ಸಮಂತಾ ಅಕ್ಕಿನೇನಿ ಸದ್ಯ ‘ಮಾ ಇಂಟಿ ಬಂಗಾರಂ’ ಸಿನಿಮಾದ ಚಿತ್ರೀಕರಣದಲ್ಲಿ ಬಿಜಿಯಾಗಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ತಮ್ಮ ವೈಯಕ್ತಿಕ ಜೀವನದ ಕಠಿಣ ಹಂತ ಮತ್ತು ಆ ಸಮಯದಲ್ಲಿ ತಮಗೆ ಆಸರೆಯಾದ ನಿರ್ದೇಶಕ ರಾಜ್ ನಿಡಿಮೋರು ಅವರ ಬಗ್ಗೆ ಭಾವುಕರಾಗಿ ಮಾತನಾಡಿದ್ದಾರೆ. ವಿಚ್ಛೇದನದ ನಂತರದ ಆಘಾತದಿಂದ ಹೊರಬರಲು ಮತ್ತು ಜೀವನದ ಮೇಲಿನ ದೃಷ್ಟಿಕೋನ ಬದಲಿಸಿಕೊಳ್ಳಲು ಈ ಸ್ನೇಹ ಹೇಗೆ ನೆರವಾಯಿತು ಎಂಬ ಕಥೆಯನ್ನು ಹಂಚಿಕೊಂಡಿದ್ದಾರೆ.
ವಿಚ್ಛೇದನದ ಬಳಿಕ ನಾನು ಸಂಪೂರ್ಣವಾಗಿ ಒಂಟಿಯಾಗಿದ್ದೆ ಮತ್ತು ನನ್ನ ಪ್ರಪಂಚವನ್ನು ನಾನೇ ಮುಚ್ಚಿಕೊಂಡಿದ್ದೆ ಎಂದು ಸಮಂತಾ ನೆನಪಿಸಿಕೊಂಡಿದ್ದಾರೆ. ಆ ಸಮಯದಲ್ಲಿ ಮತ್ತೆ ಯಾರನ್ನೂ ನೆಚ್ಚಿಕೊಳ್ಳಲು ಅಥವಾ ನಂಬಲು ಸಾಧ್ಯವೇ ಇಲ್ಲ ಎಂದು ನಾನು ಭಾವಿಸಿದ್ದೆ. ಆದರೆ ರಾಜ್ ಅವರ ಸ್ನೇಹ ಮತ್ತು ಪ್ರೀತಿಯನ್ನು ಸ್ವೀಕರಿಸುವಷ್ಟು ನಾನು ಮೃದುವಾದೆ. ಆ ಸಂಬಂಧದಿಂದಾಗಿ ನಾನು ಇಂದು ಒಬ್ಬ ಉತ್ತಮ ವ್ಯಕ್ತಿಯಾಗಿ ಬದಲಾಗಿದ್ದೇನೆ. ರಾಜ್ ವ್ಯಕ್ತಿತ್ವವೇ ಅಂತಹದ್ದು ಎಂದು ಸಮಂತಾ ಸ್ಮರಿಸಿದ್ದಾರೆ.
ತನ್ನಲ್ಲಾದ ಈ ಬದಲಾವಣೆಯು ತನ್ನ ಹಳೆಯ ಸ್ನೇಹಿತರಿಗೂ ಸ್ಪಷ್ಟವಾಗಿ ಗೋಚರಿಸುತ್ತಿದೆ ಎಂದು ಅವರು ಹೇಳಿದ್ದಾರೆ. ವಿಶೇಷವೆಂದರೆ, ವಿಚ್ಛೇದನದ ನಂತರದ ದಿನಗಳಲ್ಲಿ ಸಮಂತಾ ಅತ್ಯಂತ ಕೆಳಮಟ್ಟದ ಮಾನಸಿಕ ಸ್ಥಿತಿಯಲ್ಲಿದ್ದರು. ಆದರೆ ರಾಜ್ ಅವರೊಂದಿಗಿನ ಒಡನಾಟವು ಅವರಿಗೆ ಬದುಕಿನ ಬಗ್ಗೆ ಹೊಸ ಭರವಸೆಯನ್ನು ನೀಡಿತು.
2021ರಲ್ಲಿ ‘ದ ಫ್ಯಾಮಿಲಿ ಮ್ಯಾನ್ 2’ ಚಿತ್ರೀಕರಣದ ಸಮಯದಲ್ಲಿ ಸಮಂತಾ ಮತ್ತು ರಾಜ್ ಭೇಟಿಯಾಗಿದ್ದರು ಎನ್ನಲಾಗಿದೆ. ಅಲ್ಲಿಂದ ಶುರುವಾದ ಇವರ ಸ್ನೇಹ ವರ್ಷಗಳ ಕಳೆದಂತೆ ಗಟ್ಟಿಯಾಗಿದೆ. ಸದ್ಯ ಸಮಂತಾ ಮುಖ್ಯಭೂಮಿಕೆಯಲ್ಲಿರುವ ‘ಮಾ ಇಂಟಿ ಬಂಗಾರಂ’ ಚಿತ್ರಕ್ಕೆ ರಾಜ್ ನಿಡಿಮೋರು ಅವರೇ ಬೆನ್ನೆಲುಬಾಗಿ ನಿಂತಿದ್ದಾರೆ. ನಂದಿನಿ ರೆಡ್ಡಿ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.
