ʼಪಠಾಣ್ʼ​ ಹಾಡಿಗೆ ಕೊಹ್ಲಿ ಸ್ಟೆಪ್​: ಸೂಪರ್​ ಎಂದ ಶಾರುಖ್​ ಖಾನ್​

ಶಾರುಖ್​ ಖಾನ್​ ನಟನೆಯ ʼಪಠಾಣ್ʼ​ ಚಿತ್ರ ಭರ್ಜರಿ ಯಶಸ್ಸು ಕಾಣುತ್ತಿರುವ ಬೆನ್ನಲ್ಲೇ ಹಲವರು ಇದರ ಹಾಡಿಗೆ ನೃತ್ಯ ಮಾಡುವ ವಿಡಿಯೋಗಳು ವೈರಲ್ ಆಗುತ್ತಿವೆ. ಈ ಹುಚ್ಚು ಕ್ರಿಕೆಟ್​ ತಾರೆಯರನ್ನೂ ಬಿಟ್ಟಿಲ್ಲ. ಕ್ರಿಕೆಟಿಗರಾದ ವಿರಾಟ್ ಕೊಹ್ಲಿ ಮತ್ತು ರವೀಂದ್ರ ಜಡೇಜಾ ಮೈದಾನದಲ್ಲಿ ‘ಜೂಮ್ ಜೋ ಪಠಾನ್’ ಗೆ ನೃತ್ಯ ಮಾಡಿದ್ದು ಅದೀಗ ವೈರಲ್​ ಆಗಿದೆ.

ಇದರ ವಿಡಿಯೋವನ್ನು ಅವರ ಅಭಿಮಾನಿಯೊಬ್ಬರು ಹಂಚಿಕೊಂಡಿದ್ದಾರೆ. ನಂತರ ಅದನ್ನು ಶಾರುಖ್​ ಖಾನ್​ ಅವರಿಗೆ ಟ್ಯಾಗ್​ ಮಾಡಿ ಈ ಬಗ್ಗೆ ಒಂದೆರಡು ಮಾತನಾಡಿ ಎಂದಿದ್ದಾರೆ.

ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ನಟ ಶಾರುಖ್​ ಖಾನ್​, “ಅವರು ನನಗಿಂತ ಉತ್ತಮವಾಗಿ ನೃತ್ಯ ಮಾಡಿದ್ದಾರೆ. ನೃತ್ಯ ಮಾಡುವುದನ್ನು ವಿರಾಟ್ ಮತ್ತು ಜಡೇಜಾ ಅವರಿಂದ ನಾನು ಕಲಿಯಬೇಕು” ಎಂದಿದ್ದಾರೆ. ಇದನ್ನು ಓದಿ ಶಾರುಖ್​ ಅಭಿಮಾನಿಗಳು ಶಾರುಖ್​ ಕುರಿತು ಹಾಡಿ ಹೊಗಳುತ್ತಿದ್ದಾರೆ.

ಅಷ್ಟಕ್ಕೂ ಕೊಹ್ಲಿ ಮತ್ತು ಜಡೇಜಾ ಈ ನೃತ್ಯಕ್ಕೆ ಹೆಜ್ಜೆ ಹಾಕಿದ್ದು ನಾಗ್ಪುರದಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಭಾರತದ ಮೊದಲ ಟೆಸ್ಟ್ ಪಂದ್ಯದ ಸಂದರ್ಭದಲ್ಲಿ. ಮೊದಲಿಗೆ ಕೊಹ್ಲಿ ಪಠಾಣ್‌ ಚಿತ್ರದ ಹಾಡಿಗೆ ನರ್ತಿಸಿದ್ದರು. ನಂತರ ರವೀಂದ್ರ ಜಡೇಜಾ ಅವರನ್ನು ಸೇರಿಕೊಂಡು ತಾವೂ ಹೆಜ್ಜೆ ಹಾಕಿದ್ದರು.