ನಿಂಬೆ ರಸದ ಪ್ರಯೋಜನಗಳ ಬಗ್ಗೆ ಹೆಚ್ಚಿನ ಜನರಿಗೆ ತಿಳಿದಿದೆ. ಸಾಮಾನ್ಯವಾಗಿ ನಾವೆಲ್ಲ ನಿಂಬೆರಸವನ್ನು ಹಿಂಡಿ ಅದರ ಸಿಪ್ಪೆಯನ್ನು ಬಿಸಾಡುತ್ತೇವೆ. ಆದರೆ ನಿಂಬೆಸಿಪ್ಪೆ ಯಾವ ಔಷಧಕ್ಕೂ ಕಡಿಮೆಯಿಲ್ಲ. ಸಿಪ್ಪೆಯಲ್ಲಿ ಹಲವಾರು ಬಗೆಯ ಪ್ರಯೋಜನಗಳಿವೆ. ದುಬಾರಿ ಕ್ಲೀನರ್‌ಗಳ ಬದಲಿಗೆ ಅಡುಗೆಮನೆಯನ್ನು ಸ್ವಚ್ಛಗೊಳಿಸಲು ನಿಂಬೆ ಸಿಪ್ಪೆಯನ್ನು ಬಳಸಬಹುದು.
ಅಡುಗೆ ಮಾಡುವಾಗ ಎಣ್ಣೆ, ಅರಿಶಿನದ ಕಲೆಗಳಾಗುವುದು ಸಾಮಾನ್ಯ. ಆರೋಗ್ಯದ ದೃಷ್ಟಿಯಿಂದ ಅದನ್ನೆಲ್ಲ ಶುಚಿಗೊಳಿಸಲೇಬೇಕು. ರಾಸಾಯನಿಕ ಉತ್ಪನ್ನಗಳ ಬದಲಿಗೆ ನಿಂಬೆ ಸಿಪ್ಪೆಯನ್ನು ನೈಸರ್ಗಿಕ ಕ್ಲೆನ್ಸರ್‌ ಆಗಿ ಬಳಸಿ.
ಪಾತೆಗಳನ್ನು ಫಳ ಫಳ ಹೊಳೆಯುವಂತೆ ಮಾಡಲು ನಿಂಬೆ ಸಿಪ್ಪೆಯ ಬಳಕೆ ಉತ್ತಮ. ಪಾತ್ರೆಗಳ ಮೇಲೆ ನಿಂಬೆ ಸಿಪ್ಪೆಯಿಂದ ಉಜ್ಜಿ, ಹೀಗೆ ಮಾಡುವುದರಿಂದ ಎಣ್ಣೆಯ ಕಲೆಗಳು ಸ್ವಚ್ಛವಾಗುತ್ತವೆ. ಇದು ಪಾತ್ರೆಗಳಿಗೆ ನೈಸರ್ಗಿಕ ಪರಿಮಳವನ್ನು ನೀಡುತ್ತದೆ.
ರಾಸಾಯನಿಕ ಬೆರೆತ ಫ್ಲೋರ್‌ ಕ್ಲೀನರ್‌ಗಳ ಬಳಕೆ ಆರೋಗ್ಯದ ದೃಷ್ಟಿಯಿಂದ ಸೂಕ್ತವಲ್ಲ. ಅವುಗಳ ಬದಲು ನಿಂಬೆ ಸಿಪ್ಪೆಯನ್ನು ಪೇಸ್ಟ್ ಮಾಡಿ ನೆಲದ ಮೇಲೆ ಲೇಪಿಸಿ ನಂತರ ನೀರಿನಿಂದ ಸ್ವಚ್ಛಗೊಳಿಸಿ. ಮಾರ್ಬಲ್ ಮತ್ತು ಗ್ರಾನೈಟ್ ಮಹಡಿಗಳನ್ನು ಸ್ವಚ್ಛಗೊಳಿಸಲು ಇದು ಬೆಸ್ಟ್.
ಅಡುಗೆ ಮನೆಯಲ್ಲಿ ಇಟ್ಟಿರುವ ಡಸ್ಟ್‌ಬಿನ್‌ನ ವಾಸನೆಯನ್ನು ಕಡಿಮೆ ಮಾಡಲು ನಿಂಬೆ ಸಿಪ್ಪೆಯನ್ನು ಬಳಸಬಹುದು. ಇದಕ್ಕಾಗಿ ನಿಂಬೆ ಸಿಪ್ಪೆಗಳನ್ನು ಒಣಗಿಸಿ, ಅವುಗಳನ್ನು ಕಸದ ಬುಟ್ಟಿಯಲ್ಲಿ ಇರಿಸಿ. ಡಸ್ಟ್‌ಬಿನ್‌ನಲ್ಲಿ ಉಳಿದ ನಿಂಬೆ ರಸವನ್ನು ಸಹ ಸಿಂಪಡಿಸಬಹುದು.
ಒಂದು ಪಾತ್ರೆಯಲ್ಲಿ ನೀರು ತುಂಬಿಸಿ ಅದರಲ್ಲಿ ನಿಂಬೆ ತುಂಡುಗಳನ್ನು ಹಾಕಿ. ಸ್ವಲ್ಪ ಸಮಯದವರೆಗೆ ಮೈಕ್ರೊವೇವ್ ಅನ್ನು ಚಲಾಯಿಸಿ. ಇದು ಹಬೆಯನ್ನು ಬಿಡುಗಡೆ ಮಾಡುತ್ತದೆ ಮತ್ತು ಸಂಗ್ರಹವಾದ ಕೊಳೆಯನ್ನು ಸಡಿಲಗೊಳಿಸುತ್ತದೆ. ನಂತರ ಒದ್ದೆಯಾದ ಬಟ್ಟೆಯಿಂದ ಮೈಕ್ರೋವೇವ್‌ ಅನ್ನು ಸ್ವಚ್ಛಗೊಳಿಸಿ.
ತೇವಾಂಶದ ಕಾರಣ ಅಡುಗೆಮನೆಯಲ್ಲಿರುವ ಮಸಾಲೆ ಪೆಟ್ಟಿಗೆಗಳ ಮೇಲೆ ಜಿಗುಟಾದ ಕೊಳಕು ಸಂಗ್ರಹಗೊಳ್ಳುತ್ತದೆ. ನಿಂಬೆ ಸಿಪ್ಪೆಗಳಿಂದ ಉಜ್ಜಿದರೆ ಈ ಜಿಡ್ಡು ಮಾಯವಾಗುತ್ತದೆ. ಮಸಾಲೆ ಡಬ್ಬಿಯನ್ನು ಬಿಸಿ ನೀರಿನಲ್ಲಿ ಸ್ವಲ್ಪ ಸಮಯದವರೆಗೆ ಇರಿಸಿದ ನಂತರ ಡಿಶ್ ವಾಶ್‌ ಲಿಕ್ವಿಡ್‌ ಅನ್ನು ಹಾಕಿ ನಿಂಬೆ ಸಿಪ್ಪೆಯಿಂದ ಉಜ್ಜಿಕೊಳ್ಳಿ. ನಂತರ ಸ್ವಚ್ಛವಾಗಿ ತೊಳೆದರೆ ಕಲೆಗಳ ಜೊತೆಗೆ ವಾಸನೆಯೂ ಸಂಪೂರ್ಣವಾಗಿ ಕಣ್ಮರೆಯಾಗುತ್ತದೆ.
Loading ...