ದಕ್ಷಿಣ ಭಾರತದ ಮನೆಗಳಲ್ಲಿ ಇಡ್ಲಿ, ದೋಸೆ ಅಥವಾ ಬಿಸಿಬಿಸಿ ಅನ್ನದ ಜೊತೆ ಚಟ್ನಿ ಪೋಡಿ (ಗುನ್‌ಪೌಡರ್) ಬಳಸುವುದು ಸಾಮಾನ್ಯ. ಸಾಮಾನ್ಯವಾಗಿ ಉದ್ದಿನಬೇಳೆ, ಕಡಲೆಬೇಳೆ, ಒಣಮೆಣಸಿನಕಾಯಿ ಹಾಗೂ ಬೆಳ್ಳುಳ್ಳಿ ಬಳಸಿ ಮಾಡುವ ಈ ಪೋಡಿಗೆ ಹೊಸ ರೂಪ ನೀಡಿ, ಇನ್ನಷ್ಟು ಪೌಷ್ಟಿಕವಾಗಿಸುವ ಉಪಾಯ ಇಲ್ಲಿದೆ. ನುಗ್ಗೆಸೊಪ್ಪು ಬಳಸಿ ಮಾಡುವ ‘ಮೊರಿಂಗಾ ಪೋಡಿ’ (Moringa Podi) ಆರೋಗ್ಯಕ್ಕೆ ಅತ್ಯುತ್ತಮವಾಗಿದ್ದು, ಮನೆಯಲ್ಲೇ ಸುಲಭವಾಗಿ ತಯಾರಿಸಿ ಹಲವು ದಿನಗಳ ಕಾಲ ಶೇಖರಿಸಿಡಬಹುದು.
ಇನ್‌ಸ್ಟಾಗ್ರಾಮ್ ಕ್ರಿಯೇಟರ್ ನಿತ್ಯಾ ಹೆಗ್ಡೆ ಅವರು ಹಂಚಿಕೊಂಡಿರುವ ಈ ವಿಶೇಷ ನುಗ್ಗೆಸೊಪ್ಪಿನ ಪೋಡಿ ರೆಸಿಪಿಯನ್ನು ಸುಲಭವಾಗಿ ಮಾಡುವ ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು
ಕಾಲು ಕಪ್ ಉದ್ದಿನಬೇಳೆ, ಕಾಲು ಕಪ್ ಹುರಿಗಡಲೆ, ಕಾಲು ಕಪ್ ಎಳ್ಳು (ಬಿಳಿ ಮತ್ತು ಕಪ್ಪು ಎಳ್ಳಿನ ಮಿಶ್ರಣ), 4 ಒಣಮೆಣಸಿನಕಾಯಿ (2 ಬ್ಯಾಡಗಿ ಹಾಗೂ 2 ಖಾರದ ಮೆಣಸಿನಕಾಯಿ), 1 ಟೀಚಮಚ ಜೀರಿಗೆ, 1 ಟೀಚಮಚ ಕಾಳುಮೆಣಸು, ಕಾಲು ಕಪ್ ಒಣಕೊಬ್ಬರಿ ಧೂಳು ಅಥವಾ ಚೂರುಗಳು, 3 ಹಿಡಿ ತಾಜಾ ನುಗ್ಗೆಸೊಪ್ಪು.
ಒಗ್ಗರಣೆ ಹಾಗೂ ರುಚಿಗೆ: 1 ಟೀಚಮಚ ಉಪ್ಪು, ಚಿಟಿಕೆ ಇಂಗು, 1 ಟೇಬಲ್ ಚಮಚ ಸಕ್ಕರೆ, ಕಾಲು ಟೀಚಮಚ ಅರಿಶಿನ ಪುಡಿ.
ತಯಾರಿಸುವ ವಿಧಾನ
ಮೊದಲು ಬಾಂಡಲಿಯಲ್ಲಿ ಉದ್ದಿನಬೇಳೆ, ಹುರಿಗಡಲೆ, ಎಳ್ಳು, ಒಣಮೆಣಸಿನಕಾಯಿ, ಜೀರಿಗೆ, ಕಾಳುಮೆಣಸು ಹಾಗೂ ಒಣಕೊಬ್ಬರಿಯನ್ನು ಸಣ್ಣ ಉರಿಯಲ್ಲಿ ಕೆಂಪಗೆ ಹುರಿದುಕೊಂಡು ಸಂಪೂರ್ಣವಾಗಿ ತಣ್ಣಗಾಗಲು ಬಿಡಿ.
ನಂತರ ನುಗ್ಗೆಸೊಪ್ಪನ್ನು ಕಡ್ಡಿಯಿಂದ ಬೇರ್ಪಡಿಸಿ, ಚೆನ್ನಾಗಿ ತೊಳೆದು ನೀರಿಲ್ಲದಂತೆ ಒಣ ಬಟ್ಟೆಯ ಮೇಲೆ ಹರಡಿ ಆರಿಸಿಕೊಳ್ಳಿ. ನೀರಾಟ ಸಂಪೂರ್ಣವಾಗಿ ಆರಿದ ಮೇಲೆ, ನುಗ್ಗೆಸೊಪ್ಪನ್ನು ಬಾಂಡಲಿಯಲ್ಲಿ ಹಾಕಿ ಸಣ್ಣ ಉರಿಯಲ್ಲಿ ಮಂದವಾಗಿ ಹುರಿಯಿರಿ. ಸೊಪ್ಪು ಪೂರ್ತಿ ಕರಂ ಕುರಂ ಆಗುವವರೆಗೆ ಹುರಿಯುವುದು ಮುಖ್ಯ.
ಎಲ್ಲಾ ಪದಾರ್ಥಗಳು ತಣ್ಣಗಾದ ನಂತರ, ಮಿಕ್ಸಿ ಜಾರ್‌ಗೆ ಹುರಿದ ಪದಾರ್ಥಗಳು, ನುಗ್ಗೆಸೊಪ್ಪು, ಉಪ್ಪು, ಇಂಗು, ಸಕ್ಕರೆ ಹಾಗೂ ಅರಿಶಿನ ಪುಡಿ ಸೇರಿಸಿ ನುಣ್ಣಗೆ ಪುಡಿ ಮಾಡಿ.
ಶೇಖರಣೆ ಮತ್ತು ಬಳಕೆಯ ವಿವರ
ಈ ಪೋಡಿಯಲ್ಲಿ ಒಣಕೊಬ್ಬರಿ ಬಳಸಿರುವುದರಿಂದ ಗಾಳಿಯಾಡದ ಡಬ್ಬಿಯಲ್ಲಿ ಹಾಕಿ ಫ್ರಿಡ್ಜ್‌ನಲ್ಲಿಟ್ಟರೆ 3 ತಿಂಗಳವರೆಗೆ ಹಾಳಾಗುವುದಿಲ್ಲ. ಸಾಮಾನ್ಯ ತಾಪಮಾನದಲ್ಲಿಟ್ಟರೆ 15 ದಿನಗಳ ಒಳಗಾಗಿ ಬಳಸುವುದು ಸೂಕ್ತ. ತೇವಾಂಶ ತಗಲದಂತೆ ಒಣ ಚಮಚವನ್ನೇ ಬಳಸಿ.
ಈ ನುಗ್ಗೆಸೊಪ್ಪಿನ ಪೋಡಿಯನ್ನು ಇಡ್ಲಿ, ದೋಸೆ, ಚಪಾತಿ, ಪರೋಟಾ ಮೇಲೆ ಉದುರಿಸಿಕೊಂಡು ಅಥವಾ ಸ್ವಲ್ಪ ತುಪ್ಪ ಅಥವಾ ಎಣ್ಣೆ ಜೊತೆ ಬೆರೆಸಿ ಸೇವಿಸಿದರೆ ರುಚಿ ಹೆಚ್ಚುವುದರ ಜೊತೆಗೆ ದೇಹಕ್ಕೆ ನುಗ್ಗೆಸೊಪ್ಪಿನ ಪೂರ್ಣ ಪೋಷಕಾಂಶಗಳು ಸಿಗುತ್ತವೆ.
