ರೈತರ ಪ್ರತಿಭಟನೆ: ರೋಟಿ ಯಂತ್ರದ ಬಳಿಕ ಬಂತು ದೇಸೀ ಗೀಸರ್…!

ಕೃಷಿ ಉತ್ಪನ್ನ ಮಾರುಕಟ್ಟೆ ಸಂಬಂಧ ಕೇಂದ್ರ ಸರ್ಕಾರ ತಂದಿರುವ ಮೂರು ಹೊಸ ಕಾನೂನುಗಳ ವಿರುದ್ಧ ಹೋರಾಡುತ್ತಿರುವ ಪಂಜಾಬ್ ರೈತರ ಪ್ರತಿಭಟನೆ ದಿನೇ ದಿನೇ ರಂಗು ಪಡೆಯುತ್ತಿದೆ.

ಧರಣಿ ಕುಳಿತ ರೈತರು ಇದ್ದಲ್ಲಿಗೆ ರೋಟಿ ಯಂತ್ರಗಳು, ಹೈ-ಟೆಕ್ ಸೋಲಾರ್‌ ಪ್ಯಾನೆಲ್‌ಗಳು, ವಾಶಿಂಗ್ ಮಷಿನ್‌ಗಳು ಆಗಮಿಸಿದ್ದಲ್ಲದೇ ಇದೀಗ ’ಮೇಡ್ ಇನ್ ಪಂಜಾಬ್‌’ ಗೀಸರ್ʼ‌ಗಳೂ ಸಹ ಬಂದು ಸೇರಿಕೊಂಡಿವೆ. ಈ ಮೂಲಕ ಇಲ್ಲಿನ ಸಿಂಘು ಗಡಿಯಲ್ಲಿ ನಡೆಯುತ್ತಿರುವ ಪ್ರತಿಭಟನೆಗಳು ಬಹಳ ವ್ಯವಸ್ಥಿತವಾಗಿ ಸಾಗುತ್ತಿವೆ.

ಸೌದೆ ಬಳಸಿಕೊಂಡು ನೀರು ಕಾಯಿಸಿಕೊಳ್ಳಬಲ್ಲ ಈ ಗೀಸರ್‌ನಲ್ಲಿ ಒಂದು ಕಡೆ ತಣ್ಣೀರನ್ನು ಹಾಕಲು ಫನಲ್ ರೀತಿಯ ರಂಧ್ರವಿದ್ದು, ಮತ್ತೊಂದು ಕಡೆ ಕೊಳವೆ ಮುಖಾಂತರ ಬಿಸಿ ನೀರನ್ನು ಪಡೆದುಕೊಳ್ಳಬಹುದಾಗಿದೆ.

“ಇದು ಪಂಜಾಬೀ ಜುಗಾಡ್‌. ನಾವು ಇದನ್ನು ದೇಸೀ ಗೀಸರ್‌ ಎಂದು ಕರೆಯುತ್ತೇವೆ. ಪಂಜಾಬ್ ಪ್ರತಿ ಮನೆಯಲ್ಲೂ ಈ ಗೀಸರ್‌ ಇರುತ್ತದೆ. ನಾವು ಇದನ್ನು ಇಲ್ಲೂ ಹೊಂದಿದ್ದೇವೆ. ಈ ಗೀಸರ್ ‌ಅನ್ನು ನಮಗೆ ಲಂಗರ್‌ನಲ್ಲಿ ಬಳಸಲು ಕೊಡಲಾಗಿದೆ. ಇದನ್ನು ಯಾರು ಬೇಕಾದರೂ ಬಳಸಬಹುದಾಗಿದೆ” ಎಂದು ಪ್ರತಿಭಟನಾಕಾರರಿಗೆ ಖೀರು ತಯಾರಿಸುತ್ತಿದ್ದ ಮಂಜೀಂದರ್‌ ಸಿಂಗ್ ತಿಳಿಸಿದ್ದಾರೆ.