ಮಳೆಗಾಲದಲ್ಲಿ ವಿದ್ಯುತ್​ ಶಾಕ್​ ಅಪಾಯ ಜಾಸ್ತಿ: ಇರಲಿ ಮುನ್ನೆಚ್ಚರಿಕಾ ಕ್ರಮ

ಮಳೆಗಾಲದಲ್ಲಿ ಕರೆಂಟ್​ ಶಾಕ್​ ಹೊಡೆಯುವ ಸಾಧ್ಯತೆ ಹೆಚ್ಚಿರುತ್ತದೆ. ಹೀಗಾಗಿ ಈ ಸಮಯದಲ್ಲಿ ವಿದ್ಯುತ್​ ಉಪಕರಣಗಳನ್ನು ಬಳಕೆ ಮಾಡುವಾಗ ಭಾರೀ ಜಾಗೃತೆಯಿಂದ ಇರಬೇಕು. ಆದರೂ ಕೆಲವೊಮ್ಮೆ ಅಚಾತುರ್ಯಗಳು ಸಂಭವಿಸಿ ಬಿಡುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ವಿದ್ಯುತ್​ ಅವಘಡಗಳಿಂದ ನಿಮ್ಮನ್ನು ನೀವು ಹೇಗೆ ಪಾರುಮಾಡಿಕೊಳ್ಳಬೇಕು ಎಂಬುದಕ್ಕೆ ಇಲ್ಲಿದೆ ಮಾಹಿತಿ :

ಮಳೆಗಾಲ ಅಂತಲ್ಲ ಯಾವುದೇ ಸಂದರ್ಭದಲ್ಲಿಯೂ ಒದ್ದೆ ಕೈಗಳಿಂದ ಸ್ವಿಚ್​ ಬೋರ್ಡ್​ಗಳನ್ನು ಮುಟ್ಟುವ ಗೋಜಿಗೆ ಹೋಗಬೇಡಿ. ಪ್ಲಗ್​​ಗಳನ್ನು ತೆಗೆಯುವ ಸ್ವಿಚ್​ ಆಫ್​ ಮಾಡಿದ್ದೀರಿ ಅನ್ನೋದು ಪರಿಶೀಲನೆ ಮಾಡಿಕೊಳ್ಳಿ. ಮಳೆಗಾಲ ಆರಂಭವಾಗುತ್ತಿದ್ದಂತೆಯೇ ಮನೆಗೆ ಒಮ್ಮೆ ಎಲೆಕ್ಟ್ರಿಷಿಯನ್​ ಕರೆಸಿ ಎಲ್ಲಾ ಸ್ವಿಚ್​ ಬೋರ್ಡ್​ಗಳನ್ನು ಪರೀಕ್ಷೆ ಮಾಡಿಸಿ. ಮನೆಯ ಅರ್ಥಿಂಗ್​ ವ್ಯವಸ್ಥೆ ಸರಿಯಾಗಿ ಇದೆಯೇ ಎಂಬುದನ್ನು ನೋಡಿಕೊಳ್ಳಿ. ಬಚ್ಚಲು ಮನೆಯಂತಹ ಒದ್ದೆ ಇರುವ ಜಾಗಗಳಲ್ಲಿ ಚಪ್ಪಲಿಗಳನ್ನು ಬಳಸಿ ಸ್ವಿಚ್​ಬೋರ್ಡ್ ಹತ್ತಿರ ಹೋಗುವುದು ಉತ್ತಮ. ಎಲ್ಲಕ್ಕಿಂತ ಮುಖ್ಯವಾಗಿ ಮನೆಗೆ ಐಎಸ್​ಐ ಮಾರ್ಕ್ ಇರುವ ವೈರ್​ಗಳನ್ನೇ ಬಳಕೆ ಮಾಡಿ .

ಇಷ್ಟೆಲ್ಲ ಮುಂಜಾಗ್ರತೆಯ ಬಳಿಕವೂ ಒಂದು ವೇಳೆ ವಿದ್ಯುತ್​ ಅವಘಡ ಸಂಭವಿಸಿಯೇ ಬಿಡ್ತು ಎಂದರೆ ಏನು ಮಾಡಬೇಕು..? ವಿದ್ಯುತ್​ ಶಾಕ್​ಗೆ ಒಳಗಾದ ವ್ಯಕ್ತಿಯ ಮೇಲೆ ನೀರು ಹಾಕಬಾರದು. ಕೂಡಲೇ ಅವರನ್ನು ಮುಟ್ಟಲೂ ಸಹ ಹೋಗಬೇಡಿ. ಮೇನ್​ ಸ್ಚಿಚ್​ ಬಂದ್​ ಮಾಡಿ ಬಳಿಕ ಒಣಗಿದ ಕಟ್ಟಿಗೆಯ ಸಹಾಯದಿಂದ ಅವರನ್ನು ಪಾರು ಮಾಡಲು ಯತ್ನಿಸಿ. ಮೇನ್​​ ಬೋರ್ಡ್​ ಹತ್ತಿರ ಹೋಗುವಾಗಲೂ ಸಹ ಬರಿಗೈಯಲ್ಲಿ ಅದನ್ನು ಮುಟ್ಟುವುದು ಸೂಕ್ತವಲ್ಲ. ಒಣಗಿದ ಚಪ್ಪಲಿ ಹಾಗೂ ಕೈಗೆ ಒಣಗಿದ ಬಟ್ಟೆ ಸುತ್ತಿಕೊಂಡು ಪರಿಶೀಲನೆ ನಡೆಸಿ.