ಸಂಪೂರ್ಣ ಹಿಮದಿಂದ ಆವೃತವಾಗಿ ಕಾಶ್ಮೀರದ ಬಾರಾಮುಲ್ಲಾ ನಿಲ್ದಾಣವನ್ನು ಪ್ರವೇಶಿಸುವ ರೈಲನ್ನ ನೋಡುವುದೆ ಕಣ್ಣಿಗೆ ಹಬ್ಬ. ಅದ್ರಲ್ಲು ಚಳಿಗಾಲದ ಉತ್ತುಂಗದಲ್ಲಿ, ನೆಲವು ದಟ್ಟವಾದ ಬಿಳಿ ಹಿಮದಿಂದ ಆವೃತವಾಗಿರುವಾಗ, ಉತ್ತರ ಕಾಶ್ಮೀರದ ಬನಿಹಾಲ್‌ಗೆ ಬಾರಾಮುಲ್ಲಾದಿಂದ ಮೂರು ಗಂಟೆಗಳ ರೈಲು ಪ್ರಯಾಣ ಮಾಡುವ ಮಜವೇ ಬೇರೆ. ಪ್ರಯಾಣದ ಹಾದಿಯಲ್ಲಿ ಕಾಣ ಸಿಗುವ ಸುಂದರ ದೃಶ್ಯಗಳು ಪ್ರಕೃತಿಯ ಸೌಂದರ್ಯಕ್ಕೆ ಹಿಡಿದ ಕನ್ನಡಿ.
ಬಾರಾಮುಲ್ಲಾದಿಂದ ಬನಿಹಾಲ್‌ಗೆ ಮೂರು ಗಂಟೆಗಳ ಪ್ರಯಾಣ. ಈ ಮಾರ್ಗದಲ್ಲಿ ಜಮ್ಮು ಮತ್ತು ಕಾಶ್ಮೀರದ ಕೆಲವು ಸುಂದರವಾದ ಭೂದೃಶ್ಯಗಳನ್ನ ಕಾಣಬಹುದು. ಹಿಮದಿಂದ ಆವೃತವಾದ ಬೆಟ್ಟಗಳಿಂದ ಹಿಡಿದು ಗಾಳಿಯಲ್ಲಿ ನಿಧಾನವಾಗಿ ತೂಗಾಡುವ ಚಳಿಗಾಲದ ಮರಗಳನ್ನು ಈ ಪ್ರಯಾಣದಲ್ಲಿ ಕಣ್ತುಂಬಿಕೊಳ್ಳಬಹುದು. ಈ ಬಾರಾಮುಲ್ಲಾ-ಬನಿಹಾಲ್ ರೈಲು ಪ್ರಯಾಣದ ಅದ್ಭುತ ವಿಡಿಯೋ ಹಂಚಿಕೊಂಡಿರುವ ಭಾರತೀಯ ರೈಲ್ವೇ, ದೇಶದ ಭೌಗೋಳಿಕ ವಿವಿಧತೆಯನ್ನ ತೋರಿಸಿದೆ.
ಚಳಿಗಾಲದಲ್ಲಿ ಸುರಿಯುವ ಭಾರೀ ಹಿಮ ಕಾಶ್ಮೀರ ಕಣಿವೆಯ ಪ್ರಮುಖ ದಾರಿಯನ್ನ ತಡೆಯುವುದರಿಂದ, ಈ ರೈಲು ಪ್ರಯಾಣಿಕರಲ್ಲಿ ಅತ್ಯಂತ ಜನಪ್ರಿಯವಾಗಿದೆ. ಕಾಶ್ಮೀರ ಕಣಿವೆಯನ್ನು ಹೊರಗಿನ ಪ್ರಪಂಚದೊಂದಿಗೆ ಸಂಪರ್ಕಿಸುವ ಈ ಮಾರ್ಗ ಪ್ರಯಾಣದ ಸಮಯವನ್ನು ಕಡಿತಗೊಳಿಸುವುದರ ಜೊತೆಗೆ ಸುರಕ್ಷಿತವಾಗಿದೆ. ವಾರದ ಹಿಂದೆ ಪ್ರದೇಶದಲ್ಲಾದ ಭಾರೀ ಹಿಮಪಾತದಿಂದಾಗಿ, ಬಾರಾಮುಲ್ಲಾ-ಬನಿಹಾಲ್ ನಡುವಿನ 136 ಕಿಮೀ ರೈಲು ಸೇವೆಯನ್ನು ಸ್ಥಗಿತಗೊಳಿಸಲಾಗಿತ್ತು. ಗುಲ್ಮಾರ್ಗ್ ಮತ್ತು ಪಹಲ್ಗಾಮ್‌ನಲ್ಲಿ ತೀವ್ರವಾದ ಶೀತ ಪರಿಸ್ಥಿತಿಯಲ್ಲಿದ್ದು, ಕಾಶ್ಮೀರ ಕಣಿವೆಗೆ 0 ಡಿಗ್ರಿ ತಾಪಮಾನ ಮರಳಿದೆ ಎಂದು ಅಧಿಕಾರಿಗಳು ಮಂಗಳವಾರ ತಿಳಿಸಿದ್ದಾರೆ.
Loading ...