ಕೆಲವು ಚಿನ್ನಾಭರಣ, ವಸ್ತುಗಳ ಮೇಲೆ ಆಮದು ನಿರ್ಬಂಧ ಜಾರಿಗೊಳಿಸಿದ ಸರ್ಕಾರ; ನಿಮಗೆ ತಿಳಿದಿರಲಿ ಈ ಮಾಹಿತಿ

ಅನಿವಾರ್ಯವಲ್ಲದ ವಸ್ತುಗಳ ಆಮದನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಕೇಂದ್ರವು ಕೆಲವು ಚಿನ್ನದ ಆಭರಣಗಳು ಮತ್ತು ವಸ್ತುಗಳ ಮೇಲೆ ಆಮದು ನಿರ್ಬಂಧಗಳನ್ನು ಜಾರಿಗೆ ತಂದಿದೆ.

ವಿದೇಶಿ ವ್ಯಾಪಾರ ನಿರ್ದೇಶನಾಲಯ (ಡಿಜಿಎಫ್‌ಟಿ) ಅಧಿಸೂಚನೆ ಹೊರಡಿಸಿದ್ದು, ಇನ್ನು ಮುಂದೆ ಆಮದುದಾರರು ಕೆಲವು ಚಿನ್ನದ ವಸ್ತುಗಳನ್ನು ಆಮದು ಮಾಡಿಕೊಳ್ಳಲು ಸರ್ಕಾರದಿಂದ ಅನುಮತಿ ಅಥವಾ ಪರವಾನಗಿಯನ್ನು ತೆಗೆದುಕೊಳ್ಳಬೇಕಾಗುತ್ತದೆ.

ಭಾರತ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ ನಡುವಿನ ಮುಕ್ತ ವ್ಯಾಪಾರ ಒಪ್ಪಂದದ ಪ್ರಕಾರ ಮಾಡಿದ ಆಮದುಗಳಿಗೆ ಆಮದು ಮಿತಿ ಅನ್ವಯಿಸುವುದಿಲ್ಲ ಎಂದು ಅದು ಹೇಳಿದೆ.

ಭಾರತ-ಯುಎಇ ಸಮಗ್ರ ಆರ್ಥಿಕ ಸಹಭಾಗಿತ್ವ ಒಪ್ಪಂದ (ಸಿಇಪಿಎ) ಸುಂಕ ದರದ ಕೋಟಾದ ಅಡಿಯಲ್ಲಿ ಆಮದು ಮಾಡಿಕೊಳ್ಳಲು ಅಂತಹ ಅನುಮತಿ ಅಗತ್ಯವಿಲ್ಲವಾದರೂ ಸರಕುಗಳನ್ನು ಆಮದು ಮಾಡಿಕೊಳ್ಳಲು ಸರ್ಕಾರದಿಂದ ಪರವಾನಗಿ ಅಗತ್ಯವಿದೆ ಎಂದು ಹೊಸ ನಿರ್ಬಂಧಗಳು ಹೇಳಿವೆ.

ಆದಾಗ್ಯೂ ಮಾನ್ಯವಾದ ಭಾರತ-ಯುಎಇ ಸಿಇಪಿಎ ಟಿಆರ್‌ಕ್ಯು ಅಡಿಯಲ್ಲಿ ಆಮದು ಮಾಡಿಕೊಳ್ಳಲು ಯಾವುದೇ ಆಮದು ಪರವಾನಗಿ ಇಲ್ಲದೆ ಮುಕ್ತವಾಗಿ ಅನುಮತಿಸಲಾಗುವುದು ಎಂದು ವಿದೇಶಿ ವ್ಯಾಪಾರ ನಿರ್ದೇಶನಾಲಯ ಹೇಳಿದೆ.

ಭಾರತ-ಆಸಿಯಾನ್ ಮುಕ್ತ ವ್ಯಾಪಾರ ಒಪ್ಪಂದದ ಅಡಿಯಲ್ಲಿ ಇಂಡೋನೇಷ್ಯಾದಿಂದ ಆಮದುಗಳ ಹೆಚ್ಚಳದ ಹಿನ್ನೆಲೆಯಲ್ಲಿ ಹೊಸ ನಿರ್ಬಂಧಗಳನ್ನು ವಿಧಿಸಲಾಗಿದೆ. ಭಾರತ-ಆಸಿಯಾನ್ ಮುಕ್ತ ವ್ಯಾಪಾರ ಒಪ್ಪಂದದ ಅಡಿಯಲ್ಲಿ ಕೆಲವು ಚಿನ್ನದ ಸರಕುಗಳು ಸುಂಕ ಮುಕ್ತವಾಗಿ ಭಾರತಕ್ಕೆ ಬರುತ್ತಿದ್ದು ಆಭರಣಗಳನ್ನು ತಯಾರಿಸಲು ಭಾರತದಲ್ಲಿ ಅವುಗಳನ್ನು ಕರಗಿಸಲಾಗುತ್ತಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಏಪ್ರಿಲ್-ಮೇ FY24 ರಲ್ಲಿ ಭಾರತವು $112.09 ಮಿಲಿಯನ್ ಚಿನ್ನದ ಉತ್ಪನ್ನಗಳನ್ನು ಆಮದು ಮಾಡಿಕೊಂಡಿತು. ಅದರಲ್ಲಿ $76.28 ಮಿಲಿಯನ್ ಇಂಡೋನೇಷ್ಯಾದಿಂದ ಆಮದಾಗಿದೆ. ಚಿನ್ನದ ಆಮದಿಗೆ ಶೇ 15ರಷ್ಟು ಸುಂಕವನ್ನು ವಿಧಿಸಲಾಗುತ್ತದೆ.

ಇಂಡೋನೇಷ್ಯಾ ಎಂದಿಗೂ ಭಾರತಕ್ಕೆ ಚಿನ್ನಾಭರಣ ಪೂರೈಕೆದಾರನಾಗಿರಲಿಲ್ಲ, ಆದರೆ ಕಳೆದ ಕೆಲವು ತಿಂಗಳುಗಳಲ್ಲಿ ಯಾವುದೇ ಆಮದು ತೆರಿಗೆಗಳನ್ನು ಪಾವತಿಸದೆ ಇಂಡೋನೇಷ್ಯಾದಿಂದ 3-4 ಟನ್‌ಗಳಷ್ಟು ಚಿನ್ನದ ಡೀಲರ್‌ಗಳು ಆಮದು ಮಾಡಿಕೊಳ್ಳಲಾಗಿದೆ.