ಕೊರೊನಾ ಭಯದ ನಡುವೆಯೂ ಏರೋ ಇಂಡಿಯಾ 2021ಗೆ ಸಿದ್ಧತೆ

ಕೊರೊನಾ ವೈರಸ್​ ಬಿಸಿ 13ನೇ ಆವೃತ್ತಿಯ ಏರೋ ಇಂಡಿಯಾ ಶೋಗೂ ತಟ್ಟಿದ್ದು ವೈಮಾನಿಕ ಪ್ರದರ್ಶನದಲ್ಲಿ ಜನಸಂದಣಿಯನ್ನ ನಿಯಂತ್ರಿತ ಸಂಖ್ಯೆಗೆ ಇಳಿಸಿದೆ. ಬೆಂಗಳೂರು ಹೊರವಲಯದ ಯಲಹಂಕ ವಾಯುನೆಲೆಯಲ್ಲಿ ನಡೆಯಲಿರುವ ವೈಮಾನಿಕ ಪ್ರದರ್ಶನವನ್ನ ಆನ್​ಲೈನ್​ ಹಾಗೂ ಟೆಲಿವಿಷನ್​ ಮುುಖಾಂತರ ನೋಡಬಹುದಾಗಿದೆ.

ಫೆಬ್ರವರಿ 3ರಿಂದ ಐದು ದಿನಗಳ ಕಾಲ ಯಲಹಂಕ ವಾಯುನೆಲೆಯಲ್ಲಿ 13ನೇ ಆವೃತ್ತಿಯ ಏರ್ ಶೋ ನಡೆಯಲಿದೆ. ಈವರೆಗೆ 532 ಪ್ರದರ್ಶಕರು ಈವೆಂಟ್​ಗಾಗಿ ನೋಂದಾಯಿಸಿಕೊಂಡಿದ್ದಾರೆ.

ಆದರೆ ಇದರಲ್ಲಿ ಕೇವಲ 75 ವಿದೇಶಿ ಸಂಸ್ಥೆಗಳಿವೆ. ಕಳೆದ ಬಾರಿ 165 ವಿದೇಶಿ ಪ್ರದರ್ಶಕರು ನೋಂದಾಯಿಸಿಕೊಂಡಿದ್ದರು.

ಕಳೆದ ತಿಂಗಳು ನವದೆಹಲಿಯಲ್ಲಿ ರಕ್ಷಣಾ ಸಚಿವ ರಾಜನಾಥ್​ ಸಿಂಗ್​ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಪ್ರದರ್ಶನದ ದಿನವನ್ನ ಕಡಿಮೆ ಮಾಡಲು ನಿರ್ಧರಿಸಲಾಗಿತ್ತು. ಸಾಮಾಜಿಕ ಅಂತರ ಕಾಪಾಡುವುದು, ಎಲ್ಲ ಪ್ರವೇಶ ದ್ವಾರಗಳಲ್ಲಿ ಥರ್ಮಲ್​ ಸ್ಕ್ರೀನಿಂಗ್​ ಕಡ್ಡಾಯ, ಸ್ಯಾನಿಟೈಸರ್​ ಸೇರಿದಂತೆ ಕೊರೊನಾ ಸಂಬಂಧಿ ಎಲ್ಲ ಮಾರ್ಗಸೂಚಿಗಳನ್ನ ಕೈಗೊಳ್ಳುವ ಬಗ್ಗೆ ಸೂಚಿಸಲಾಗಿದೆ.