ವಿಮಾನ ಪ್ರಯಾಣಿಕರಿಗೆ ಗುಡ್ ನ್ಯೂಸ್: ನಾಳೆಯಿಂದ ದೇಶೀಯ ವಿಮಾನ ದರ ಮಿತಿ ರದ್ದು; ಸಿಗಲಿದೆ ರಿಯಾಯಿತಿ, ಕಡಿಮೆಯಾಗಲಿದೆ ದೇಶೀಯ ವಿಮಾನ ಪ್ರಯಾಣ ದರ

ನೀವು ಹಬ್ಬದ ಸಮಯದಲ್ಲಿ ಪ್ರಯಾಣಿಸಲು ಯೋಜಿಸುತ್ತಿದ್ದೀರಾ? ಹೌದು ಎಂದಾದರೆ ಈ ಸುದ್ದಿ ನಿಮಗಾಗಿ. ನಾಳೆಯಿಂದ ಅಂದರೆ ಆಗಸ್ಟ್ 31 ರಿಂದ ದೇಶೀಯ ವಿಮಾನ ದರಗಳ ಮೇಲಿನ ಬೆಲೆ ಮಿತಿಗಳನ್ನು ಸರ್ಕಾರ ತೆಗೆದುಹಾಕಲಿದೆ. ಇದು ಪ್ರಯಾಣಿಕರಿಗೆ ದರದಲ್ಲಿ ರಿಯಾಯಿತಿ ನೀಡಲು ವಿಮಾನಯಾನ ಸಂಸ್ಥೆಗಳಿಗೆ ಅನುಕೂಲವಾಗಲಿದೆ.

ಸುಮಾರು 27 ತಿಂಗಳ ಅವಧಿಯ ನಂತರ ಆಗಸ್ಟ್ 31 ರಿಂದ ದೇಶೀಯ ವಿಮಾನ ದರಗಳ ಮೇಲಿನ ಮಿತಿಗಳನ್ನು ತೆಗೆದುಹಾಕಲಾಗುವುದು ಎಂದು ಕೇಂದ್ರ ವಿಮಾನಯಾನ ಸಚಿವಾಲಯ ಈ ತಿಂಗಳ ಆರಂಭದಲ್ಲಿ ತಿಳಿಸಿತ್ತು.

ನಿಗದಿತ ದೇಶೀಯ ಕಾರ್ಯಾಚರಣೆಗಳ ಪ್ರಸ್ತುತ ಸ್ಥಿತಿಯನ್ನು ಪರಿಶೀಲಿಸಿದ ನಂತರ ವಿಮಾನ ಪ್ರಯಾಣಕ್ಕಾಗಿ ಪ್ರಯಾಣಿಕರ ಬೇಡಿಕೆ ಅನುಸಾರ ಆಗಸ್ಟ್ 31, 2022 ರಿಂದ ಜಾರಿಗೆ ಬರುವಂತೆ ವಿಮಾನ ದರಗಳಿಗೆ ಸಂಬಂಧಿಸಿದಂತೆ ಕಾಲಕಾಲಕ್ಕೆ ಸೂಚಿಸಲಾದ ದರ ಪಟ್ಟಿಗಳನ್ನು ತೆಗೆದುಹಾಕಲು ನಿರ್ಧರಿಸಲಾಗಿದೆ ಎಂದು ನಾಗರಿಕ ವಿಮಾನಯಾನ ಸಚಿವಾಲಯದ ಆದೇಶದಲ್ಲಿ ತಿಳಿಸಿದೆ.

 ಕಡಿಮೆಯಾಗಲಿದೆ ದೇಶೀಯ ವಿಮಾನ ದರ

ಆಗಸ್ಟ್ 31 ರಿಂದ ಇನ್ನು ಮುಂದೆ ಯಾವುದೇ ದರದ ಮಿತಿಗಳಿಲ್ಲದಿರುವುದರಿಂದ, ವಿಮಾನಯಾನ ಸಂಸ್ಥೆಗಳು ಪ್ರಯಾಣಿಕರಿಗೆ ಸೂಕ್ತವಾದ ದರ ವಿಧಿಸಬಹುದು. ಹೆಚ್ಚಿನ ಪ್ರಯಾಣಿಕರನ್ನು ಆಕರ್ಷಿಸಲು ವಿಮಾನಯಾನ ಸಂಸ್ಥೆಗಳು ಫ್ಲೈಟ್ ಟಿಕೆಟ್ ದರಗಳಲ್ಲಿ ರಿಯಾಯಿತಿಗಳನ್ನು ನೀಡಬಹುದು. ಈ ಹಿಂದೆ, ಸರ್ಕಾರ ವಿಧಿಸಿದ ದೇಶೀಯ ವಿಮಾನ ದರದ ಮೇಲಿನ ಕಡಿಮೆ ಮತ್ತು ಮೇಲಿನ ಬೆಲೆಯ ಮಿತಿಗಳಿಂದಾಗಿ ವಿಮಾನಯಾನ ಸಂಸ್ಥೆಗಳು ರಿಯಾಯಿತಿಗಳನ್ನು ನೀಡಲು ಸಾಧ್ಯವಾಗಲಿಲ್ಲ.

ದೇಶೀಯ ವಿಮಾನ ದರಗಳ ಮೇಲಿನ ಮಿತಿಯನ್ನು ತೆಗೆದುಹಾಕಲು ಸರ್ಕಾರ ನಿರ್ಧರಿಸಿದ್ದೇಕೆ…?

ಏರ್ ಟರ್ಬೈನ್ ಇಂಧನದ (ATF) ದೈನಂದಿನ ಬೇಡಿಕೆ ಮತ್ತು ಬೆಲೆಗಳನ್ನು ಎಚ್ಚರಿಕೆಯಿಂದ ವಿಶ್ಲೇಷಿಸಿದ ನಂತರ ವಿಮಾನ ದರದ ಮಿತಿಗಳನ್ನು ತೆಗೆದುಹಾಕುವ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿತ್ತು. ಮುಂದಿನ ದಿನಗಳಲ್ಲಿ ದೇಶೀಯ ಟ್ರಾಫಿಕ್ ಬೆಳವಣಿಗೆಗೆ ಈ ವಲಯ ಸಿದ್ಧವಾಗಿದೆ ಎಂದು ನಮಗೆ ಖಚಿತವಾಗಿದೆ ಎಂದು ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಟ್ವೀಟ್ ಮಾಡಿದ್ದಾರೆ.

ಫೆಬ್ರವರಿ 24 ರಂದು ಪ್ರಾರಂಭವಾದ ರಷ್ಯಾ-ಉಕ್ರೇನ್ ಯುದ್ಧದ ಕಾರಣದಿಂದಾಗಿ ಕಳೆದ ಕೆಲವು ವಾರಗಳಲ್ಲಿ ದಾಖಲೆಯ ಮಟ್ಟಕ್ಕೆ ಎಟಿಎಫ್ ಬೆಲೆಗಳು ಜಿಗಿದ ನಂತರ ಈಗ ಕಡಿಮೆಯಾಗುತ್ತಿವೆ.

ಮಿತಿ ಏಕೆ ವಿಧಿಸಿತ್ತು…?

ರಾಷ್ಟ್ರವ್ಯಾಪಿ ಕೋವಿಡ್-19 ಲಾಕ್‌ ಡೌನ್ ನಂತರ ವಿಮಾನ ಪ್ರಯಾಣ ಪುನರಾರಂಭಗೊಂಡಿದ್ದರಿಂದ ಸರ್ಕಾರ ಮೇ 2020 ರಲ್ಲಿ ದೇಶೀಯ ವಿಮಾನ ದರಗಳ ಮೇಲೆ ಕಡಿಮೆ ಮತ್ತು ಮೇಲಿನ ಮಿತಿಗಳನ್ನು ವಿಧಿಸಿತ್ತು. ಅಕ್ಟೋಬರ್ 2021 ರಲ್ಲಿ ಸರ್ಕಾರವು ಶೇಕಡ 100 ರಷ್ಟು ಸಾಮರ್ಥ್ಯದ ನಿಯೋಜನೆಯನ್ನು ಅನುಮತಿಸಿದರೆ, ಅದು ಬೆಲೆ ನಿಯಂತ್ರಣದೊಂದಿಗೆ ಮುಂದುವರೆಯಿತು. ಆರ್ಥಿಕವಾಗಿ ದುರ್ಬಲವಾಗಿರುವ ವಿಮಾನಯಾನ ಸಂಸ್ಥೆಗಳನ್ನು ರಕ್ಷಿಸಲು ಲೋವರ್ ಕ್ಯಾಪ್‌ಗಳು ಮತ್ತು ಹೆಚ್ಚಿನ ದರಗಳಿಂದ ಪ್ರಯಾಣಿಕರನ್ನು ರಕ್ಷಿಸಲು ಮೇಲಿನ ಕ್ಯಾಪ್‌ಗಳು ಇದ್ದವು.

ಉದಾಹರಣೆಗೆ, ವಿಮಾನಯಾನ ಸಂಸ್ಥೆಗಳು ಪ್ರಸ್ತುತ 40 ನಿಮಿಷಗಳಿಗಿಂತ ಕಡಿಮೆ ಅವಧಿಯ ದೇಶೀಯ ವಿಮಾನಗಳಿಗೆ 2,900 ರೂ.(GST ಹೊರತುಪಡಿಸಿ) ಮತ್ತು 8,800 ರೂ.ಕ್ಕಿಂತ ಹೆಚ್ಚು(GST ಹೊರತುಪಡಿಸಿ) ಪ್ರಯಾಣಿಕರಿಗೆ ಶುಲ್ಕ ವಿಧಿಸುವಂತಿಲ್ಲ.