ದಂಗಾಗಿಸುವಂತಿದೆ‌ 50 ವರ್ಷ ಹಳೆಯ ನೈಕಿ ಶೂ ಬೆಲೆ…!

ಯಾವುದೇ ವಸ್ತುವಿನ ಸಂಗ್ರಹದ ಅಭ್ಯಾಸ ನಿಮಗೆ ಇದ್ದರೆ, ವಿಂಟೇಜ್ ಪೀಸ್‌ಗಳ ಮೇಲೆ ಬಹಳವೇ ವ್ಯಾಮೋಹ ಇರಲೇಬೇಕು. ಕ್ರೀಡಾ ಉತ್ಪನ್ನಗಳ ತಯಾರಕ ನೈಕಿಯ ವಿಂಟೇಜ್ ಶೂ ’ಮೂನ್ ಶೂ’ ಮಾರಾಟಕ್ಕಿದೆ.

1970ರ ದಶಕದ ಈ ಶೂಗಳಿಗೆ ಅವುಗಳದ್ದೇ ಇತಿಹಾಸವಿದ್ದು, ಲಂಡನ್ ಮೂಲದ ಹರಾಜುದಾರ ಸೋಥ್‌ಬೇ ತನ್ನ ಜಾಲತಾಣದಲ್ಲಿ ಹರಾಜಿಗೆ ಇಟ್ಟಿದೆ. ಈ ಶೂಗಳ ಹೊರಮೈ ಮೇಲಿನ ಪ್ಯಾಟರ್ನ್ ಮೇಲೆ ಧೂಳು ಕೂತಾಗ ಹಾಗೂ 1969ರಲ್ಲಿ ನಾಸಾ ಗಗನಯಾತ್ರಿಗಳು ಚಂದ್ರನ ಅಂಗಳದಲ್ಲಿ ತಮ್ಮ ಹೆಜ್ಜೆ ಗುರುತನ್ನು ಮೂಡಿಸಿದ ಕ್ಷಣಗಳನ್ನು ನೆನಪಿಸುತ್ತದೆ.

ನೈಕಿಯ ಸಹ ಸ್ಥಾಪಕ ಬಿಲ್ ಬೋವರ್ಮನ್ ಖುದ್ದು ಡಿಸೈನ್ ಮಾಡಿರುವ ಈ ಶೂ ಅನ್ನು 1972ರ ಒಲಿಂಪಿಕ್ಸ್ ಟ್ರಯಲ್ಸ್‌ನಲ್ಲಿ ಬಳಸಲಾಗಿತ್ತು. ಸದ್ಯ ಕೆಲವೇ ಕೆಲವು ಮೂನ್ ಶೂಗಳು ಲಭ್ಯವಿದ್ದು, ಹರಾಜಿನಲ್ಲಿ ಈ ಶೂಗಳ ಒಂದು ಜೋಡಿ $150,000 ಮಾರಾಟವಾಗುವ ನಿರೀಕ್ಷೆಯಿದೆ.