ತಲೆತಿರುಗಿಸುತ್ತೆ ‌ʼಹೃದಯಾಘಾತʼದ ಬಗ್ಗೆ ನಟ ಜಾನ್​ ಅಬ್ರಹಾಂ ನೀಡಿದ ವಿವರಣೆ..!

ಜಾನ್​ ಅಬ್ರಹಾಂ ಫಿಟ್​ನೆಸ್​ ಫ್ರೀಕ್​ ಅನ್ನೋದು ಅವರ ಶರೀರವನ್ನು ನೋಡಿದ ತಕ್ಷಣವೇ ಯಾರು ಬೇಕಾದರೂ ಅಂದಾಜಿಸಬಹುದಾದ ವಿಚಾರ. ಆದರೆ ಅವರ ಸಾಮಾನ್ಯ ಜ್ಞಾನ ಎಷ್ಟಿದೆ ಅನ್ನೋದು ಟ್ವಿಟರ್​ನಲ್ಲಿ ಸದ್ಯ ವೈರಲ್​ ಆಗುತ್ತಿರುವ ವಿಡಿಯೋವೊಂದರ ಮೂಲಕ ಜನರಿಗೆ ತಿಳಿದಂತೆ ಕಾಣುತ್ತಿದೆ.

ಉತ್ತಮ ಆಹಾರ ಕ್ರಮ, ಕಸರತ್ತುಗಳು ಹಾಗೂ ದೇಹದ ಆರೋಗ್ಯವನ್ನು ಹೇಗೆ ಕಾಪಾಡಿಕೊಳ್ಳಬೇಕು ಎಂಬುದು ಜಾನ್​ ಅಬ್ರಹಾಂಗೆ ತಿಳಿದಿದೆ ಎಂದು ನೀವೆಲ್ಲ ಎಂದುಕೊಂಡಿದ್ದೀರಾ. ಆದರೆ ಕಪಿಲ್​ ಶರ್ಮಾರ ಕಾರ್ಯಕ್ರಮವೊಂದರಲ್ಲಿ ಜಯತೆ 2 ಸಿನಿಮಾ ಪ್ರಮೋಷನ್​ಗಾಗಿ ಆಗಮಿಸಿದ್ದ ಜಾನ್​ ಅಬ್ರಹಾಂ ಹೃದಯಾಘಾತದ ಬಗ್ಗೆ ವಿವರಿಸಿದ ಪರಿ ಕಂಡು ನೆಟ್ಟಿಗರು ಹೊಟ್ಟೆ ಹುಣ್ಣಾಗುವಂತೆ ನಗ್ತಿದ್ದಾರೆ.

ಸಿನಿಮಾದ ನಟಿ ದಿವ್ಯಾ ಖೋಸ್ಲಾ ಕುಮಾರ್​ ಜೊತೆ ಕಾರ್ಯಕ್ರಮದಲ್ಲಿ ಕಾಣಿಸಿಕೊಂಡಿದ್ದ ಜಾನ್​ ಅಬ್ರಹಾಂ ಹೃದಯಾಘಾತದ ಬಗ್ಗೆ ವಿವರಿಸುತ್ತಾರೆ. ಇದರಲ್ಲಿ ಅವರು ಒತ್ತಡ ಹಾಗೂ ಕಳಪೆ ಆಹಾರ ಕ್ರಮದಿಂದ ಹೃದಯಾಘಾತ ಸಂಭವಿಸುತ್ತೆ ಎಂದು ಹೇಳಿದ್ರು. ಟ್ರೈಗ್ಲಿಸರೈಡ್​ಗಳನ್ನು ಗುಳ್ಳೆಗಳಿಗೆ ಹೋಲಿಕೆ ಮಾಡಿದ್ದಾರೆ.
ಈ ವೈರಲ್​ ವಿಡಿಯೋಗೆ ‘ ನಮ್ಮ ಮೆಡಿಕಲ್​ ವಿದ್ಯಾರ್ಥಿಗಳಿಗೆ ಇಷ್ಟು ಆತ್ಮಸ್ಥೈರ್ಯ ಇರುತ್ತಿದ್ದರೆ ಎಷ್ಟು ಚೆನ್ನಾಗಿತ್ತು’ ಎಂದು ಶೀರ್ಷಿಕೆ ನೀಡಲಾಗಿದೆ. ಈ ವಿಡಿಯೋ 1.7 ಲಕ್ಷಕ್ಕೂ ಅಧಿಕ ವೀವ್ಸ್​ ಸಂಪಾದಿಸಿದೆ. ಜಾನ್​ ಅಬ್ರಹಾಂ ವಿವರಣೆಗೆ ಅನೇಕರು ವಿರೋಧ ವ್ಯಕ್ತಪಡಿಸಿದ್ದಾರೆ. ನಿಮ್ಮ ವಿವರಣೆಯೇ ಹೃದಯಾಘಾತ ತರಿಸುವಂತಿದೆ ಎಂದು ವ್ಯಂಗ್ಯವಾಡ್ತಿದ್ದಾರೆ.