ನಾಗರಿಕ ಸೇವಾ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದ 26 ವರ್ಷದ ಎಂಬಿಎ ಪದವೀಧರ ಕೆ.ಆರ್.ಪುರಂನ ಭಟ್ಟರಹಳ್ಳಿ ನಿವಾಸದಲ್ಲಿ ಮಾರ್ಚ್ 23ರಂದು ನೇಣಿಗೆ ಶರಣಾಗಿದ್ದ. ಈತ ಯಾವುದೇ ಸೂಸೈಡ್ ಪತ್ರವನ್ನ ಬರೆಯದ ಕಾರಣ ಯುವಕನ ಆತ್ಮಹತ್ಯೆಗೆ ನಿಖರ ಕಾರಣ ತಿಳಿದು ಬಂದಿರಲಿಲ್ಲ. ಆದರೆ ಆತನಿಗೆ ಫೇಸ್ಬುಕ್ನಲ್ಲಿ ಸೈಬರ್ ಬೆದರಿಕೆ ಬಂದಿತ್ತು ಎಂಬ ವಿಚಾರವನ್ನ ಮೃತ ವ್ಯಕ್ತಿಯ ಹಿರಿಯ ಸಹೋದರಿ ಪತ್ತೆ ಮಾಡಿದ್ದಾರೆ.
ವ್ಯಕ್ತಿ ಸಾವನ್ನಪ್ಪುವ ಒಂದು ದಿನದ ಮೊದಲು ಆತನ ಬಳಿಯಿಂದ 36 ಸಾವಿರ ರೂಪಾಯಿಯನ್ನ ವಸೂಲಿ ಮಾಡಲಾಗಿದೆ. ನೇಹಾ ಶರ್ಮಾ ಎಂಬ ಯುವತಿಯ ಹೆಸರಲ್ಲಿ ಬಂದಿದ್ದ ಫ್ರೆಂಡ್ಶಿಪ್ ರಿಕ್ವೆಸ್ಟ್ನ್ನು ಆತ ಸ್ವೀಕರಿಸಿದ್ದ. ಬಳಿಕ ಇಬ್ಬರೂ ಚಾಟ್ ಮಾಡಲು ಆರಂಭಿಸಿದ್ದರು. ಒಂದು ದಿನ ಮೃತ ಯುವಕನಿಗೆ ವಿಡಿಯೋ ಕಾಲ್ ಮಾಡಿ ಆಕೆ ತನ್ನ ಬಟ್ಟೆಯನ್ನ ಬಿಚ್ಚಿ ನಗ್ನವಾಗಿದ್ದು ಮಾತ್ರವಲ್ಲದೇ ಆತನ ಬಳಿಯೂ ನಗ್ನನಾಗುವಂತೆ ಹೇಳಿದ್ದಳು. ಮೃತ ವ್ಯಕ್ತಿ ಯುವತಿಯ ಮಾತನ್ನ ಕೇಳಿದ ಬಳಿಕ ಸಮಸ್ಯೆ ಶುರುವಾಗಿದೆ.
ಚಾಟ್ ಹಿಸ್ಟರಿ, ವಿಡಿಯೋ ಕಾಲ್ ರೆಕಾರ್ಡ್ಗಳನ್ನ ಬಳಸಿಕೊಂಡು ಈ ಸೈಬರ್ ಕ್ರಿಮಿನಲ್ಸ್ ಮೃತ ವ್ಯಕ್ತಿ ಬಳಿ ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಹಣ ನೀಡದೇ ಹೋದಲ್ಲಿ ಸ್ನೇಹಿತರಿಗೆ ವಿಡಿಯೋ ಕಳಿಸೋದಾಗಿ ಬೆದರಿಕೆಯೊಡ್ಡಿದ್ದಾರೆ. ಸ್ನೇಹಿತರಿಂದ ಹಣವನ್ನ ಸಾಲದ ರೂಪದಲ್ಲಿ ಪಡೆದಿದ್ದ ಯುವಕ ಭಯದಿಂದ ಡಿಜಿಟಲ್ ಪೇಮೆಂಟ್ ಮೂಲಕ ಈ ತಂಡಕ್ಕೆ 36 ಸಾವಿರ ರೂಪಾಯಿ ನೀಡಿದ್ದಾನೆ.
ಮೃತ ಯುವಕನ ಸಹೋದರಿ ನೀಡಿದ ದೂರನ್ನ ಆಧರಿಸಿ ಕೆ.ಆರ್. ಪುರಂ ಪೊಲೀಸರು ಏಪ್ರಿಲ್ ಮೂರರಂದು ಐವರು ಶಂಕಿತರ ವಿರುದ್ಧ ಕೇಸ್ ದಾಖಲಿಸಿಕೊಂಡಿದ್ದಾರೆ.
ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ಮಾರ್ಚ್ 23ರಂದು ಅಸಹಜ ಸಾವು ಎಂದು ಪ್ರಕರಣ ದಾಖಲಿಸಲಾಗಿತ್ತು. ಆದರೆ ಬಳಿಕ ಮೃತ ಯುವಕನ ಸ್ನೇಹಿತರು ಆತನ ಸಹೋದರಿಯ ಬಳಿ ಈತ ಸಾಲ ಪಡೆದುಕೊಂಡಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ. ಇಲ್ಲೇನೋ ಗೊಂದಲ ಇದೆ ಎಂಬುದನ್ನ ಅರಿತ ಸಹೋದರಿ ಬ್ಯಾಂಕ್ಗೆ ತೆರಳಿ ಸಹೋದರನ ಖಾತೆಯ ವ್ಯವಹಾರವನ್ನ ಪರಿಶೀಲಿಸಿದ್ದಾರೆ. ಈ ವೇಳೆ ಮಾರ್ಚ್ 22ರಂದು ನಡೆದ 6 ವ್ಯವಹಾರಗಳು ಬೆಳಕಿಗೆ ಬಂದಿದೆ. ಇದಾದ ಬಳಿಕ ಸಹೋದರನ ಮೆಸೆಂಜರ್ನಲ್ಲಿ ನೇಹಾ ಶರ್ಮಾ ಎಂಬ ಹೆಸರಿನಲ್ಲಿ ಬರುತ್ತಿದ್ದ ಮೆಸೇಜ್ಗಳನ್ನ ನೋಡಿದ್ದಾರೆ.
ಆ ವ್ಯಕ್ತಿ ನನ್ನ ಸಹೋದರನ ಮೊಬೈಲ್ ನಂಬರ್ ಕೇಳಿದ್ದ. ನಾನು ನನ್ನ ಅಳಿಯನ ಮೊಬೈಲ್ ಸಂಖ್ಯೆಯನ್ನ ನೀಡಿ ನನ್ನ ತಮ್ಮನ ನಂಬರ್ ಎಂದು ಹೇಳಿದ್ದೆ. ಆ ವ್ಯಕ್ತಿ ತನ್ನನ್ನ ತಾನು ತೇಜಸ್ ರಮೇಶ್ ಭಾಯ್ ಎಂದು ಗುರುತಿಸಿಕೊಂಡಿದ್ದ. ಈತ ನೇಹಾ ಶರ್ಮಾರ ಸಹೋದರ. ನನ್ನ ಅಳಿಯನಿಗೆ ಮೆಸೇಜ್ ಮಾಡಿದ ಈ ತಂಡ ಬ್ಲಾಕ್ ಮಾಡಿದ್ದಾರೆ ಎಂದು ಪೊಲೀಸ್ ದೂರಿನಲ್ಲಿ ಬರೆಯಲಾಗಿದೆ.
21 ಸಾವಿರ ರೂಪಾಯಿ ನೀಡಿದರೆ ಎಲ್ಲಾ ವಿಡಿಯೋಗಳನ್ನ ಡಿಲೀಟ್ ಮಾಡೋದಾಗಿ ನನ್ನ ಸೋದರಳಿಯನಿಗೆ ಭರವಸೆ ನೀಡಿದ್ದಾರೆ. ರಮೇಶ್ ಹೇಳಿಕೊಂಡಿರುವಂತೆ ಶರ್ಮಾಗೆ ಮೋಯಿನ್ ಖಾನ್, ಜಾವೇದ್ ಹಾಗೂ ರಾಬಿನ್ ಖಾನ್ ಎಂಬ ಮ್ಯಾನೇಜರ್ ಇದ್ದಾರೆ. ಪೊಲೀಸರು ಐವರ ವಿರುದ್ಧ ಕೇಸ್ ದಾಖಲಿಸಿದ್ದಾರೆ. ಇದೀಗ ಆರೋಪಿಗಳ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ.
Loading ...