ಭಾರೀ ಗಾತ್ರದ ಅಪರೂಪದ ಜೇಡವೊಂದು ಆಸ್ಟ್ರೇಲಿಯಾದ ಕ್ವೀನ್ಸ್ಲ್ಯಾಂಡ್ ನಲ್ಲಿ ಪತ್ತೆಯಾಗಿದೆ. ಕೇಂದ್ರ ಕ್ವೀನ್ಸ್‌ಲ್ಯಾಂಡ್‌ನ ಬ್ರಿಗಾಲೋ ಬೆಲ್ಟ್‌ನಲ್ಲಿ ಈ ಜೇಡ ಕಂಡುಬಂದಿದೆ.
’ಟ್ರ‍್ಯಾಪ್‌ಡೋರ್‌ ಸ್ಪೈಡರ್‌’ ಎಂದು ಇಂಗ್ಲಿಷ್‌ನಲ್ಲಿ ಕರೆಯಲ್ಪಡುವ ಈ ಜೇಡದ ವೈಜ್ಞಾನಿಕ ಹೆಸರು ’ಯೂಪೊಲಸ್ ಡಿಗ್ನಿಟಾಸ್’ ಆಗಿದೆ. ಈ ಜೇಡದ ಉದ್ದ 5 ಸೆಂಮೀ (2 ಇಂಚು) ಎಂದು ತಿಳಿದು ಬಂದಿದೆ. ಹೊಳೆಯುವ ಕೆಂಪು ಬಣ್ಣದ ಈ ಜೇಡವನ್ನು ನೋಡಿದರೆ ಭಯವಾಗುತ್ತದೆ ಎಂದು ನೆಟ್ಟಿಗರು ಹೇಳುತ್ತಿದ್ದಾರೆ.
ಯೂಪೊಲಸ್ ಡಿಗ್ನಿಟಾಸ್ ಮರಗಳಿರುವ ಮುಕ್ತವಾದ ಪ್ರದೇಶಗಳಲ್ಲಿ ಕಾಣಸಿಗುತ್ತದೆ. ಕಪ್ಪು ಮಣ್ಣಿನಲ್ಲಿ ಇವು ಗೂಡುಗಳನ್ನು ಕಟ್ಟಿಕೊಳ್ಳುತ್ತವೆ. ದುರದೃಷ್ಟವಶಾತ್‌ ಮಾನವರಿಂದ ಭೂಪ್ರದೇಶದ ಕಬಳಿಕೆಯ ಕಾರಣದಿಂದ ಈ ಜೀವಿಗಳ ವಾಸಸ್ಥಾನಗಳು ಕಾಣೆಯಾಗಿವೆ ಎಂದು ಕ್ವೀನ್ಸ್ಲ್ಯಾಂಡ್ ಮ್ಯೂಸಿಯಮ್‌ ಫೇಸ್ಬುಕ್‌ನಲ್ಲಿರುವ ತನ್ನ ವಾಲ್‌ನಲ್ಲಿ ಜೇಡದ ಚಿತ್ರದೊಂದಿಗೆ ಅದರ ಪರಿಚಯವನ್ನು ಕೊಟ್ಟಿದೆ.
ಈ ಜೇಡದ ಹೆಣ್ಣು ಜೀವಿಗಳು ಗಂಡು ಜೀವಿಗಳಿಗಿಂತ ಗಾತ್ರದಲ್ಲಿ ದೊಡ್ಡದಾಗಿವೆ ಎಂದು ಈ ಜೀವಿಯ ಅನ್ವೇಷಣೆ ಮಾಡಿದ ಪ್ರಾಜೆಕ್ಟ್ ಡಿಐಜಿ ತಂಡ ತಿಳಿಸಿದೆ. ಗಂಡು ಜೇಡಗಳು ಪ್ರಕಾಶಮಾನವಾದ ಕೆಂಪು ಬಣ್ಣದ್ದಾಗಿದ್ದರೆ, ಹೆಣ್ಣು ಜೇಡಗಳು ಇನ್ನಷ್ಟು ಗಾಢವಾಗಿದ್ದು, ತೂಕವಾಗಿಯೂ ಇರುತ್ತವೆ. ಈ ಜೇಡಗಳು 5-7 ವರ್ಷಗಳ ಕಾಲ ಬದುಕುತ್ತವೆ ಎಂದು ತಿಳಿದು ಬಂದಿದೆ.
Loading ...