎನ್ನುವುದು ಬಹುತೇಕ ಪೋಷಕರ ದೂರು. ಆದರೆ, ಇದಕ್ಕೆ ಮಗುವಿನ ಆಲಸ್ಯ ಮಾತ್ರ ಕಾರಣವಲ್ಲ, ಆತ ಕುಳಿತು ಓದುವ ಜಾಗದ ‘ವಾಸ್ತು ದೋಷ’ವೂ ಇರಬಹುದು ಎನ್ನುತ್ತಾರೆ ತಜ್ಞರು.
ವಾಸ್ತು ಶಾಸ್ತ್ರದ ಪ್ರಕಾರ, ಸರಿಯಾದ ಪರಿಸರ ಮತ್ತು ದಿಕ್ಕು ಮಕ್ಕಳ ಬುದ್ಧಿಶಕ್ತಿಯ ಮೇಲೆ ನೇರ ಪರಿಣಾಮ ಬೀರುತ್ತದೆ. ಮಕ್ಕಳ ಓದಿನ ಕೋಣೆಯಲ್ಲಿ ಮಾಡಬೇಕಾದ ಸರಳ ಬದಲಾವಣೆಗಳು ಇಲ್ಲಿವೆ:
ಓದುವ ಕೋಣೆ ಹೇಗಿರಬೇಕು?
ಬಣ್ಣದ ಮೋಡಿ: ಓದುವ ಕೊಠಡಿಯ ಗೋಡೆಗಳಿಗೆ ತಿಳಿ ಹಸಿರು, ತಿಳಿ ಹಳದಿ ಅಥವಾ ತಿಳಿ ನೀಲಿ ಬಣ್ಣವಿರುವುದು ಶ್ರೇಯಸ್ಕರ. ಜ್ಯೋತಿಷ್ಯದ ಪ್ರಕಾರ ಹಸಿರು ಬಣ್ಣವು ಬುಧ ಗ್ರಹದ ಸಂಕೇತವಾಗಿದ್ದು, ಇದು ಬುದ್ಧಿವಂತಿಕೆಯನ್ನು ಹೆಚ್ಚಿಸುತ್ತದೆ.
ದೇವಿಯ ಕೃಪೆ: ಕೋಣೆಯ ಈಶಾನ್ಯ ದಿಕ್ಕಿನಲ್ಲಿ ಸರಸ್ವತಿ ದೇವಿ ಅಥವಾ ಹಂಸದ ಚಿತ್ರವನ್ನು ಇರಿಸಿ. ಇದು ಕಲಿಕೆಗೆ ಪೂರಕ ವಾತಾವರಣ ನಿರ್ಮಿಸುತ್ತದೆ.
ಪಿರಮಿಡ್ ಮತ್ತು ಗ್ಲೋಬ್: ಓದುವ ಟೇಬಲ್ ಮೇಲೆ ಪಿರಮಿಡ್ ಅಥವಾ ಗ್ಲೋಬ್ ಇಡುವುದು ಉತ್ತಮ. ಪ್ರತಿದಿನ ಗ್ಲೋಬ್ ಅನ್ನು ಮೂರು ಬಾರಿ ತಿರುಗಿಸುವುದರಿಂದ ಮಕ್ಕಳಲ್ಲಿ ಕಲಿಯುವ ಆಸಕ್ತಿ ಮತ್ತು ಜಗತ್ತಿನ ಬಗ್ಗೆ ಕುತೂಹಲ ಮೂಡುತ್ತದೆ.
ದಿಕ್ಕುಗಳ ಬಗ್ಗೆ ಇರಲಿ ಎಚ್ಚರ
ವಿದ್ಯುತ್ ಉಪಕರಣ: ಕಂಪ್ಯೂಟರ್ ಅಥವಾ ಲ್ಯಾಪ್‌ಟಾಪ್‌ಗಳನ್ನು ದಕ್ಷಿಣ ಅಥವಾ ಪಶ್ಚಿಮ ದಿಕ್ಕಿನಲ್ಲಿಡಿ. ಈಶಾನ್ಯ ಮೂಲೆಯಲ್ಲಿ ಇಲೆಕ್ಟ್ರಾನಿಕ್ ವಸ್ತುಗಳಿದ್ದರೆ ಅದು ನಕಾರಾತ್ಮಕ ಶಕ್ತಿ ಹೆಚ್ಚಿಸಬಹುದು.
ಕಿಟಕಿ ಮತ್ತು ಗೋಡೆ: ಮಗು ಓದುವ ಜಾಗದ ಹಿಂದೆ ಕಿಟಕಿ ಇರಬಾರದು, ಇದು ಏಕಾಗ್ರತೆಯನ್ನು ಭಂಗಗೊಳಿಸುತ್ತದೆ. ಬದಲಾಗಿ ಬೆನ್ನಿನ ಹಿಂದೆ ಗೋಡೆ ಇರುವುದು ಮಗುವಿನ ಆತ್ಮವಿಶ್ವಾಸ ಹೆಚ್ಚಿಸುತ್ತದೆ.
ನಿದ್ರೆಯ ದಿಕ್ಕು: ಮಲಗುವಾಗ ತಲೆಯನ್ನು ಪೂರ್ವ ದಿಕ್ಕಿಗೆ ಹಾಕಿ ಮಲಗುವುದರಿಂದ ನೆನಪಿನ ಶಕ್ತಿ ವೃದ್ಧಿಯಾಗುತ್ತದೆ.
ನಕಾರಾತ್ಮಕತೆ ಮತ್ತು ದೃಷ್ಟಿ ನಿವಾರಣೆಗೆ ಉಪಾಯ
ಕೆಲವೊಮ್ಮೆ ದೃಷ್ಟಿ ದೋಷದಿಂದಲೂ ಮಕ್ಕಳ ಓದಿನಲ್ಲಿ ಹಿನ್ನಡೆಯಾಗಬಹುದು. ಇದಕ್ಕಾಗಿ ಜ್ಯೋತಿಷ್ಯ ಶಾಸ್ತ್ರದ ಈ ಸರಳ ಪರಿಹಾರಗಳನ್ನು ಅನುಸರಿಸಿ:
ಮೆಣಸಿನಕಾಯಿ ಪರಿಹಾರ: ಏಳು ಒಣ ಕೆಂಪು ಮೆಣಸಿನಕಾಯಿ ಮತ್ತು ಸಾಸಿವೆಯನ್ನು ಮಗುವಿನ ತಲೆಯ ಸುತ್ತ ಏಳು ಬಾರಿ ನಿವಾಳಿಸಿ ಬೆಂಕಿಗೆ ಹಾಕುವುದರಿಂದ ಕೆಟ್ಟ ದೃಷ್ಟಿ ನಿವಾರಣೆಯಾಗುತ್ತದೆ.
ಕಪ್ಪು ಉಪ್ಪಿನ ತಂತ್ರ: ಮನೆಯ ಹೊಸ್ತಿಲಲ್ಲಿ ಮಗುವನ್ನು ಕೂರಿಸಿ ಕಪ್ಪು ಉಪ್ಪು ಹಾಗೂ ಮಣ್ಣಿನಿಂದ ಏಳು ಬಾರಿ ದೃಷ್ಟಿ ತೆಗೆದು ದಕ್ಷಿಣ ದಿಕ್ಕಿಗೆ ಎಸೆಯುವುದರಿಂದ ಓದಿನ ಆಸಕ್ತಿ ಹೆಚ್ಚುತ್ತದೆ.
