ಚೀನಾದ ವುಹಾನ್ ನಗರದಲ್ಲಿ ಆರಂಭವಾದ ಕೊರೊನಾ ಮಹಾಮಾರಿ ಈಗ ಇಡೀ ವಿಶ್ವವನ್ನೇ ವ್ಯಾಪಿಸಿದೆ. ಇದಕ್ಕೆ ಲಸಿಕೆ ಇನ್ನೂ ಲಭ್ಯವಾಗದ ಕಾರಣ ಇದರಿಂದ ಪಾರಾಗಲು ಮಾಸ್ಕ್ ಧರಿಸುವುದು ಅನಿವಾರ್ಯವಾಗಿದೆ. ಅಲ್ಲದೆ ಸಾಮಾಜಿಕ ಅಂತರ ಕಾಪಾಡುವಂತೆ ಸೂಚಿಸಲಾಗಿದೆ.
ಇದು ಮದುವೆಗಳ ಮೇಲೂ ಪರಿಣಾಮ ಬೀರಿದ್ದು, ಈ ಶುಭ ಸಮಾರಂಭದ ವೇಳೆ ಸೀಮಿತ ಮಂದಿಗೆ ಮಾತ್ರ ಹಾಜರಾಗುವ ಅವಕಾಶ ಸಿಗುತ್ತಿದೆ. ಅಲ್ಲದೆ ವಧು – ವರ ಸೇರಿದಂತೆ ಮದುವೆಗೆ ಹಾಜರಾಗುವ ಎಲ್ಲರೂ ಮಾಸ್ಕ್ ಧರಿಸಬೇಕಾಗುತ್ತದೆ.
ಇದರ ಮಧ್ಯೆ ಮಹಾರಾಷ್ಟ್ರದ ಕೊಲ್ಲಾಪುರದಲ್ಲಿನ ಆಭರಣ ತಯಾರಕರೊಬ್ಬರು ಮಾಡಿರುವ ಐಡಿಯಾ ಎಲ್ಲರ ಗಮನ ಸೆಳೆದಿದೆ. ಸಂದೀಪ್ ಸಾಂಗಾವಕರ ಎಂಬವರು ಈಗ 50 ಗ್ರಾಂ ತೂಕದ ಬೆಳ್ಳಿ ಮಾಸ್ಕ್ ತಯಾರಿಸಿದ್ದು, ಇದು ವಧು – ವರರನ್ನು ಆಕರ್ಷಿಸಿದೆ. 2,500 ರೂ. ಬೆಲೆಯ ಈ ಮಾಸ್ಕ್ ಗೆ ಈಗಾಗಲೇ ಡಿಮ್ಯಾಂಡ್ ಕ್ರಿಯೇಟ್ ಆಗಿದ್ದು, ವಾರದೊಳಗೆ ಮೂರು ಜೋಡಿ ಮಾಸ್ಕ್ ಖರೀದಿಯಾಗಿದೆಯಂತೆ. ಮುಂದಿನ ದಿನಗಳಲ್ಲಿ ವಧು-ವರ ಮಾತ್ರವಲ್ಲದೆ ಇತರೆಯವರೂ ಇದಕ್ಕೆ ಬೇಡಿಕೆ ಸಲ್ಲಿಸಬಹುದು ಎಂಬ ನಿರೀಕ್ಷೆ ಇದರ ತಯಾರಕರದ್ದು.