ಭಾರತದಲ್ಲಿ ಹೆಚ್ಚುತ್ತಿರುವ ಹೆಪಟೈಟಿಸ್; WHO ನಿಂದ ಆಘಾತಕಾರಿ ವರದಿ

ವಿಶ್ವ ಆರೋಗ್ಯ ಸಂಸ್ಥೆ (WHO) ಬಿಡುಗಡೆ ಮಾಡಿರುವ ಇತ್ತೀಚಿನ ವರದಿಯ ಪ್ರಕಾರ ಭಾರತದಲ್ಲಿ ಹೆಪಟೈಟಿಸ್‌ ಪ್ರಕರಣಗಳು ಹೆಚ್ಚುತ್ತಲೇ ಇವೆ. 2022 ರಲ್ಲಿ ಭಾರತದಲ್ಲಿ ಒಟ್ಟು 3.50 ಕೋಟಿ ಹೆಪಟೈಟಿಸ್ ಬಿ ಮತ್ತು ಸಿ ಪ್ರಕರಣಗಳು ವರದಿಯಾಗಿವೆ. ಚೀನಾವನ್ನು ಹೊರತುಪಡಿಸಿದರೆ ಅತಿ ಹೆಚ್ಚು ಪ್ರಕರಣಗಳು ವರದಿಯಾಗಿರೋದು ಭಾರತದಲ್ಲಿ. ಆಘಾತಕಾರಿ ಅಂಶವೆಂದರೆ ಈ ರೋಗವು ಜಾಗತಿಕವಾಗಿ ಸಾವಿಗೆ ಕಾರಣವಾಗುತ್ತಿರುವ ಪ್ರಮುಖ ಸಾಂಕ್ರಾಮಿಕಗಳಲ್ಲಿ ಎರಡನೇ ಸ್ಥಾನದಲ್ಲಿದೆ.

ಹೆಪಟೈಟಿಸ್ ಬಿ ಮತ್ತು ಸಿ ಸೋಂಕಿನಿಂದ ಜಗತ್ತಿನಲ್ಲಿ ಪ್ರತಿದಿನ 3,500 ಜನರು ಸಾಯುತ್ತಿದ್ದಾರೆ. ಪ್ರತಿ ವರ್ಷ 13 ಲಕ್ಷ ಜನರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ ಎಂದು WHO ಹೇಳಿದೆ. ಹಾಗಾಗಿ ರೋಗ ನಿರ್ಣಯ ಮತ್ತು ಚಿಕಿತ್ಸೆ ಬಹಳ ಮುಖ್ಯ.

ಹೆಪಟೈಟಿಸ್ ಎಂದರೇನು ?

ಹೆಪಟೈಟಿಸ್ ಯಕೃತ್ತಿನ ಉರಿಯೂತದಿಂದ ನಿರೂಪಿಸಲ್ಪಟ್ಟ ರೋಗ. ಯಕೃತ್ತು ಪೋಷಕಾಂಶಗಳನ್ನು ಸಂಸ್ಕರಿಸುತ್ತದೆ, ರಕ್ತವನ್ನು ಶೋಧಿಸುತ್ತದೆ ಮತ್ತು ಸೋಂಕುಗಳ ವಿರುದ್ಧ ಹೋರಾಡುತ್ತದೆ. ಈ ರೋಗವು ಸಂಭವಿಸಿದಾಗ ದೇಹವು ಸರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುವುದಿಲ್ಲ. ಹೆಪಟೈಟಿಸ್ ಎ, ಹೆಪಟೈಟಿಸ್ ಬಿ ಮತ್ತು ಹೆಪಟೈಟಿಸ್ ಸಿ ಎಂಬ ಮೂರು ವಿಧಗಳಿವೆ.

ಹೆಪಟೈಟಿಸ್‌ಗೆ ಕಾರಣ ?

ದೇಹದಲ್ಲಿ ಇರುವ ರೋಗನಿರೋಧಕ ಕೋಶಗಳು ಯಕೃತ್ತಿನ ಮೇಲೆ ದಾಳಿ ಮಾಡಿದಾಗ ಹೆಪಟೈಟಿಸ್ ಸಂಭವಿಸುತ್ತದೆ. ಈ ಕಾಯಿಲೆ ವೈರಸ್‌, ಬ್ಯಾಕ್ಟೀರಿಯಾ ಅಥವಾ ಪರಾವಲಂಬಿಗಳ ಸೋಂಕಿನಿಂದ ಕೂಡ ಉಂಟಾಗುತ್ತದೆ.

ಹೆಪಟೈಟಿಸ್‌ ಲಕ್ಷಣಗಳು

ಹೆಪಟೈಟಿಸ್ ಹೊಂದಿರುವ ಅನೇಕರಲ್ಲಿ ರೋಗಲಕ್ಷಣಗಳೇ ಗೋಚರಿಸುವುದಿಲ್ಲ. ಅದು ತೀವ್ರವಾದಾಗ 2ನೇ ವಾರದಿಂದ 6 ತಿಂಗಳವರೆಗೆ ಯಾವುದೇ ಸಮಯದಲ್ಲಿ ರೋಗಲಕ್ಷಣಗಳು ಕಾಣಿಸಿಕೊಳ್ಳಬಹುದು. ತೀವ್ರವಾದ ಹೆಪಟೈಟಿಸ್‌ನ ಲಕ್ಷಣಗಳೆಂದರೆ ಜ್ವರ, ಆಯಾಸ, ಹಸಿವು ಕಡಿಮೆಯಾಗುವುದು, ವಾಕರಿಕೆ, ವಾಂತಿ, ಹೊಟ್ಟೆ ನೋವು, ಗಾಢ ಮೂತ್ರ, ತಿಳಿ ಬಣ್ಣದ ಮಲ, ಕೀಲು ನೋವು ಮತ್ತು ಕಾಮಾಲೆ.

ಬಹು ಪಾಲುದಾರರೊಂದಿಗೆ ಅಸುರಕ್ಷಿತ ಲೈಂಗಿಕತೆಯನ್ನು ಹೊಂದಿರುವವರಲ್ಲಿ ಹೆಪಟೈಟಿಸ್ ವೈರಸ್ ಸೋಂಕಿನ ಅಪಾಯವು ಹೆಚ್ಚು. ಇದಲ್ಲದೆ IV ಡ್ರಗ್ ಬಳಕೆಯ ಸಮಯದಲ್ಲಿ ಸೂಜಿಗಳನ್ನು ಹಂಚಿಕೊಳ್ಳುವುದು, ಪುರುಷನೊಂದಿಗೆ ಸಂಭೋಗಿಸುವುದು, HBV ರೋಗಿಯೊಂದಿಗೆ ವಾಸಿಸುವುದು, ಮಾನವ ರಕ್ತದ ಸಂಪರ್ಕಕ್ಕೆ ಬರುವುದು, ಹೆಚ್ಚಿನ HBV ದರಗಳಿರುವ ಸ್ಥಳಗಳಲ್ಲಿ ವಾಸಿಸುವುದು ಇವೆಲ್ಲ ರೋಗದ ಅಪಾಯವನ್ನು ಹೆಚ್ಚಿಸುತ್ತದೆ.

ಕ್ಯಾನ್ಸರ್‌ಗೆ ಕಾರಣವಾಗಬಹುದು ಚಿಕಿತ್ಸೆಯ ವಿಳಂಬ !

ದೀರ್ಘಕಾಲದ ಹೆಪಟೈಟಿಸ್ ಬಿ ರೋಗಿಗಳಲ್ಲಿ ಎಚ್‌ಸಿವಿ ಸೋಂಕಿನ ದರವು ಶೇ.9 ರಿಂದ ಶೇ.30ವರೆಗೆ ಇರುತ್ತದೆ. ಇದು ಗಂಭೀರವಾದ ಯಕೃತ್ತಿನ ಕಾಯಿಲೆಗೆ ಕಾರಣವಾಗಬಹುದು. ಅಷ್ಟೇ ಅಲ್ಲ ಕೆಲವೊಮ್ಮೆ ಹೆಪಟೈಟಿಸ್ ಕೂಡ ಲಿವರ್ ಕ್ಯಾನ್ಸರ್‌ಗೆ ಕಾರಣವಾಗುತ್ತದೆ.

ಹೆಪಟೈಟಿಸ್ ಅನ್ನು ತಡೆಗಟ್ಟಲು ಮತ್ತು ಚಿಕಿತ್ಸೆಗೆ ಅನೇಕ ಪರಿಣಾಮಕಾರಿ ಲಸಿಕೆಗಳು ಮತ್ತು ಔಷಧಿಗಳು ಲಭ್ಯವಿವೆ. ಇದಲ್ಲದೆ  ನೈರ್ಮಲ್ಯದ ಬಗ್ಗೆ ಕಾಳಜಿ ವಹಿಸುವ ಮೂಲಕ ಈ ಕಾಯಿಲೆಯಿಂದ ದೂರವಿರಬಹುದು.