ಹಿಂದೂ ವಿವಾಹ ಕಾಯ್ದೆಯಡಿ ಕೇವಲ ಆರ್ಯ ಸಮಾಜ ಮಂದಿರವು ನೀಡಿದ ವಿವಾಹ ಪ್ರಮಾಣಪತ್ರವನ್ನು ಹಾಜರುಪಡಿಸಿದ ಮಾತ್ರಕ್ಕೆ ಮದುವೆ ಶಾಸ್ತ್ರೋಕ್ತವಾಗಿ ಹಾಗೂ ಕಾನೂನುಬದ್ಧವಾಗಿ ನಡೆದಿದೆ ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಅಲಹಾಬಾದ್ ಹೈಕೋರ್ಟ್‌ನ ಲಖನೌ ಪೀಠ ಮಹತ್ವದ ತೀರ್ಪು ನೀಡಿದೆ. ಹಿಂದೂ ವಿವಾಹವು ಕಾನೂನಿನ ಪ್ರಕಾರ ಮಾನ್ಯವಾಗಬೇಕಾದರೆ ‘ಸಪ್ತಪದಿ’ ಸೇರಿದಂತೆ ಧಾರ್ಮಿಕ ವಿಧಿವಿಧಾನಗಳು ಕಡ್ಡಾಯವಾಗಿ ನೆರವೇರಿರಬೇಕು ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
ಪ್ರತಾಪ್‌ಗಢ ಜಿಲ್ಲೆಯ ಸಶಸ್ತ್ರ ಸೀಮಾ ಬಲ (ಎಸ್‌ಎಸ್‌ಬಿ) ಅಧಿಕಾರಿಯಾದ ರೋಹಿತ್ ಪಾಂಡೆ ಅವರನ್ನು ಸೇವೆಯಿಂದ ವಜಾಗೊಳಿಸಿ ಹೊರಡಿಸಲಾಗಿದ್ದ ಆದೇಶವನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ರಾಜೀವ್ ಸಿಂಗ್ ಅವರಿದ್ದ ಪೀಠವು ಈ ಆದೇಶ ನೀಡಿದೆ. ಸೇವೆಗೆ ಸೇರುವ ಸಂದರ್ಭದಲ್ಲಿ ತಮ್ಮ ವೈವಾಹಿಕ ಸ್ಥಿತಿಯ ಬಗ್ಗೆ ತಪ್ಪು ಮಾಹಿತಿ ನೀಡಿದ್ದಾರೆ ಎಂಬ ಆರೋಪದ ಮೇಲೆ ಪಾಂಡೆ ಅವರನ್ನು ಇಲಾಖೆ ಕರ್ತವ್ಯದಿಂದ ವಜಾಗೊಳಿಸಿತ್ತು.
ಪ್ರಕರಣದ ಹಿನ್ನೆಲೆಯ ಪ್ರಕಾರ, ರೋಹಿತ್ ಪಾಂಡೆ ಅವರು 2007 ರಲ್ಲಿ ಆರ್ಯ ಸಮಾಜ ಮಂದಿರವೊಂದರಲ್ಲಿ ತಮ್ಮನ್ನು ವಿವಾಹವಾಗಿದ್ದರು ಎಂದು ಮಹಿಳೆಯೊಬ್ಬರು ಇಲಾಖೆಗೆ ದೂರು ನೀಡಿದ್ದರು. ಇಲಾಖಾ ವಿಚಾರಣೆ ವೇಳೆ ಆರ್ಯ ಸಮಾಜ ಮಂದಿರದ ಅರ್ಚಕರು ಮದುವೆ ನಡೆದಿದ್ದನ್ನು ದೃಢಪಡಿಸಿದ್ದರು ಹಾಗೂ ನೋಟರಿ ಪ್ರಮಾಣಪತ್ರಗಳನ್ನೂ ಹಾಜರುಪಡಿಸಲಾಗಿತ್ತು. ಆದರೆ, ಕ್ರಿಮಿನಲ್ ಪ್ರಕರಣವೊಂದರ ವಿಚಾರಣೆ ವೇಳೆ ಅದೇ ಮಹಿಳೆ, ಈ ವಿವಾಹವು ಯಾವುದೇ ಹಿಂದೂ ಸಂಪ್ರದಾಯಗಳು ಅಥವಾ ಪವಿತ್ರ ಅಗ್ನಿಯ ಸುತ್ತ ನಡೆಯುವ ‘ಸಪ್ತಪದಿ’ ಆಚರಣೆಯೊಂದಿಗೆ ನೆರವೇರಿರಲಿಲ್ಲ ಎಂಬುದನ್ನು ಸ್ವತಃ ಒಪ್ಪಿಕೊಂಡಿದ್ದರು.
ಈ ಅಂಶವನ್ನು ಪರಿಗಣಿಸಿದ ಹೈಕೋರ್ಟ್, ಸುಪ್ರೀಂ ಕೋರ್ಟ್‌ನ ಹಿಂದಿನ ತೀರ್ಪುಗಳನ್ನು ಉಲ್ಲೇಖಿಸಿ, ಹಿಂದೂ ವಿವಾಹ ಕಾಯ್ದೆಯ ಪ್ರಕಾರ ಸಂಪ್ರದಾಯಬದ್ಧ ವಿಧಿವಿಧಾನಗಳಿಲ್ಲದೆ ಕೇವಲ ಆರ್ಯ ಸಮಾಜದ ಪ್ರಮಾಣಪತ್ರದ ಆಧಾರದಲ್ಲಿ ಅದನ್ನು ಕಾನೂನುಬದ್ಧ ವಿವಾಹವೆಂದು ಪರಿಗಣಿಸಲಾಗದು ಎಂದು ಅಭಿಪ್ರಾಯಪಟ್ಟಿತು. ಆದ್ದರಿಂದ, ಅಧಿಕಾರಿಯು ತಪ್ಪು ಮಾಹಿತಿ ನೀಡಿದ್ದಾರೆ ಎಂಬ ಕಾರಣ ನೀಡಿ ಸೇವೆಯಿಂದ ವಜಾಗೊಳಿಸಿರುವುದು ಕಾನೂನುಬಾಹಿರ ಎಂದು ನ್ಯಾಯಾಲಯ ತೀರ್ಪು ನೀಡಿದೆ.
2022 ರ ಏಪ್ರಿಲ್ 28 ರಂದು ಹೊರಡಿಸಲಾಗಿದ್ದ ವಜಾ ಆದೇಶವನ್ನು ರದ್ದುಪಡಿಸಿದ ನ್ಯಾಯಾಲಯ, ಅಧಿಕಾರಿಯನ್ನು ತಕ್ಷಣದಿಂದಲೇ ಕರ್ತವ್ಯಕ್ಕೆ ಮರುಸೇರ್ಪಡೆ ಮಾಡಿಕೊಳ್ಳುವಂತೆ ಆದೇಶಿಸಿದೆ. ವಜಾಗೊಂಡಿದ್ದ ದಿನದಿಂದ ತೀರ್ಪಿನ ದಿನಾಂಕದವರೆಗಿನ ಅವಧಿಯನ್ನು ‘ಕೆಲಸವಿಲ್ಲ, ವೇತನವಿಲ್ಲ’ (No work, no pay) ಎಂದು ಪರಿಗಣಿಸಲು ಮತ್ತು ಅವರ ಸೇವೆಯಲ್ಲಿ ಯಾವುದೇ ವಿರಾಮ (ಬ್ರೇಕ್ ಇನ್ ಸರ್ವೀಸ್) ಎಂದು ಪರಿಗಣಿಸದಂತೆ ಸೂಚಿಸಿದೆ.
