ಮದರಸಾದಲ್ಲಿ ಸರಪಳಿಯಿಂದ ಬಾಲಕನ ಬಂಧಿಸಿ 2 ದಿನ ಊಟ ಕೊಡದೇ ಅಮಾನವೀಯ ಥಳಿತ: ತನಿಖೆಗೆ ಆದೇಶ

ಸಹರಾನ್‌ ಪುರ: ಮದರಸಾದಲ್ಲಿ ಓದುತ್ತಿದ್ದ ಅಪ್ರಾಪ್ತ ಬಾಲಕನನ್ನು ಅಮಾನವೀಯವಾಗಿ ನಡೆಸಿಕೊಂಡ ನಾಚಿಕೆಗೇಡಿನ ಘಟನೆ ಉತ್ತರ ಪ್ರದೇಶದಿಂದ ಬೆಳಕಿಗೆ ಬಂದಿದೆ.

ಉತ್ತರ ಪ್ರದೇಶದ ಸಹರಾನ್‌ ಪುರದ ಮದರಸಾದಲ್ಲಿ 10 ವರ್ಷದ ಬಾಲಕನನ್ನು ಸರಪಳಿಯಿಂದ ಬಂಧಿಸಿ ಥಳಿಸಲಾಗಿದೆ. ಸಹರಾನ್‌ಪುರ ಜಿಲ್ಲೆಯ ಟಿಟ್ರಾನ್ ಪ್ರದೇಶದ ಮದರಸಾದಲ್ಲಿ ಅಪ್ರಾಪ್ತ ಬಾಲಕನಿಗೆ ಎರಡು ದಿನಗಳ ಕಾಲ ತಿನ್ನಲು ಆಹಾರವನ್ನು ಕೊಟ್ಟಿಲ್ಲ. ಸಂತ್ರಸ್ತ ಹೇಗೋ ಮದರಸಾದಿಂದ ತಪ್ಪಿಸಿಕೊಂಡು ಮೊಹಮ್ಮದ್‌ಪುರ ಗುರ್ಜರ್ ಗ್ರಾಮದ ನಿವಾಸಿ ರಾಮ್‌ ಕುಮಾರ್ ಅವರ ಮನೆಗೆ ತಲುಪಿದ್ದಾನೆ.

ಬಾಲಕನ ನೋಡಿ ಬೆಚ್ಚಿಬಿದ್ದ ಗ್ರಾಮಸ್ಥರು 

ಸರಪಳಿಯಲ್ಲಿ ಕಟ್ಟಿ ಹಾಕಲಾಗಿದ್ದ ಮಗುವನ್ನು ನೋಡಿದ ಗ್ರಾಮಸ್ಥರು ಬೆಚ್ಚಿಬಿದ್ದು, ಬಾಲಕನಿಗೆ ಏನಾಗಿದೆ ಎಂದು ವಿಚಾರಿಸಿದ್ದಾರೆ. ತಾನು ಪಕ್ಕದ ಬಳ್ಳು ಗ್ರಾಮದ ನಿವಾಸಿ ಎಂದು ಬಾಲಕ ತಿಳಿಸಿದ್ದು, ಮದರಸಾದಲ್ಲಿ ತಾನು ಅನುಭವಿಸಿದ ಸಂಕಟವನ್ನೂ ಹೇಳಿಕೊಂಡಿದ್ದಾನೆ. ನಂತರ ಗ್ರಾಮಸ್ಥರು ಅಪ್ರಾಪ್ತ ಬಾಲಕನಿಂದ ವಿವರ ಪಡೆದು ಆತನ ಸಂಬಂಧಿಕರಿಗೆ ಕರೆ ಮಾಡಿದ್ದಾರೆ. ಆತನ ಕುಟುಂಬಸ್ಥರು ಗ್ರಾಮಕ್ಕೆ ಆಗಮಿಸಿ ಮಗುವನ್ನು ಕರೆದುಕೊಂಡು ಹೋಗಿದ್ದಾರೆ.

ಮಗುವಿನೊಂದಿಗೆ ಠಾಣೆಗೆ ತೆರಳಿ ದೂರು

ಮಗುವಿನೊಂದಿಗೆ ಪೊಲೀಸ್ ಠಾಣೆಗೆ ಆಗಮಿಸಿದ ಅವರು ದೂರು ದಾಖಲಿಸಿದ್ದಾರೆ. ಪೊಲೀಸರು ಮದರಸಾ ಮುಖ್ಯಸ್ಥ ಮತ್ತು ಮಗುವಿನ ಅಜ್ಜನ ವಿರುದ್ಧ ಬಾಲಾಪರಾಧಿ ಕಾಯ್ದೆ 2015 ರ ಸೆಕ್ಷನ್ 75 ಸೇರಿದಂತೆ ಸಂಬಂಧಿತ ಸೆಕ್ಷನ್‌ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಮದರಸಾದೊಳಗೆ ಸುಮಾರು ಎರಡು ದಿನಗಳ ಕಾಲ ಸರಪಳಿಯಿಂದ ಬಂಧಿಸಿ ನಂತರ ಮದರಸಾ ಮುಖ್ಯಸ್ಥ ತನ್ನನ್ನು ಅಮಾನವೀಯವಾಗಿ ಥಳಿಸಿದ್ದಾರೆ ಎಂದು ಬಾಲಕ ಹೇಳಿದ್ದಾನೆ.

ಮಗುವಿನ ತಂದೆಗೆ ಬಿಹಾರದಲ್ಲಿ ಕೆಲಸ

ಮಗುವಿನ ತಂದೆ ಬಿಹಾರದಲ್ಲಿ ದೋಣಿಗಾರನಾಗಿ ಕೆಲಸ ಮಾಡುತ್ತಿದ್ದಾನೆ ಮತ್ತು ಅವನ ತಾಯಿ ಅವನನ್ನು ಓದಲು ಮದ್ರಸಾಕ್ಕೆ ಕಳುಹಿಸಿದರು. ತಾಯಿ ತನಗೆ ಊಟ ಕಳುಹಿಸಿದ್ದರೂ ಮದರಸಾದಲ್ಲಿ ಊಟ ನೀಡಿಲ್ಲ ಎಂದು ಬಹಿರಂಗಪಡಿಸಿದ್ದಾರೆ. ಮಗು ಕೆಟ್ಟ ಸಹವಾಸದಲ್ಲಿದ್ದ ಕಾರಣ ಆತನಲ್ಲಿ ಕೆಲವು ಮೌಲ್ಯಗಳನ್ನು ಅಳವಡಿಸಲು ಶಿಕ್ಷೆ ವಿಧಿಸಲಾಗಿದೆ ಎಂದು ಮದರಸಾ ಸ್ಪಷ್ಟಪಡಿಸಿದೆ ಮತ್ತು ಮಗುವನ್ನು ಹೆದರಿಸಲು ಮದರಸಾ ತೀವ್ರ ಕ್ರಮ ಕೈಗೊಂಡಿದೆ. ಆದರೆ, ತಮ್ಮ ಮಗುವಿಗೆ ಶಿಕ್ಷೆಯ ಬಗ್ಗೆ ಅವರ ಕುಟುಂಬಕ್ಕೆ ಏಕೆ ತಿಳಿಸಲಿಲ್ಲ ಎಂಬುದಕ್ಕೆ ಮದ್ರಸಾ ಮುಖ್ಯಸ್ಥರು ಉತ್ತರಿಸಲಿಲ್ಲ.

ಈ ಸಂಬಂಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಆರಂಭಿಸಿದ್ದಾರೆ. ಈ ಸಂಬಂಧ ತನಿಖೆ ನಡೆಸಿ ಆರೋಪಿಗಳ ಪತ್ತೆಗೆ ತಂಡ ರಚಿಸಿದ್ದೇವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿಗಳು ಅಪರಾಧ ಎಸಗಿದ್ದರೆ ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಮತ್ತು ತಪ್ಪಿತಸ್ಥರನ್ನು ಬಿಡುವುದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.