ಸಾಕು ಶ್ವಾನದ ಸಾವಿಗೆ ಕಾರಣರಾದ್ರಾ ಪೊಲೀಸರು..? ಖಾಕಿ ವಿರುದ್ಧ ವಿಚಿತ್ರ ಆರೋಪ ಹೊರಿಸಿದ ಕುಟುಂಬ..!

ದೆಹಲಿ ಪೊಲೀಸರಿಂದ ಬಂಧನಕ್ಕೊಳಗಾಗಿದ್ದ ಕಳ್ಳತನದ ಆರೋಪವನ್ನು ಹೊತ್ತಿದ್ದ ಕುಟುಂಬ ಸದಸ್ಯರು ಪೊಲೀಸರ ನಿರ್ಲಕ್ಷ್ಯದಿಂದಾಗಿ ತಮ್ಮ ಸಾಕು ನಾಯಿ ಸಾವನ್ನಪ್ಪಿದೆ ಎಂದು ಆರೋಪಿಸಿದ್ದಾರೆ. ಈ ಆರೋಪಕ್ಕೆ ಪುಷ್ಠಿ ನೀಡುವಂತಹ ವಿಡಿಯೋವನ್ನೂ ಕುಟುಂಬ ಸದಸ್ಯರು ರಿಲೀಸ್​ ಮಾಡಿದ್ದಾರೆ.

ರೋಹಿಣಿಯ ಬೇಗಂಪುರ ಪ್ರದೇಶದಲ್ಲಿ ದರೋಡೆ ನಡೆಸಿದ ಆರೋಪಿಗಳನ್ನು ಬಂಧಿಸಲು ತೆರಳಿದ್ದ ವೇಳೆಯಲ್ಲಿ ಈ ಘಟನೆ ಸಂಭವಿಸಿದೆ. ಪೊಲೀಸ್​ ಸಿಬ್ಬಂದಿ ನಮ್ಮ ಮನೆಯಲ್ಲಿ ಶ್ವಾನಗಳ ನಡುವೆ ಜಗಳ ಉಂಟು ಮಾಡಲು ಕಾರಣರಾಗಿದ್ದಾರೆ. ಪಿಟ್​ಬುಲ್​ ನಾಯಿಯನ್ನು ನಮ್ಮ ಮನೆಯ ನಾಯಿಯೊಂದಿಗೆ ಕಾದಾಟಕ್ಕೆ ಬಿಟ್ಟಿದ್ದಾರೆ. ಪರಿಣಾಮ ನಮ್ಮ ಸಾಕು ಶ್ವಾನ ಸಾವನ್ನಪ್ಪಿದೆ ಎಂದು ಕುಟುಂಬವು ಆರೋಪಿಸಿದೆ.

ಈ ಭೀಕರ ಘಟನೆಯ ವಿಡಿಯೋವನ್ನು ಕುಟುಂಬದ ಸದಸ್ಯರೊಬ್ಬರು ತಮ್ಮ ಫೋನ್​​ನಲ್ಲಿ ರೆಕಾರ್ಡ್ ಮಾಡಿದ್ದಾರೆ. ನಾಯಿಗಳ ನಡುವೆ ಕಾದಾಟ ನಡೆಯುತ್ತಿದ್ದ ವೇಳೆಯಲ್ಲಿ ಪೊಲೀಸರು ಚಪ್ಪಾಳೆ ತಟ್ಟುವ ಮೂಲಕ ತಮ್ಮ ಪಿಟ್​ಬುಲ್​ ಶ್ವಾನವನ್ನು ಹುರಿದುಂಬಿಸುತ್ತಿರೋದನ್ನು ಕಾಣಬಹುದಾಗಿದೆ. ಆರೋಪಿಗಳು ಪೊಲೀಸರ ಬಳಿ ತಮ್ಮ ಶ್ವಾನವನ್ನು ಬಿಡುವಂತೆ ಮನವಿ ಮಾಡುತ್ತಾ ಅಳುತ್ತಿರೋದು ಸಹ ವಿಡಿಯೋದಲ್ಲಿ ಕೇಳುತ್ತಿದೆ.

ಅಲ್ಲದೇ ಪೊಲೀಸ್​ ಕಸ್ಟಡಿಯಲ್ಲಿದ್ದ ವೇಳೆಯಲ್ಲಿ ತಮ್ಮ ಬೆನ್ನು ಹಾಗೂ ಎಡಗೈಗೆ ಗಾಯವಾಗುವ ರೀತಿಯಲ್ಲಿ ಪೊಲೀಸರು ಥಳಿಸಿದ್ದಾರೆಂದೂ ಈ ಕುಟುಂಬ ದೂರಿದೆ. ಈ ಎಲ್ಲದರ ಸಂಬಂಧ ಸೂಕ್ತ ತನಿಖೆ ನಡೆಸುವಂತೆ ಜಂಟಿ ಕಮಿಷನರ್​ ಆದೇಶ ಹೊರಡಿಸಿದ್ದಾರೆ.