ಬೆಂಗಳೂರು: ಹೊಸ ವರ್ಷದ ಆಚರಣೆಯ ಹಿನ್ನೆಲೆಯಲ್ಲಿ ಸಿಲಿಕಾನ್ ಸಿಟಿ ಜನರಿಗೆ ಬೆಂಗಳೂರು ಮೆಟ್ರೋ ರೈಲು ನಿಗಮವು (BMRCL) ಭರ್ಜರಿ ಕೊಡುಗೆ ನೀಡಿದೆ. ನಗರದ ವಿವಿಧ ಭಾಗಗಳಿಂದ ಸಂಭ್ರಮಾಚರಣೆಗೆ ಬರುವ ನಾಗರಿಕರ ಅನುಕೂಲಕ್ಕಾಗಿ ಡಿಸೆಂಬರ್ 31ರ ಮಧ್ಯರಾತ್ರಿಯ ನಂತರವೂ ರೈಲು ಸೇವೆ ಲಭ್ಯವಿರಲಿದೆ ಎಂದು ಬಿಎಂಆರ್ಸಿಎಲ್ ಪ್ರಕಟಣೆಯಲ್ಲಿ ತಿಳಿಸಿದೆ.
ಯಾವ ಮಾರ್ಗದಲ್ಲಿ ಎಲ್ಲಿಯವರೆಗೆ ಸಂಚಾರ?
ಹೊಸ ವರ್ಷದ ಸಂಭ್ರಮ ಮುಗಿಸಿ ಮನೆಗೆ ಮರಳುವವರಿಗಾಗಿ ಜನವರಿ 1ರ ಮುಂಜಾನೆ ರೈಲುಗಳು ಸಂಚರಿಸಲಿವೆ. ನೇರಳೆ ಮಾರ್ಗದಲ್ಲಿ (Purple Line) ವೈಟ್ಫೀಲ್ಡ್ನಿಂದ ಚಳ್ಳಘಟ್ಟಕ್ಕೆ ತೆರಳುವ ಕೊನೆಯ ರೈಲು ಮುಂಜಾನೆ 1:45ಕ್ಕೆ ಹೊರಟರೆ, ಚಳ್ಳಘಟ್ಟದಿಂದ ವೈಟ್ಫೀಲ್ಡ್ ಕಡೆಗೆ ಹೋಗುವ ರೈಲು ಮುಂಜಾನೆ 2:00 ಗಂಟೆಗೆ ಲಭ್ಯವಿರಲಿದೆ.
ಅದೇ ರೀತಿ, ಹಸಿರು ಮಾರ್ಗದಲ್ಲಿ (Green Line) ಮಾದಾವರ ಮತ್ತು ರೇಷ್ಮೆ ಸಂಸ್ಥೆ ನಿಲ್ದಾಣಗಳ ನಡುವೆ ಎರಡು ದಿಕ್ಕಿನಿಂದಲೂ ಕೊನೆಯ ರೈಲುಗಳು ಮುಂಜಾನೆ 2:00 ಗಂಟೆಗೆ ಹೊರಡಲಿವೆ. ಇನ್ನು ಹೊಸದಾಗಿ ಆರಂಭವಾಗಿರುವ ಹಳದಿ ಮಾರ್ಗದಲ್ಲಿ (Yellow Line) ಆರ್.ವಿ ರಸ್ತೆಯಿಂದ ಬೊಮ್ಮಸಂದ್ರಕ್ಕೆ ಮುಂಜಾನೆ 3:10ಕ್ಕೆ ಕೊನೆಯ ರೈಲು ಇರಲಿದ್ದು, ಬೊಮ್ಮಸಂದ್ರದಿಂದ ಆರ್.ವಿ ರಸ್ತೆಯ ಕಡೆಗೆ ನಸುಕಿನ ಜಾವ 1:30ಕ್ಕೆ ಕೊನೆಯ ರೈಲು ಸಂಚರಿಸಲಿದೆ.
ಮೆಜೆಸ್ಟಿಕ್ನಲ್ಲಿ ಸಂಪರ್ಕ ರೈಲುಗಳ ವ್ಯವಸ್ಥೆ
ನಗರದ ಹೃದಯಭಾಗವಾದ ನಾಡಪ್ರಭು ಕೆಂಪೇಗೌಡ ನಿಲ್ದಾಣದಲ್ಲಿ (ಮೆಜೆಸ್ಟಿಕ್) ಎಲ್ಲಾ ನಾಲ್ಕೂ ಮಾರ್ಗಗಳ ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ವಿಶೇಷ ವ್ಯವಸ್ಥೆ ಮಾಡಲಾಗಿದೆ. ಮೆಜೆಸ್ಟಿಕ್ನಿಂದ ನೇರಳೆ ಮತ್ತು ಹಸಿರು ಮಾರ್ಗದ ವಿವಿಧ ದಿಕ್ಕುಗಳಿಗೆ ತೆರಳುವ ಕೊನೆಯ ರೈಲುಗಳು ಜನವರಿ 1ರ ಮುಂಜಾನೆ 2:45ಕ್ಕೆ ಹೊರಡಲಿವೆ. ಹೀಗಾಗಿ ಪ್ರಯಾಣಿಕರು ಯಾವುದೇ ಆತಂಕವಿಲ್ಲದೆ ಸಂಭ್ರಮಾಚರಣೆಯಲ್ಲಿ ಪಾಲ್ಗೊಳ್ಳಬಹುದಾಗಿದೆ.
ಸಂಚಾರ ಅವಧಿ ಮತ್ತು ದಟ್ಟಣೆ ನಿಯಂತ್ರಣ
ಡಿಸೆಂಬರ್ 31ರ ರಾತ್ರಿ 11:30ರ ನಂತರ ನೇರಳೆ ಮತ್ತು ಹಸಿರು ಮಾರ್ಗಗಳಲ್ಲಿ ಪ್ರತಿ 8 ನಿಮಿಷಕ್ಕೊಮ್ಮೆ ರೈಲುಗಳು ಸಂಚರಿಸಲಿವೆ. ಹಳದಿ ಮಾರ್ಗದಲ್ಲಿ ಪ್ರತಿ 15 ನಿಮಿಷಕ್ಕೊಮ್ಮೆ ರೈಲು ಸೇವೆ ಲಭ್ಯವಿರುತ್ತದೆ. ಎಂ.ಜಿ. ರಸ್ತೆಯಲ್ಲಿ ಜನದಟ್ಟಣೆ ಹೆಚ್ಚಿರುವ ಕಾರಣ ರಾತ್ರಿ 10:00 ಗಂಟೆಯ ನಂತರ ಆ ನಿಲ್ದಾಣವನ್ನು ಮುಚ್ಚಲಾಗುತ್ತಿದ್ದು, ಪ್ರಯಾಣಿಕರು ಪಕ್ಕದ ಟ್ರಿನಿಟಿ ಅಥವಾ ಕಬ್ಬನ್ ಪಾರ್ಕ್ ನಿಲ್ದಾಣಗಳನ್ನು ಬಳಸುವಂತೆ ಸೂಚಿಸಲಾಗಿದೆ.
ಹೆಚ್ಚಿನ ದಟ್ಟಣೆ ತಪ್ಪಿಸಲು ಪ್ರಯಾಣಿಕರು ಮುಂಚಿತವಾಗಿಯೇ ಸ್ಮಾರ್ಟ್ ಕಾರ್ಡ್ ಅಥವಾ ಕ್ಯೂಆರ್ ಟಿಕೆಟ್ಗಳನ್ನು ಬಳಸುವಂತೆ ಹಾಗೂ ಮೆಟ್ರೋ ಭದ್ರತಾ ಸಿಬ್ಬಂದಿಯೊಂದಿಗೆ ಸಹಕರಿಸುವಂತೆ ಬಿಎಂಆರ್ಸಿಎಲ್ ಮನವಿ ಮಾಡಿದೆ.
