ವಾಯು ಗುಣಮಟ್ಟದಲ್ಲಿ ರಾಷ್ಟ್ರ ರಾಜಧಾನಿಯಲ್ಲಿ ಮುಂದುವರಿದ ಕಳಪೆ ಸಾಧನೆ

ಸಾಕಷ್ಟು ಸುರಕ್ಷಾ ಕ್ರಮಗಳ ಬಳಿಕವೂ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ವಾಯು ಮಾಲಿನ್ಯ ಪ್ರಮಾಣ ಕಡಿಮೆಯಾದಂತೆ ಕಾಣುತ್ತಿಲ್ಲ. ಶುಕ್ರವಾರ ಕೂಡ ವಾಯು ಗುಣಮಟ್ಟ ಕಳಪೆಯಾಗೇ ಇದೆ ಅಂತಾ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ .

ವಾಯು ಗುಣಮಟ್ಟದ ಇಂಡೆಕ್ಸ್​ನಲ್ಲಿ ಸಿರಿಫೋರ್ಟ್​ 287 (ಕಳಪೆ), ಶ್ರೀ ಅರಬಿಂದೋ ಮಾರ್ಗ್ 291(ಕಳಪೆ) ಹಾಗೂ ಆರ್ಕೆ ಪುರಂ 302 (ಅತ್ಯಂತ ಕಳಪೆ) ಗುಣಮಟ್ಟ ದಾಖಲಿಸಿದೆ ಅಂತಾ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ತಿಳಿಸಿದೆ.

ಗುರುವಾರ ಅತ್ಯಂತ ಕಳಪೆ ಗುಣಮಟ್ಟ ಹೊಂದಿದ್ದ ಘಾಜಿಯಾಬಾದ್​ ಹಾಗೂ ಗ್ರೇಟರ್​ ನೋಯ್ಡಾಗಳು ಶುಕ್ರವಾರ ಕೊಂಚ ಸುಧಾರಿಸಿಕೊಂಡು ಕಳಪೆ ಗುಣಮಟ್ಟಕ್ಕೆ ಬಂದು ನಿಂತಿವೆ.

ವಾಯು ಗುಣಮಟ್ಟ 0-50 ಇದ್ದರೆ ಅದನ್ನ ಉತ್ತಮ, 51-100 ಇದ್ದರೆ ಸಾಮಾನ್ಯ, 101 -200 ಇದ್ದರೆ ಮಧ್ಯಮ, 201 -300 ಇದ್ದರೆ ಕಳಪೆ ಹಾಗೂ 301-400 ಇದ್ದರೆ ಅತ್ಯಂತ ಕಳಪೆ ಮತ್ತು 401-500ನ್ನು ವಿಕೋಪ ಎಂದು ಪರಿಗಣಿಸಲಾಗುತ್ತೆ.