ವಾಹನ ಚಾಲನಾ ಪರವಾನಿಗೆ ಕುರಿತಂತೆ ಮಹತ್ವದ ಬದಲಾವಣೆಗೆ ಮುಂದಾದ ಕೇಂದ್ರ ಸರ್ಕಾರ

ಕೇಂದ್ರ ರಸ್ತೆ ಹಾಗೂ ಸಾರಿಗೆ ಸಚಿವಾಲಯ ಡ್ರೈವಿಂಗ್​ ಸೆಂಟರ್​ಗಳಿಗೆ ಎಕ್ರಿಡಿಯೇಷನ್​ಗಾಗಿ ಡ್ರಾಫ್ಟ್​ ನೋಟಿಫಿಕೇಷನ್​ನ್ನು ಜಾರಿ ಮಾಡಿದೆ. ಇಂತಹ ಸೆಂಟರ್​ಗಳಿಗೆ ಡ್ರೈವಿಂಗ್​ ತರಬೇತಿಯನ್ನ ಸಂಪೂರ್ಣವಾಗಿ ಪಡೆದ ವ್ಯಕ್ತಿಯು ವಾಹನ ಪರವಾನಿಗೆಗೆ ಅರ್ಜಿ ಸಲ್ಲಿಸುವ ವೇಳೆಯಲ್ಲಿ ಡ್ರೈವಿಂಗ್​ ಟೆಸ್ಟ್​ ನೀಡಬೇಕು ಎಂಬ ಅವಶ್ಯಕತೆ ಇರೋದಿಲ್ಲ.

ಈ ವಿಚಾರವಾಗಿ ಮಾಹಿತಿ ನೀಡಿದ ಕೇಂದ್ರ ಸಚಿವಾಲಯ, ಈ ಮಹತ್ವದ ಹೆಜ್ಜೆಯಿಂದಾಗಿ ಸಾರಿಗೆ ಲೋಕಕ್ಕೆ ಒಳ್ಳೆಯ ಚಾಲಕ ಸಿಕ್ಕಂತೆ ಆಗುತ್ತೆ. ಮಾತ್ರವಲ್ಲದೇ ರಸ್ತೆ ಅಪಘಾತಗಳ ಸಂಖ್ಯೆಯೂ ಕಡಿಮೆಯಾಗಲಿದೆ. ಜನವರಿ 29ರಂದು ಕೇಂದ್ರ ಸಚಿವಾಲಯದ ಅಧಿಕೃತ ವೆಬ್​ಸೈಟ್​ ಖಾತೆಯಲ್ಲಿ ಈ ಡ್ರಾಫ್ಟ್​ ನೋಟಿಫಿಕೇಶನ್​ ಹಾಕಲಾಗಿದ್ದು ಜನರಿಂದ ಸಲಹೆಯನ್ನ ಕೇಳಲಾಗಿದೆ. ಎಲ್ಲರ ಸಲಹೆಗಳನ್ನ ಗಮನದಲ್ಲಿ ಇಟ್ಟುಕೊಂಡು ಕೇಂದ್ರ ಸಚಿವಾಲಯ ಮುಂದಿನ ನಿರ್ಧಾರವನ್ನ ಕೈಗೊಳ್ಳಲಿದೆ.

ಕೇಂದ್ರ ಸಚಿವ ನಿತಿನ್​ ಗಡ್ಕರಿ ಕಳೆದ ವರ್ಷ ಟ್ರಾನ್ಸ್​ಪೋರ್ಟ್​ ಡೆವಲಪ್​ಮೆಂಟ್​ ಕೌನ್ಸಿಲ್​​ನ 40ನೇ ಸಮ್ಮೇಳನದಲ್ಲಿ ಭಾಗಿಯಾಗಿ ಮಾತನಾಡಿದ ವೇಳೆ 2025ರಲ್ಲಿ ರಸ್ತೆ ಅಪಘಾತಗಳ ಸಂಖ್ಯೆಯನ್ನ ಅರ್ಧದಷ್ಟು ಕಡಿಮೆ ಮಾಡಲು ಬೇಕಾದ ಸೂಕ್ತ ಕ್ರಮಗಳನ್ನ ಕೈಗೊಳ್ಳುತ್ತೇವೆ ಎಂದು ಹೇಳಿದ್ದನ್ನ ನಾವಿಲ್ಲಿ ನೆನಪಿಸಬಹುದು.

ರಾಷ್ಟ್ರೀಯ ರಸ್ತೆ ಸುರಕ್ಷತೆ ಕೌನ್ಸಿಲ್​​ನ 19ನೇ ಸಭೆಯಲ್ಲಿ  ಕೇಂದ್ರ ಸಚಿವ ನಿತಿನ್​ ಗಡ್ಕರಿ ರಸ್ತೆ ಸುರಕ್ಷತೆಗಾಗಿ ಸಾಮಾಜಿಕ ಜಾಲತಾಣವನ್ನ ಬಳಸಿಕೊಂಡು ಜನರಲ್ಲಿ ಜಾಗೃತಿ ಮೂಡಿಸಬೇಕು ಎಂದು ಹೇಳಿದ್ದರು. ಇದರಿಂದ ರಸ್ತೆ ಅವಘಡಗಳನ್ನ ಕಡಿಮೆ ಮಾಡಬಹುದು ಎಂದು ಸಲಹೆ ನೀಡಿದ್ದರು.