ಸಿಖ್ಖರ ಮೊದಲ ಗುರು ಗುರುನಾನಕ್ರ ಜನ್ಮ ವಾರ್ಷಿಕೋತ್ಸವವನ್ನು ಆಚರಿಸಲು ಸಿಖ್ ಜಾಥಾದೊಂದಿಗೆ ಪಾಕಿಸ್ತಾನಕ್ಕೆ ತೆರಳಿದ್ದ ಕೋಲ್ಕತ್ತಾ ಮೂಲದ ವಿವಾಹಿತೆ ಇಸ್ಲಾಂ ಧರ್ಮವನ್ನು ಸ್ವೀಕರಿಸಿ ಲಾಹೋರ್ ಮೂಲದ ವ್ಯಕ್ತಿಯನ್ನು ವಿವಾಹವಾದ ಆಘಾತಕಾರಿ ಘಟನೆಯೊಂದು ವರದಿಯಾಗಿದೆ.
ಇಸ್ಲಾಂ ಧರ್ಮವನ್ನು ಸ್ವೀಕರಿಸಿ ಲಾಹೋರ್ ಮೂಲದ ವ್ಯಕ್ತಿ ಮೊಹಮ್ಮದ್ ಇಮ್ರಾನ್ರನ್ನು ಮದುವೆಯಾದ ಹೊರತಾಗಿಯೂ ಕೋಲ್ಕತ್ತಾದ ಮಹಿಳೆಗೆ ಪಾಕಿಸ್ತಾನದಲ್ಲಿ ಉಳಿಯಲು ಸಾಧ್ಯವಾಗಲಿಲ್ಲ. ಶುಕ್ರವಾರ ಮಹಿಳೆಯು ವಾಘಾ – ಅಟ್ಟಾರಿ ಅಂತಾರಾಷ್ಟ್ರೀಯ ಸಿಖ್ ಜಾಥಾ ಹಿಂದಿರುಗುವ ವೇಳೆ ಭಾರತಕ್ಕೆ ಮರಳಿದ್ದಾಳೆ.
ಇನ್ನೊಂದು ವಿಶೇಷ ಅಂದರೆ ರಂಜಿತ್ ಕೌರ್ (ಹೆಸರು ಬದಲಾಯಿಸಲಾಗಿದೆ) ಹಾಗೂ ಆಕೆಯ ಪತಿ ಪರಮ್ದೀಪ್ ಸಿಂಗ್( ಹೆಸರು ಬದಲಾಯಿಸಲಾಗಿದೆ) ಕಿವುಡು ಹಾಗೂ ಮೂಗರಾಗಿದ್ದಾರೆ. ಕುತೂಹಲಕಾರಿ ವಿಚಾರವೆಂದರೆ ಮೊಹಮ್ಮದ್ ಇಮ್ರಾನ್ ಕೂಡ ಮೂಕ ಹಾಗೂ ಕಿವುಡನಾಗಿದ್ದಾನೆ.
ಮೊಹಮ್ಮದ್ ಇಮ್ರಾನ್ ಜೊತೆಯಲ್ಲಿ ರಂಜಿತಾ ಕೌರ್ ಸೋಶಿಯಲ್ ಮೀಡಿಯಾದ ಮೂಲಕ ಸಂಪರ್ಕ ಹೊಂದಿದ್ದಳು ಎನ್ನಲಾಗಿದೆ. ಈ ವಿಚಾರ ಆಕೆಯ ಪತಿ ಪರಂದೀಪ್ಗೆ ಸಹ ತಿಳಿದಿತ್ತು. ಇಸ್ಲಾಂ ಧರ್ಮಕ್ಕೆ ಮತಾಂತರವಾಗುವ ವೇಳೆ ರಂಜಿತಾ ತನ್ನ ಹೆಸರು ಪರ್ವೀನಾ ಸುಲ್ತಾನಾ ಎಂದು ಮರುನಾಮಕರಣ ಮಾಡಿಕೊಂಡಿದ್ದಳು.
ಅಲ್ಲದೇ ತನ್ನ ಸಿಖ್ ಧರ್ಮದ ಪತಿಯ ಸಮ್ಮುಖದಲ್ಲಿಯೇ ಮೊಹಮ್ಮದ್ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಳು ಎನ್ನಲಾಗಿದೆ. ಮೊಹಮ್ಮದ್ ಇಮ್ರಾನ್ ರಾಜನ್ಪುರ್ ನಿವಾಸಿಯಾಗಿದ್ದಾನೆ.
ನವೆಂಬರ್ 23ರಂದು ರಂಜಿತ್ ಕೌರ್ ಹಾಗೂ ಇಮ್ರಾನ್ ಲಾಹೋರ್ನಲ್ಲಿ ನಿಖಾ ಮಾಡಿಕೊಂಡಿದ್ದಾರೆ. ಇದಾದ ಬಳಿಕ ರಂಜಿತ್ ಕೌರ್ ತನ್ನ ಸಿಖ್ ಧರ್ಮದ ಪತಿಗೆ ಪಾಕಿಸ್ತಾನದ ನ್ಯಾಯಾಲಯದಲ್ಲಿ ವಿಚ್ಛೇದನ ನೀಡಿದ್ದಾರೆ ಎಂದು ವರದಿಯಾಗಿದೆ.
ಶುಕ್ರವಾರ ಸಂಜೆ ಪಾಕಿಸ್ತಾನದಿಂದ ವಾಘಾ-ಅಟ್ಟಾರಿಗೆ ರಂಜಿತಾ ಕೌರ್ ವಾಪಸ್ಸಾಗಿದ್ದಾಳೆ. ಆಕೆ ಇಸ್ಲಾಂ ಧರ್ಮ ಸ್ವೀಕರಿಸಿ ಮುಸ್ಲಿಂ ವ್ಯಕ್ತಿಯನ್ನು ಮದುವೆಯಾಗಿರುವ ವಿಚಾರ ದೃಢವಾಗಿದೆ. ಆದರೆ ಪಾಕ್ನ ಅಧಿಕಾರಿಗಳು ಆಕೆ ಲಾಹೋರ್ನಲ್ಲಿ ನೆಲೆಸಲು ನಿರಾಕರಿಸಿದ್ದಾರೆ. ಆಕೆ ಯಾತ್ರೆಯ ಉದ್ದೇಶದಿಂದ ಪಾಕ್ಗೆ ಬಂದ ಹಿನ್ನೆಲೆಯಲ್ಲಿ ಶಾಶ್ವತವಾಗಿ ಪಾಕ್ನಲ್ಲಿ ನೆಲೆಸಲು ಸಾಧ್ಯವಿಲ್ಲ. ಪಾಕಿಸ್ತಾನ ವೀಸಾಗಾಗಿ ಆಕೆ ಅರ್ಜಿ ಸಲ್ಲಿಸಬಹುದು ಎಂದು ಹೇಳಿದ್ದಾರೆ.
Loading ...