ಕೊರೊನಾ ಮಾರ್ಗಸೂಚಿ ಉಲ್ಲಂಘಿಸಿದ ಪ್ರಸಿದ್ಧ ಮಾರುಕಟ್ಟೆ ‘ಬಂದ್’​

ಕೋವಿಡ್​ ಮಾರ್ಗ ಸೂಚಿಗಳನ್ನ ಉಲ್ಲಂಘಿಸಿದ ಕಾರಣಕ್ಕಾಗಿ ದೆಹಲಿಯ ಲಜಪತ್​ ನಗರದ ಪ್ರಸಿದ್ಧ ಸೆಂಟ್ರಲ್​ ಮಾರ್ಕೆಟ್​ ಸೇರಿದಂತೆ ಎರಡು ದೊಡ್ಡ ಮಾರ್ಕೆಟ್​ಗಳನ್ನ ಬಂದ್​ ಮಾಡಿಸಲಾಗಿದೆ. ಕಳೆದ ಎರಡು ದಿನಗಳ ಹಿಂದೆಯಷ್ಟೇ ಕೊರೊನಾ ಮಾರ್ಗಸೂಚಿಗಳನ್ನ ಉಲ್ಲಂಘಿಸಿದ್ದಕ್ಕಾಗಿ ಎರಡು ಮಾರ್ಕೆಟ್​ಗಳನ್ನ ಜುಲೈ 6ರವರೆಗೆ ಬಂದ್​ ಮಾಡಿಸಲಾಗಿತ್ತು. ಇದೀಗ ಇದೇ ಸಾಲಿಗೆ ಸೆಂಟ್ರಲ್​ ಮಾರ್ಕೆಟ್​ ಕೂಡ ಸೇರಿದೆ.

ಸಾಮಾಜಿಕ ಅಂತರ ಸೇರಿದಂತೆ ವಿವಿಧ ಕೊರೊನಾ ಮಾರ್ಗಸೂಚಿಗಳನ್ನ ಉಲ್ಲಂಘಿಸಿದ ಹಿನ್ನೆಲೆ ಮುಂದಿನ ಆದೇಶ ಬರುವವರೆಗೂ ಸೆಂಟ್ರಲ್​ ಮಾರ್ಕೆಟ್​ ಬಂದ್​ ಇರಲಿದೆ. ಈ ಮಾರ್ಕೆಟ್​​ನಲ್ಲಿ 2 ಸಾವಿರಕ್ಕೂ ಅಧಿಕ ಅಂಗಡಿಗಳಿವೆ.

ಸದರ್​ ಬಜಾರ್​​ನ ರೂಯಿ ಮಾರ್ಕೆಟ್​ ಕೂಡ ನಾಳೆವರೆಗೆ ಬಂದ್​ ಇರಲಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಕೋವಿಡ್​ ಮಾರ್ಗಸೂಚಿಗಳನ್ನ ಉಲ್ಲಂಘಿಸಿ ಜನಜಾತ್ರೆ ಸೇರಿದ ಕಾರಣ ಈ ಕ್ರಮ ಕೈಗೊಳ್ಳಲಾಗಿದೆ.

ನಾವು ಗ್ರಾಹಕರ ಬಳಿ ಸಾಮಾಜಿಕ ಅಂತರ ಕಾಪಾಡುವಂತೆ ಮನವಿ ಮಾಡಿದ್ದೆವು. ಕೊರೊನಾ ಮಾರ್ಗಸೂಚಿಗಳ ಪಾಲನೆಗೆ ನಮ್ಮ ಕೈ ಮೀರಿ ಪ್ರಯತ್ನ ಮಾಡುತ್ತಿದ್ದೇವೆ. ಹೆಚ್ಚಿನ ಜನರು ಮಾಸ್ಕ್​ ಧರಿಸಿಯೇ ಮಾರ್ಕೆಟ್​ಗೆ ಬರುತ್ತಾರೆ. ಹಾಗಂತ 100 ಪ್ರತಿಶತ ಕೊರೊನಾ ಮಾರ್ಗಸೂಚಿ ಪಾಲನೆಯಾಗಿದೆ ಎಂತಲೂ ನಾನು ಹೇಳಲಾರೆ ಎಂದು ಸೆಂಟ್ರಲ್​ ಮಾರ್ಕೆಟ್​ನ ವ್ಯಾಪಾರಿಯೊಬ್ಬರು ಹೇಳಿದ್ರು.